00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwashimangiye ko rutazirukana impunzi z’Abanye-Congo

Yanditswe na Rabbi Malo Umucunguzi
Kuya 11 Mutarama 2023 saa 09:10
Yasuwe :

Guverinoma y’u Rwanda yavuze ko idateze kwirukana ku gahato impunzi icumbikiye, ariko ishimangira ko bitangaje kuba mu myaka 20 ishize, Guverinoma ya Repubulika Iharanira Demokarasi ya Congo itajya ikomoza ku mpunzi zayo ziri mu Rwanda.

U Rwanda rucumbikiye impunzi hafi 80,000 z’Abanye-Congo binjiye mu gihugu bahunga ibibazo by’umutekano muke ndetse bamaze imyaka isaga 20 Leta yabo itita ku kibazo cyabo.

Ahubwo, muri iyi myaka ubwo umutwe wa M23 wuburaga imirwano n’Ingabo za Leta, icyo gihugu cyijunditse u Rwanda kivuga ko ruri inyuma y’umutekano muke uri mu burasirazuba bwacyo, ibyo bihabwa umwanya kurusha ibibazo byatumye izi mpunzi zigera mu Rwanda mu myaka myinshi ishize.

Mu ijambo yavuze ku wa Mbere ubwo yayoboraga itorwa rya Perezida wa Sena, Perezida Paul Kagame yavuze ko ibibazo bya Congo byakomeje kwitirirwa u Rwanda, ariko ko igihe kigeze ngo rugaragaze neza ko ibi bibazo ari ibya Congo.

Yagize ati "Icya mbere, iki ntabwo ari ikibazo cy’u Rwanda, kandi tugiye guharanira ko buri wese abona ko atari ikibazo cy’u Rwanda, duhereye ku kuvuga ngo, abo batekereza ko iki ari ikibazo cy’u Rwanda aho kuba icya Congo, mbere na mbere bakure aba Banye-Congo hano."

Nyuma y’iri jambo, ibinyamakuru byinshi byavuze ko bisobanuye ko "u Rwanda rutazongera kwakira impunzi z’Abanye-Congo”, ibindi bitangaza ko “u Rwanda rushobora kwirukana impunzi z’Abanye-Congo."

Ni mu gihe ubugizi bwa nabi bukomeje muri RDC ndetse hari ubwoba ko bushobora kuvamo Jenoside yibasira Abatutsi n’abavuga Ikinyarwanda by’ubwihariko. Ku rundi ruhande, impunzi z’Abanye-Congo bari mu Rwanda bamaze iminsi basaba Guverinoma yabo kwita ku bibazo bafite.

Mu kiganiro yagiranye na BBC, Umuvugizi wugirije wa Guverinoma y’u Rwanda Alain Mukuralinda, yashimangiye ko u Rwanda ruzakomeza kwakira impunzi zose zaruhungiraho.

Yavuze ko no mu gihe yakoraga icyo kiganiro, iyo aramuka asabye raporo yari gusanga hari abamaze kwakirwa.

Yakomeje ati "U Rwanda rwubahiriza amasezerano mpuzamahanga, u Rwanda rwubahiriza amategeko agenga impunzi, kandi u Rwanda mu muco warwo nk’uko nabivuze ngitangira, twiteguye kwakira abantu bose batugana."

"Tuzakomeza kwakira impunzi, ariko tuzakomeza no gusaba umuryango mpuzamahanga, Guverinoma ya Congo [...] Biratangaje kuba mu myaka 20 ishize tutarigeze twumva Guverinoma ya Congo ivuga ku baturage bayo bari hano, mu gihe mu minsi ishize u Burundi bwohereje itsinda ry’abayobozi bakuru baje gusura inkambi zitandukanye z’impunzi z’Abarundi, babashishikariza gutaha."

Mukuralinda yavuze ko mu gihe u Burundi bwabikoze, Congo itigeze ibigerageza.

Yakomeje ati "Ibyo ntabwo babivuga, ahubwo bashishikajwe gusa n’u Rwanda na M23. Icyo ni igice kimwe cy’ikibazo, nk’uko nabivuze. Igihe ikibazo kidakemuwe haherewe mu mizi, bizamara indi myaka itanu cyangwa icumi."

"Muri make mu gushyira ibintu mu mucyo, u Rwanda ntabwo ruzigera rwanga kwakira impunzi, kandi u Rwanda ntabwo ruzigera rwirukana impunzi ku gahato, zizataha ari uko zumva hari umutekano."

Kugeza muri Gicurasi 2022, mu Rwanda hari impunzi 127.369, harimo Abanye-Congo 76,968 bangana na 60,43% n’Abarundi 49.859 bangana na 39,15%.

Mukuralinda yashimangiye ko u Rwanda rutazirukana impunzi z'Abanye-Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .