U Rwanda rwakoze umwitozo wo kugerageza ubushobozi mu gukumira icyorezo cya Coronavirus

Yanditswe na IGIHE
Kuya 13 Gashyantare 2020 saa 02:48
Yasuwe :
0 0

U Rwanda rwakoze umwitozo wabereye ku Bitaro Bikuru bya Gisirikare i Kanombe, ugamije kugerageza ubushobozi mu gukumira no guhangana n’icyorezo cya Coronavirus kiramutse kigeze mu gihugu.

Indwara ya Coronavirus ifatira mu myanya y’ubuhumekero igatera umusonga ari nawo wica umuntu, iheruka kugaragara mu Bushinwa, ariko kugeza ubu imaze gukwirakwira mu bihugu bitandukanye.

Imibare mishya igaragaza ko abamaze kuyandura mu Bushinwa ari 59.882 na 445 mu bindi bihugu, mu gihe abo imaze guhitana ari 1368 mu Bushinwa n’umwe mu mahanga. Abantu 5911 bo bamaze kuyikira basezererwa mu bitaro.

Imyitozo yakozwe kuri uyu wa Kane igamije kurebera hamwe uburyo hagize utahurwaho iyi ndwara yakwitabwaho ngo atanduza abandi, n’ingamba zakoreshwa ngo icyo cyorezo kidakwirakwira mu gihugu.

Minisiteri y’Ubuzima yavuze ko "Kugeza uyu munsi nta muntu uragaragaraho Coronavirus mu Rwanda."

U Rwanda rwashyizeho uburyo butandukanye bwo gupima umuriro abantu bavuye mu mahanga, no kumenya niba baragiye mu Bushinwa cyangwa ahandi hantu hagaragaye Coronavirus.

Minisiteri y’Ubuzima iheruka gusaba abakora ingendo mu mahanga gufata ingamba zikomeye zo kwirinda icyorezo cya Novel Coronavirus. Ibimenyetso by’iyi ndwara birimo kugira umuriro, gukorora no guhumeka nabi.

Umuntu yanduzwa Coronavirus n’uwayanduye. Yandurira mu mwuka wahumetswe n’uwakoroye ayanduye, iyo umuntu akoze ku wayanduye, iyo umuntu akoze ku kintu cyangwa ahantu hari iyo virusi noneho agakora ku munwa, ku izuru cyangwa ku maso mbere yo gukaraba intoki ndetse rimwe na rimwe ishobora kwandurira mu mwanda wo mu musarani.

Nta muti wihariye uvura iyo ndwara, igishoboka kugeza ubu kuyivura batanga imiti ifasha mu guhangana n’ibimenyetso byayo.

Minisiteri y’Ubuzima isaba abagenzi bajya mu bihugu byagezemo Coronavirus kwirinda kwegera amatungo (yaba amazima cyangwa ayapfuye), amasoko y’amatungo no kwegera ibiyakomokaho (nk’inyama zidatetse) no kwirinda kwegera umuntu warwaye Coronavirus.

Ibakangurira kandi gukaraba intoki bakoresheje amazi meza n’isabuni, utabibonye agakoresha umuti wica udukoko wabugenewe.

Inzego za Polisi n'Ingabo zikomeje kwitegura gutanga umusanzu igihe mu gihugu haramuka hagaragaye umuntu wanduye Coronavirus
Abantu bapimwa umuriro nka kimwe mu bimenyetso bya Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza