U Rwanda rwafashe ingamba zikumira akato kahabwaga amabuye y’agaciro yarwo

Yanditswe na Evariste Nsengimana
Kuya 27 Ukwakira 2019 saa 09:01
Yasuwe :
0 0

Guverinoma y’u Rwanda yatangaje ko yafashe umwanzuro wo kongera imikoranire hagati y’ibigo bicukura n’ibicuruza amabuye y’agaciro byayo n’ibyo mu bihugu bihana imbibi kugira ngo amabuye yarwo atazongera guhabwa akato ku rwego mpuzamahanga nk’uko byigeze kubaho mu myaka yashize.

Mu myaka isaga 10 ishize abakora mu rwego rw’ubucukuzi n’ubucuruzi bw’amabuye y’agaciro acukurwa mu Rwanda bakunze guhura n’imbogamizi aho bayashoraga mu mahanga bamwe bakayitirira ko yibwa muri Repubulika Iharanira Demokarasi ya Congo (RDC).

Byigaragaje cyane nyuma y’aho abakuru b’ibihugu by’Akarere k’Ibiyaga bigari bemereje ko amabuye y’agaciro arimo Coltan, Gasegereti na Wolfuram, aboneka cyane mu Burasirazuba bwa RDC nka kimwe mu bizanira amafaranga imitwe yitwara gisirikare mu karere igakomeza guteza umutekano muke.

Ibi byatumaga akumirwa ku isoko mpuzamahanga cyane cyane ku Mugabane w’u Burayi na Amerika, n’aho yemewe akagurwa ku giciro kibi bikababuza icyashara ku isoko mpuzamahanga cyangwa banayagurisha bikabasigira igihombo.

Umuyobozi w’Ikigo cy’Igihugu gishinzwe Mine, Peteroli na Gaz (RMB) Gatare Francis, yavuze ko Guverinoma yashyizeho ingamba zigamije gukumira ko hari amabuye y’agaciro acukurwa mu Rwanda azongera gushyirwa mu kato.

Yabikomojeho kuri uyu wa 26 Ukwakira ubwo yabwiraga itangazamakuru ibizaganirwaho mu nama mpuzamahanga yiga ku bucukuzi bw’amabuye y’gaciro u Rwanda ruzakira ku wa 28-29 uku Kwezi.

Gatare yavuze ko Ihuriro ry’abacukuzi b’amabuye y’agaciro mu Rwanda ari ikigo gikorana n’urugaga rw’abikorera rufite amashami atandukanye arimo iry’inganda ribarizwamo iby’amabuye y’agaciro ku buryo byoroha gukurikirana ikibazo gifitanye isano nabwo.

Yavuze ko PSF nayo ibarizwa mu nama y’umuryango wa Afurika y’Iburasirazuba nayo ikagira ishami ry’ubucukuzi bw’amabuye y’agaciro, bityo ayo mahuriro bikayorohera gukorana n’andi yo mu Karere mu gukemura imbogamizi zihaba.

Ati “Ku bihugu bitari ibyo muri EAC niho Ihuriro rigerageza gushyiraho umubano hagati yabyo kuko atari uburyo buteganywa n’amategeko. Bakorana bya hafi n’ishami ry’ubucukuzi urugero nk’iryo muri Repibulika Iharanira Demokarasi ya Congo.”

Gatare yavuze ko mu nama igiye kuba hari ibigo bitandukanye bizatumurwa bicukura amabuye y’agaciro bifite amahuriro bibarizwamo aho byaturitse kugira ngo binoze imikoranire.

Ati “Icyo tugamije gukora nka guverinoma ni ukwizera ko ibigo by’ubucukuzi bw’amabuye y’agaciro mu Rwanda bigira imikoranire ya hafi n’ibyo mu bihugu byo mu Karere ku mpamvu zitandukanye.”

Yakomeje agira ati “Imwe ikomeye ni ukugira ubucuruzi bw’amabuye y’agaciro bwemewe kugira ngo twizere ko tuvanyeho akato kamazeho imyaka 10 k’amabuye y’amibano n’amakimbirane mu bucukuzi bw’amabuye y’agaciro muri aka Karere.”

Yavuze ko muri iyi nama hazanaganirwa byihariye ku mategeko n’amabwiriza byihariye bigamije guhashya ubujura bw’amabuye y’agaciro mu rwego rwo kwizera ko abayacukura bose bafite ibyangombwa bituma adakumirwa ku isoko mpuzamahanga cyangwa ngo yitiranywe n’amibano.

Mu mwaka w’ingengo y’imari wa 2018/2019 u Rwanda rwasaruye miliyoni zisaga 350$ mu bikorwa by’ubucukuzi bw’amabuye y’agaciro.

Miliyari ziri hagati 8-10$ zishorwa mu bikorwa by’ubucukuzi bw’amabuye y’agaciro ku Isi nibura 50% byayo ashorwa ku mugane wa Afurika mu gihe uwo mugabane wikubiye hejuru ya 60% by’amabuye y’agaciro yose agaragara ku Isi.

Inkuru wasoma: U Rwanda rwahakanye kuba icyambu cya zahabu icukurwa muri RDC

Mu Rwanda hasigaye hari uruganda rutunganya zahabu ku buryo yoherezwa mu mahanga imeze neza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .