U Rwanda rwaje ku mwanya wa Kane muri Afurika n’uwa mbere mu karere mu kurwanya ruswa

Yanditswe na Rabbi Malo Umucunguzi
Kuya 23 Mutarama 2020 saa 10:57
Yasuwe :
0 0

Raporo y’Umuryango Mpuzamahanga ushinzwe kurwanya Ruswa n’Akarengane, Transparency International, igaragaza ko mu mwaka wa 2019 u Rwanda rwaje ku mwanya wa 51 ku Isi n’urwa kane muri Afurika mu kurwanya ruswa.

Muri raporo yamuritswe kuri uyu wa Kane, igaragaza ko u Rwanda rwagumye ku mwanya wa kane muri Afurika, naho muri aka karere ruguma ku mwanya wa mbere.

Gusa iyi raporo yerekana ko ku rwego rw’Isi, u Rwanda rwasubiye inyuma amanota atatu ndetse ruva ku mwanya wa 48 rugera ku wa 51, ugereranyije na raporo y’umwaka wa 2018.

Ibihugu bitanu bya mbere ku Isi ni Denmark, Nouvelle-Zélande, Finland, Singapore na Suède. Ibihugu bitanu bya nyuma byo ni Venezuela, Yémen, Syria, Sudani y’Epfo na Somalia.

Muri raporo y’uyu mwaka amanota yararumbye kuko mu bihugu 180 byakoreweho iyi raporo, bibiri bya gatatu bifite munsi ya 50%.

Mu Karere u Rwanda nirwo rufite hejuru ya 50%, kuko nka RDC ifite 18, Uganda ifite 28, Kenya ifite 28, u Burundi bufite 19 naho Tanzania ifite 37.

Umuvunyi Mukuru , Anastase Murekezi, yavuze ko umwanya u Rwanda rufite atari mubi, ariko unagaragaza ko ingamba zihari zikeneye kongerwamo imbaraga.

Yavuze ko uru rwego rurimo gutegura ubukangurambaga ku kurwanya ruswa n’akarengane, bwitezweho umusanzu mu kurwanya ruswa.

Umuyobozi wa TI Rwanda, Ingabire Marie Immaculée, yavuze ko ari umwanya wo kwisuzuma, hakarebwa niba nta hantu hakiri icyuho cya ruswa, ari naho hatumye u Rwanda rusubira inyuma.

Ati "Ntabwo dukorera amanota, kuko hano nta wirukanwa, ntawe usibira, ariko ibi ni ibipimo bigomba kutwereka ngo ese twishimiye kuguma aha? Oya, turashaka gutera indi ntambwe."

Umuyobozi Nshingwabikorwa wa TI Rwanda, Apollinaire Mupiganyi, yavuze ko u Rwanda rukeneye kongera imbaraga mu kurwanya ruswa, kuko nk’ibihugu biza kurwigiraho nabyo biba bikeneye gutera intambwe, ari nayo mpamvu imyanya ibihugu biriho ihindahurika.

Iyi raporo ngarukamwaka ya Transparency International, yakozwe hasesengurwa raporo kuri ruswa, mu bihugu 180.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .