U Rwanda rwagarutse ku gihombo rushobora guhura nacyo kubera icyorezo cya Coronavirus

Yanditswe na Habimana James
Kuya 24 Gashyantare 2020 saa 05:01
Yasuwe :
0 0

Guverinoma y’u Rwanda ivuga ko mu gihe icyorezo cya Coronavirus cyaba kitaranduwe mu maguru mashya, ubukungu bw’igihugu n’Isi muri rusange bushobora kuhahungabanira.

Kugeza ubu Isi ihangayikishijwe bikomeye n’icyorezo cya Coronavirus, cyagaragaye bwa mbere mu Mujyi wa Wuhan, mu Ntara ya Hubei yo mu Bushinwa mu mpera z’umwaka ushize.

Iki cyorezo kimaze kwinjira mu mibiri y’abantu basaga 79 550 ku Isi hose, muri bo abasaga 2 610 kikaba kimaze kubahitana.

Kugeza ubu ku masoko y’imari n’imigabane azwiho kuba ikimenyetso cy’uburyo ubukungu bw’ibihugu buhagaze ku Isi, hagaragaye gusubira inyuma guhambaye mu bikorwa byayo, abasesenguzi bagahamya ko biri guterwa no kwiyongera kw’icyorezo cya Coronavirus.

Ibi akenshi biraterwa n’uko u Bushinwa ari kimwe bihugu bikomeye mu bijyanye n’ubucuruzi ku Isi.

Perezida w’Urugaga rw’Abikorera mu Rwanda, Robert Bapfakurera, aherutse kubwira IGIHE ati “Ibicuruzwa dutumiza mu Bushinwa cyane cyane ni imyenda n’inkweto ndetse n’ibindi byo gukoreshwa mu ngo, ni byinshi biri kuri 80%.”

Nko muri Afurika gusa, imibare igaragaza ko ishoramari ry’iki gihugu mu bihugu biri munsi y’u Butayu bwa Sahara kuva mu 2005 kugera mu 2018, ryageraga kuri miliyari 299 z’amadorali ya Amerika.

By’umwihariko umubano w’u Rwanda n’u Bushinwa wo umaze imyaka irenga 48.

Mu myaka itanu ishize, imishinga irenga 50 y’Abashinwa yaje ku isoko ry’u Rwanda, ifite agaciro ka miliyoni 250 z’amadorali ya Amerika.

Mu Ugushyingo 2019, u Rwanda rwavugaga ko rwiteguye kujya rubona ishoramari ry’Abashinwa rigera kuri miliyoni 100 z’amadorali buri mwaka, avuye kuri miliyoni 59.1 z’amadorali rwariho mu 2018.

Nyuma y’aho iki cyorezo gitangiye kwibasira u Bushinwa mu Ukuboza 2019, Sosiyete Nyarwanda ikora ubwikorezi, RwandAir, ni imwe muri nyinshi zahise zihagarika by’agateganyo ingendo ziva n’izijya i Guangzhou mu Bushinwa.

U Rwanda rubona gute ikibazo cya Coronavirus?

Minisitiri w’Imari n’Igenamigambi, Dr Uzziel Ndagijimana, yabwiye abagize Inteko Ishinga Amategeko ko mu gihe iki kibazo cyaba gikomeje kwibasira u Bushinwa, u Rwanda narwo rushobora kuhahombera.

Ibi yabigarutseho kuri uyu wa Mbere tariki 24 Gashyantare 2020, ubwo yagezaga ku Nteko Rusange y’Umutwe w’Abadepite impinduka z’ingenzi zikubiye mu ivugururwa ry’ingengo y’imari ya 2019/2020.

Depite Frank Habineza yabajije Dr Ndagijimana uko u Rwanda rwiteguye guhangana n’ingaruka z’icyorezo cya Coronavirus mu bijyanye n’ubukungu.

Yagize ati “Kubera Virus ya Coronavirus ubucuruzi burimo gusubira inyuma byaba mu Bushinwa no mu bindi bihugu, nubwo turimo kwirenganziza na hano bizatugeraho, twe twiteguye gute mu rwego rw’ubukungu?.”

Dr Ndagijimana yavuze ko ku buhahirane bishobora kugira ingaruka kuko zizagera ku bukungu bw’u Bushinwa ubwabwo, mu gihe iki ari igihugu gihahirana n’Isi yose.

Yavuze ko iyo ubukungu bw’iki gihugu bwazamutse aba ari amahirwe ku bindi bihugu, cyane ko iki gihugu gikenera ibicuruzwa byinshi kigura hanze yacyo harimo n’ibyo gikoresha mu nganda.

Yagize ati “Na mbere y’uko iki cyorezo cyiza umuvuduko w’ubukungu bw’u Bushinwa wari waramanutse gato, ku buryo icyo gihe hari impungenge ku bindi bihugu.”

Ati “Murabizi ko iki ni igihugu gicuruzanya n’Isi yose, mu rwego rw’imihahiranire bifite ingaruka, nta wamenya uko izaba ingana bizaterwa n’igihe iki cyorezo gishobora kumara.”

Yavuze ko kugeza ubu amakuru ahari ni uko u Bushinwa burimo kurwana n’iki cyorezo mu buryo bukomeye, abandura bashya bakaba bagenda bagabanuka.

Yatangaje ko “Ingaruka ku bukungu bw’Isi no ku Rwanda bizaterwa n’igihe bizamara, biramutse bitinze cyane byagira ingaruka ku mihahirane byaba ibyo twoherezayo n’ibyo tugurayo.”

U Rwanda rwiteguye gukora iki?

Dr Ndagijimana yavuze ko iki kibazo kiramutse gikomeje, bisaba ko u Rwanda rwashaka andi masoko yagutse, bitari ugucungira ku isoko rimwe kugira ngo bagabanye uburemere bw’ikibazo.

Avuga ko u Rwanda rukunze guhahirana cyane n’ibihugu bituranye ku bintu byinshi, gusa akagaragaza ko igihugu cy’u Bushinwa aricyo gihugu bavanayo ibintu byinshi.

Ati “Icyo cyorezo gitinze byasaba ko abantu bagenda bashyira ingufu mu yandi masoko bitari u Bushinwa gusa.”

Abacuruzi batangiye gutekereza andi masoko

Umuyobozi Mukuru w’ikigo Heart of Africa Trading (H.A.T) Ltd, gifasha mu gutumiza ibicuruzwa mu Bushinwa, kikagira ibiro i Kigali na Guangzhou, Izabiriza Jeanne, aherutse kubwira IGIHE ko abacuruzi bakomeje kugira impungenge.

Bitewe n’uko icyorezo cya Coronavirus cyatangiye u Bushinwa bwinjiye mu kiruhuko, nta bintu byari birimo gutumizwa muri aya mezi, ariko nk’ibyari mu nzira bifite ingorane.

Ati “Icyo twari dufite ni kontineri ziri mu nzira, ariko nta makuru ahagije dufiteho kuko bayaguha zigiye kugera Dar es Salaam, ariko ubu nta bantu barimo kujya mu biro, byose birafunze, ubu abantu bari mu rugo.”

“Gutumiza ibindi bintu byagombaga kubaho nyuma y’ikiruhuko cyo mu Bushinwa, nyuma rero ntabwo barasubira mu kazi, ubu kontineri zirimo kuza nabwo ntabwo dushobora kubona amakuru yose, ubu urazireba ukabona aho zigeze ariko turavugana naho, ntabwo byoroshye mbese.”

Avuga ko niba nta gihindutse mu Bushinwa, abacuruzi bazashaka andi masoko nka Dubai, ariko ho ibintu birahenze kurusha mu Bushinwa ku buryo bishobora kugira ingaruka ku biciro ku isoko.

Ni ingingo ahurizaho na Bapfakurera uyobora PSF. Yagize ati “Itandukaniro ni uko Dubai hari isoko rinini, ariko ibicuruzwa byaho biba bihenze kurusha ibyo mu Bushinwa. Nibikomeza ni ukuvuga ngo dushobora gushakira mu Buhinde ibintu bimwe na bimwe, muri Turikiya, ni byo bihugu dukunze gucuruzanya.”

Kugeza ubu abantu batari bake bakomeje kwibaza ubushobozi bw’ubukungu bw’isi mu guhangana n’ingaruka za Coronavirus.

Ikibazo kigiteye impungenge ubu ni ukumenya igihe icyorezo cya Coronavirus kizamara ndetse n’umubare w’abazacyandura ku isi, nyuma yo kugaragaza ubukana bwacyo ko bukomeye.

Icyorezo cya Coronavirus gihangayikishije Isi kubera ibihombi gishobora gutera ku bukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza