U Rwanda rwashyikirijwe icyogajuru cyarwo cyakorewe mu Buyapani

Yanditswe na Philbert Girinema
Kuya 16 Gicurasi 2019 saa 12:43
Yasuwe :
0 0

U Buyapani bwashyikirije u Rwanda icyogajuru cya RWASAT-1 cyakozwe na Kaminuza ya Tokyo ifatanyije n’itsinda ry’abanyarwanda 15, abo byitezwe ko kigiye gutanga umusanzu mu iterambere ry’ubuhinzi mu Rwanda.

72 % by’abanyarwanda muri iki gihe batunzwe n’imirimo y’ubuhinzi cyangwa indi ifitanye isano nabwo. Agaciro kabwo kavuye kuri miliyari 1,084 Frw mu 2010 kagera kuri miliyari 1,785 Frw mu 2015, ni ukuvuga inyongera ya 65%.

Umushinga w’icyogajuru cya RWASAT-1 umaze imyaka ibiri utangijwe aho kizajya cyifashishwa mu gufata amashusho y’ubutaka bw’u Rwanda. Gikoranye akuma gato gafite ubushobozi buhambaye bwatuma kibasha gupima ingano y’amazi mu butaka, ubushyuhe, ubuhehere n’ibindi bipimo bijyanye n’imiterere y’ibihe.

Kireshya na cm 30 z’uburebure na 10 z’ubugari ndetse gipima ibiro 3.8.

Umujyanama muri Komite y’u Buyapani ishinzwe iby’isanzure, Takayoshi Fukuyo, yagishyikirije Minisitiri w’Ikoranabuhanga na Inovasiyo, Ingabire Paula, kuri uyu wa Kane mu nama ya Transform Africa.

Umuyobozi muri Komisiyo y’Igihugu Ishinzwe Ubumenyi n’Ikoranabuhanga (NCST), ushinzwe gusangiza abandi Ubumenyi n’Ikoranabuhanga, Twagirayezu Gaspard, wari mu Buyapani mu ikorwa ry’iki cyogajuru, yabwiye itangazamakuru ko intumbero ari uko ibindi bizakorerwa mu Rwanda.

Ati “Ibice byinshi by’icyogajuru bishobora gukorerwa mu Rwanda ariko harimo ibice bijyanye no gukora igererageza ryacyo aho bisaba inganda na laboratoire tudafite hano mu Rwanda naho ibindi bishobora gukorerwa hano mu Rwanda.”

“Ni nacyo turi kurebaho mu minsi iri imbere mu zindi RWASAT ku buryo ibice binini byazajya bikorerwa mu Rwanda hanyuma igeragezwa tudafitiye ubushobozi tukaba twarikorera hanze.”

Ashingiye ku bunararibonye we na bagenzi be bakuye mu Buyapani, Twagirayezu yavuze ko mu gihe kiri imbere abanyarwanda bashobora kuzicara bagahera kuri 0 bakikorera icyogajuru cyabo.

Iki cyogajuru kizohererezwa mu isanzure mu Buyapani aho kizaba kiri mu bilometero 400 uvuye ku Isi.

Umujyanama muri Komite y’u Buyapani ishinzwe iby’isanzure, Takayoshi Fukuyo, yavuze ko hari ubufatanye Kaminuza ya Tokyo ifitanye n’Ishuri Rikuru ry’Imyuga n’Ubumenyingiro rya Tumba, aho abanyarwanda bazahugurwa mu kugenzura amakuru atangwa n’ibyogajuru.

Ati “Igitekerezo cyacu ntikigarukira ku gukora icyogajuru gusa, ni ingenzi guha ubushobozi abantu bashobora kugenzura, gukoresha iri koranabuhanga.”

Itsinda ry’abanyarwanda 15 nibo bagize uruhare mu gukora RWASAT-1, bamwe bari mu Rwanda, batatu mu Buyapani abandi bari muri Leta Zunze Ubumwe za Amerika.

Iki cyogajuru gifite ubushobozi bwo kwitegereza mu bice bitandukanye cyifashishije camera ebyiri zacyo, zishobora gufata amafoto yo ku butaka bw’u Rwanda mu buryo butandukanye
Rwasat-1 ni icyogajuru cya mbere gikozwe bigizwemo uruhare n'abanyarwanda kizifashishwa mu bikorwa by’ubuhinzi mu Rwanda
Umujyanama muri Komite y’u Buyapani ishinzwe iby’isanzure, Takayoshi Fukuyo, ashyikiriza Minisitiri w’Ikoranabuhanga na Inovasiyo, Ingabire Paula, iki cyogajuru
Minisitiri w'Ikoranabuhanga na Inovasiyo, Ingabire Paula, ubwo yakiraga icyogajuru cyiswe RWASAT-1

Inkuru bifitanye isano: Imiterere ya Rwasat-1, icyogajuru cya mbere cyakozwe n’abanyarwanda


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza