00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwakiriye inama mpuzamahanga yiga ku bukungu budahungabanya ibidukikije

Yanditswe na Ntabareshya Jean de Dieu
Kuya 6 Ukuboza 2022 saa 08:22
Yasuwe :

U Rwanda rwakiriye Inama Mpuzamahanga yiga ku guteza imbere ubukungu butangiza ibidukikije ku Isi (World Circular Economy Forum) ibereye muri Afurika ku nshuro yayo ya mbere, guhera ku wa Kabiri tariki ya 6 Ukuboza 2022.

Inzobere ziturutse mu bihugu bitandukanye zirungurana ibitekerezo ku guteza imbere uburyo bwo kunagura ibintu byakoreshejwe byafatwaga nk’imyanda kugira ngo bivanwemo ibikoresho bishya hirindwa ko byajugunywa bikangiza ibidukikije.

Minisitiri w’Ibidukikje, Mujawamariya Jeanne d’Arc, yavuze ko hari byinshi by’ingirakamaro bigomba kwigiurwa muri iyi nama kandi ko kwita ku bukungu budahungabanya ibidukikije bitanga n’impinduramatwara iganisha ku iterambere ry’imibereho myiza y’abaturage.

Ati “Urusobe rw’ibinyabuzima rufatiye runini serivisi zitandukanye ariko usanga ruri gukendera mu buryo bwihuse. Ibi bigira ingaruka zikomeye ku mibereho yacu mu byerekeye ubuzima n’ubukungu. Nidushyira mu bikorwa ibisubizo bizafatirwa muri iyi nama, dushobora kwirinda ibiza tunahanga imirimo mu buryo butangiza ibidukikije ubushomeri bukagabanuka.”

Minisitiri Mujawamariya yagaragaje ko u Rwanda ruhagaze neza mu guharanira imikoreshereze iboneye y’umutungo kamere warwo, habungwabungwa umutungo kamera w’amazi n’umwuka duhumeka, hashyirwaho uburyo buboneye bwo gukusanya no gutunganya imyanda no kugabanya imyuka ihumanya ikirere ariko yemeza ko hakenewe imbaraga za buri wese by’umwihariko urubyiruko.

Ati “Urubyiruko ruzwiho guhanga udushya n’ibitekerezo bizima. Ubukungu butangiza ibidukikije bushoboka ari uko abakiri bato bahawe ubushobozi, ibikoresho n’ubumenyi bikenewe. Ni byo, bakeneye kuzamura uburyo bw’imibereho yabo umunsi ku wundi ariko bakabikora mu nzira ziboneye.”

Umunyamakuru wibanda ku nkuru zirebana n’ Ibidukikije mu Rwanda, Nkurunziza Michel, yabwiye IGIHE ko hakenewe uruhare rw’itangazamakuru mu kumenyekanisha akamaro ko gushyira mu bikorwa ingamba zigamije guteza imbere ubukungu butangiza ibidukikije.

Ati “Uruhare rw’Itangazamakuru rurakomeye kuko hari ingamba zigenda zishyirwaho nko kurobanura imyanda ibora n’itabora no kuyitunganya. Kugira ngo abaturage babimenye birasaba itangazamakuru. Hakenewe inkuru zigisha abaturage uko ibintu byakagombye gukorwa ndetse no kugaragaza amahirwe ari mu kongera gukoresha ibintu byakoreshejwe bigatuma abashoramari bakanguka bakabyaza umusaruro ya myanda aho kugira ngo ibe umuzigo.”

Abahanga mu by’ubukungu bagaragaza ko uko imijyi igenda ikura, iterambere rikiyongera ari na ko n’imyanda ikomoka ku byo abaturage bakenera yiyongera bityo ko haba hakenewe uburyo bwo kubyaza umusaruro iyo myanda ikaba igisubizo aho kuba ikibazo ku iterambere ry’igihugu n’ibidukikije muri rusange.

Habyarimana Straton yabigarutseho agira ati “Nibyo byatangiye no gukorwa ariko biracyari ku rwego ruri hasi, biri gutanga umusaruro kandi mbibara nshingiye ku byo mbona. Urabizi ko hari uruganda ruri i Gahanga ya Kicukiro runagura ibikomoka kuri pulasitiki n’amashashi rukabikoramo ibindi bikoresho, biriya rero hatabayeho inganda zibinagura byatubera ibibazo kuko n’ubundi nta kindi twabimaza uretse kubikwirakwiza mu bidukikije cyangwa kubitwika.”

Muri iyi nama ba rwiyemezamirimo batandukanye hirya no hino ku Isi barasangiza abandi ubumenyi ku birebana n’ishoramari ritangiza ibidukikije binyuze mu bufatanye buhuriweho hibandwa mu gushaka ibikoresho bikenewe n’inzira nyazo abandi bakoresheje mu kugera ku iterambere ry’ubukungu budahungabanya ibidukikije.

Hakenewe uruhare rw’abikorera

Imbogamizi zikunze kugaragara mu guteza imbere ubukungu butangiza ibidukikije mu bihugu bya Afurika, ni ikibazo cy’amikoro make ndetse n’ubushake buke bwa politiki.

U Rwanda rwo rwamaze gutera intambwe ikomeye binyuze mu gushyiraho ingamba zorohereza abantu mu gukora ishoramari ribungabunga ibidukikije na gahunda yo guteza imbere ubukungu butangiza ibidukikije binyuze mu gushyiraho politiki, amategeko ndetse n’ingamba byorohereza abashaka gushora imari muri icyo cyerekezo cy’ubukungu.

Zimwe muri gahunda zatangijwe mu Rwanda zirimo gukusanya imyanda ikomoka ku bikoresho by’ikoranabuhanga ikabyazwa umusaruro, ibikomoka kuri pulasitiki nabyo byongera gukorwamo ibindi bikoresho by’ibanze ndetse no gutunganya imyanda ikabyazwamo ifumbire ikoreshwa mu buhinzi n’indi mishinga inyuranye igamije kubyaza imyanda umusaruro.

Umuyobozi Mukuru w’Urugaga rw’Abikorera mu Rwanda, PSF, Bafakulera Robert yabwiye IGIHE ko hakenewe uruhare rw’Abikorera mu ishoramari ritangiza ibidukikije cyane ko Leta yamaze kugaragaza ko ibashyigikiye.

Ati “Hari ibiri gukorwa dukoranye n’Ikigo cy’Igihugu gishinzwe kubungabunga ibidukikije (REMA) na Minisiteri y’Ibidukikije, hari abagenda bakora ibikorwa byo kongera kubyaza imyanda umusaruro mu buryo butandukanye by’umwihariko ibikomoka kuri pulasitiki bitari ku rwego rwo hejuru cyane. Ubundi abikorera 100% ni bo babikora leta yo iza iborohereza.”

Yagaragaje ko imbogamizi z’ihari zikizitira abikorera zishingiye ku mikoro, ibikoresho by’ibanze, kuba ari ishoramari ritagaragaza neza inyungu mu gihe vuba ndetse n’ikoranabuhanga mu kubyaza umusaruro ibyabonetse.

Umuyobozi Mukuru w’Urugaga rw’Abikorera mu Ntara y’Amajyaruguru, Mukanyarwaya Donatha yagaragaje ko abikorera bikwiye kugira uruhare mu gutunganya imyanda bakayibyaza umusaruro cyane ko imyinshi ituruka muri bo.

Yagaragaje ko hari imbogamizi ku bijyanye n’amahugurwa n’ubumenyi ku birebana no kubyaza umusaruro imyanda by’umwihariko itabora no kubona ibimoteri mu duce tunyuranye tw’ ku buryo bafashijwe kubona ubumenyi kuri byo bayoboka iri shoramari ku bwinshi.

U Budage buyoboye ibindi mu kubyaza umusaruro imyanda aho 67% byayo yongera ikabyazwa umusaruro mu gihe Autriche iri ku kigero cya 58%, Pays de Galles ari 52,2%, u Busuwisi buri ku kigero cya 49% na Koreya y’Epfo ifite 44,9%.

Buri mwaka ku Isi hajugunwa toni miliyari 2,1 z’imyanda aho buri muntu nibura ajugunya ibiro 20 buri kwezi. Igera kuri 16% ni yo ibasha gutunganywa.

U Rwanda rugiye kwakira inama mpuzamahanga yiga ku bukungu budahungabanya ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .