00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwashinje RDC kuyobya uburari, rwamagana ibyo guhanura indege ya Tshisekedi

Yanditswe na IGIHE
Kuya 30 Ukuboza 2022 saa 07:17
Yasuwe :

Guverinoma y’u Rwanda yamaganye ibirego bya Leta ya Repubulika Iharanira Demokarasi ya Congo by’uko hari Abanyarwanda boherejwe muri icyo gihugu mu bikorwa by’ubutasi.

Mu itangazo ryashyizwe hanze, u Rwanda rwavuze ko izo ari imvugo zikomeje gukongeza urwango mu batuye Congo, rusaba amahanga kutabirebera no kubiryoza abayobozi b’iki gihugu.

Ku wa Kabiri tariki 27 Ukuboza 2022, Guverinoma ya RDC yeretse itangazamakuru abagabo bane barimo umusirikare wo ku rwego rwa Colonel mu ngabo zayo FARDC, bashinjwa kuba intasi z’u Rwanda.

Aberekanywe ni Nshimiyimana Biseruka Juvénal w’imyaka 58, Murokore Mushabe Moses w’imyaka 33. Abandi ni Nganji Nsengiyumva Remy bakunze kwita Djuma na Col Mugisha Ruyumbu Santos, uyu akaba ari umusirikare mu ngabo za FARDC.

Nshimiyimana Biseruka na Murokore basanzwe bakorera Umuryango utegamiye kuri Leta uharanira guteza imbere urwego rw’ubuzima muri RDC witwa “African Health Development Organization” (AHDO).

Leta ya Congo ivuga ko Murokore Mushabe Moses, w’imyaka 33 muri mudasobwa ye basanzemo ifoto ye yambaye impuzankano ya RDF ari kumwe na bagenzi be. [Iyi foto yerekana ko ari impuzankano zambikwaga abari mu itorero ry’igihugu].

Itangazo u Rwanda rwashyize hanze, rwagaragaje ko ibishinjwa Dr Nshimiyimana na Mushabe ari ibinyoma kuko bamaze amezi ane bafunzwe mu buryo bunyuranyije n’amategeko, bazira gusa kuba ari Abanyarwanda.

Ivuga ko biri mu mugambi wa Leta ya Congo wo gukomeza gukwirakwiza imvugo z’urwango zibasiye Abanyarwanda, abavuga Ikinyarwanda n’abo mu bwoko bw’Abatutsi muri icyo gihugu.

Rigira riti “Nyuma y’iminsi itsinda ry’impuguke za Loni zigaragaje ko hari ubugizi bwa nabi bushingiye ku moko n’imvugo z’urwango byibasiye Abanyarwanda, abavuga Ikinyarwanda n’Abatutsi muri Repubulika Iharanira Demokarasi ya Congo, bigakorwa n’abayobozi, abasirikare n’abahagarariye imiryango itegamiye kuri Leta, muri iki cyumweru Minisitiri w’Umutekano wungirije muri Congo, Jean-Claude Molipe Mandongo, yarushijeho kugaragaza ubugizi bwa nabi no guhamagarira abaturage kubwishoramo.”

“U Rwanda ruhangayikishijwe n’abenegihugu barwo babiri, Dr Juvénal Nshimiyimana na Moses Mushabe bakoreraga umuryango utegamiye kuri Leta African Health Development Organisation. Bafungiwe i Kinshasa guhera tariki 30 Kanama 2022 ariko baherutse kwerekanwa mu itangazamakuru bitwa ‘intasi’.”

Mu Ugushyingo n’Ukuboza uyu mwaka, u Rwanda rwanditse rugaragaza ko ruhangayikishijwe n’abo baturage barwo bafunzwe mu buryo bunyuranyije n’amategeko. Icyo gihe Congo ntiyigeze igaragaza ibyo bashinjwa.

Muri iri tangazo, u Rwanda ruvuga ko gufata abo baturage bakitwa intasi ari uburyo busanzwe bukoreshwa n’abayobozi “badashaka kubazwa ibyo bashinzwe cyangwa ibyo bananiwe gukora, bashaka uko bitwaza amacakubiri ashingiye ku moko bagaragaza ko ibibazo biva hanze. Ntawe utazi aho ibi biganisha cyangwa ikiguzi cyabyo.”

Guverinoma ya RDC yavuze ko ubwo butasi bwari bugamije gutega indege ya Perezida Tshisekedi, kugira ngo ihanurwe nk’uko byakozwe ku ndege yari itwaye Perezida Juvénal Habyarimana muri Mata 1994.

U Rwanda rugaragaza ko ibi ari ukurangaza abantu kugira ngo abayobozi ba Congo batabazwa ubugizi bwa nabi buri gukorwa mu gihugu bwibasiye abavuga Ikinyarwanda, aho na Loni yagaragaje ko biganisha kuri Jenoside.

Bati “Turasaba abayobozi ba Congo kugabanya imvugo z’urwango no kureka inzira barimo. Umuryango Mpuzamahanga harimo n’abakomeje gukingira ikibaba abayobozi ba RDC, bakwiriye guha agaciro ibi bintu no kubiryoza abayobozi ba Congo.”

Bamwe mu batawe muri yombi bashinjwa kuba intasi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .