U Rwanda ruteganya gutangiza imurika rigezweho ry’indege

Yanditswe na Rabbi Malo Umucunguzi
Kuya 28 Gashyantare 2019 saa 07:43
Yasuwe :
0 0

Umunyamabanga wa Leta muri Minisiteri y’Ibikorwa Remezo Ushinzwe Ubwikorezi, Eng. Uwihanganye Jean de Dieu, yavuze ko u Rwanda rwifuza gutegura imurika ry’indege rizajya ryitabirwa n’ibigo byinshi, rikagera ku rwego indege zizajya ziyereka zinaguruka.

Amamurika akomeye ku Isi y’indege arimo Le Bourget ry’i Paris, rikurikirwa n’irya Farnborough mu Bwongereza n’irya Dubai.

Kuri uyu wa Kane nibwo inzego zitandukanye zitabiriye imurika rito ry’indege ku Kibuga Mpuzamahanga cy’Indege cya Kigali, aho aba bashyitsi bari mu Rwanda mu inama y’iminsi ibiri yiga ku iterambere ry’iby’indege muri Afurika, Aviation Africa Summit and Exhibition.

Eng. Uwihanganye yavuze ko icyifuzo gihari ari uko iyi nama yahinduka ahantu ho kugaragaza ibikorwa bigezweho mu bijyanye n’indege, ibihugu bya Afurika bikajya bihurira mu Rwanda bigaragaza aho bigeze.

Ati “Kugira imurika mu bijyanye n’uru rwego rw’indege bigaragaza intambwe turimo gutera tugana ku ntego twihaye nk’u Rwanda yo kuba igicumbi cy’ibijyanye na serivisi z’indege muri Afurika. Inama nk’iyi yitabiriwe n’ibihugu 71, ibigo bisaga 80 bitanga serivisi z’indege birimo kumurika ibyo bikora harimo n’izi ndege, uyu munsi turimo gukora imurika izi ndege zihagaze ariko ubutaha twifuza gutangiza imurika noneho ziguruka.”

Yavuze ko ibyo bikorwa byose bizagirira akamaro igihugu binyuze mu guhanga imirimo, guteza imbere ubukungu n’ibindi.

Yakomeje ati “Iyi ntambwe ya mbere turifuza kuyongerera imbaraga, dushaka guteza imbere iri murika tukongera umubare w’indege, ubu hano dufite indege ebyiri zitwara abantu ku giti cyabo (private jets), kajugujugu eshatu, ariko ubutaha turashaka kuzongera.”

Yavuze ko iyi nama nyafurika mu by’indege izajya iba rimwe mu myaka ibiri, ku buryo mu 2021 hari ikintu kiziyongeraho ugereranyije n’uyu mwaka. Umwanya nk’uyu kandi ni n’ahantu abatanga serivisi z’indege n’abazikeneye bahurira, bakaba bahanga ubucuruzi bushya hagati yabo.

Indege za Gulfstream zagaragaje ibishya

Ikigo Gulfstream Aerospace cy’Abanyamerika, gifite indege ebyiri cyamurikaga zo mu bwoko bwa G500 na G280 zifite ikoranabuhanga rya vuba.

Visi Perezida wa Gulfstream ushinzwe ubucuruzi muri Afurika, Marc Strange, yavuze ko iri murikagurisha ari amahirwe yo kugaragaza ibyo bakora n’ikoranabuhanga rigezweho mu bijyanye n’indege.

Ati “Indege turimo kumurika zirimo G 500 ifite ikoranabuhanga rigezweho, yabonye ibyangombwa byo gukora umwaka ushize muri Nyakanga, itangira gutangwa muri Nzeri umwaka ushize. Izi ndege ni nk’izikoreshwa n’ikigo Qatar Executive (gishamikiye kuri Qatar Airways ariko gikora ingendo zihariye), tukaba dutewe ishema no kumurika G500 bwa mbere muri Afurika.”

Iyi ndege ifite ubushobozi bwo gutwara abantu umunani bashobora kugera kuri 19, ishobora kugenda idahagaze km 9,630 ikava nka Istanbul ikagera Cape Town muri Afurika y’Epfo, ikava Los Angeles ikagera i Londres, cyangwa igahuza San Francisco na Tokyo. Ishobora gukoresha umuvuduko wo hejuru ushobora kugera ku 1000 km/h.

Ifite ubugari bwa metero 2.41 n’ubuhagarike bwa metero 1.93. Uburebure bwo mo imbere ni metero 12.65.

Indi ndege iki kigo cyamurikiraga i Kigali ni G280, ifite imyanya icyenda y’abantu baba bicaye bisanzuye, ishobora gukora ingendo ndende zishoboka mu buryo budahenze, yemewe nka ‘super-midsize class leader’.

Iyi ishobora gukora urugendo rurerure rwa km 6,667 idahagaze, igatwara abagenzi bagera ku 10, ikagendera ku muvuduko wa 1049.58 km/h. Iyi ndege ishobora gukoresha benzene nke inshuro 12 ugereranyije n’indege zo mu rwego rwayo igihe izamuka.

Strange yakomeje ati “Niba ushaka ko ubucuruzi bwawe bugenda neza ugomba kwegereza isoko ibyo ukora, ari nabyo turimo hano.”

Iki kigo ubu gifite indege zigera kuri 50 muri Afurika yo munsi y’ubutayu bwa Sahara n’izigera kuri 80 muri Afurika yose. Nibura indege ya G500 ishobora kugurwa miliyoni $43.5 mu gihe G280 yo igurwa $24.5.

Minisitiri Ushinzwe Ubwikorezi muri Sierra Leone, Kabineh Kallon, yavuze ko ibikorwa nk’ibi ari ingirakamaro kuko bituma ibihugu byigiranaho ibijyanye na serivisi n’ikoranabuhanga rigezweho mu bijyanye n’indege.

Ati “Ibyo mbona bisa n’ibyo umuntu aba asanzwe areba muri filime, ni ibintu bikomeye ku buryo mvuga nti ‘iyo mba mfite amafaranga ngo ngurire [indege] imwe igihugu cyanjye.”

Mu bindi bigo byamuritse indege harimo Akagera Aviation, itanga serivisi z’ingendo z’indege mu gihugu, guhugura abapilote no kwigisha gutwara indege.

Abayobozi batandukanye basuye imurika rito ry'ibijyanye n'indege
Basobanuriwe iiterere y'indege ya G500
Ni indege nto ariko ugendamo uhagaze wemye
Umwe mu basuye izi ndege yitegereza uko hanze hameze
Eng. Uwihanganye aganira na Visi Perezida wa Gulfstream ushinzwe ubucuruzi muri Afurika, Marc Strange
Ni indege yagenewe abanyacyubahiro, bicaramo bakisanzura
Yafashe agafoto k'urwibutso
Marc Strange yagaragaje ko indege ya G500 ishobora gukora urugendo rurerure cyane idahagaze
Abashyitsi bamaze gusura G500
G280 nayo ni indege igezweho ya Gulfstream
Iyi ndege na yo irisanzuye
Ifite ikoranabuhanga rigufasha kureba mu gice wifuza
Akagera Aviation nayo yamuritse kajugujugu
Visi Perezida wa Gulfstream ushinzwe ubucuruzi muri Afurika, Marc Strange, yavuze ko iri murikagurisha ari amahirwe yo kugaragaza ibyo bakora n’ikoranabuhanga rigezweho mu bijyanye n’indege
Izi kajugujugu zibamo ibikoresho by'ubutabazi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza