00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rumaze guha akazi abarimu ibihumbi 52 mu myaka ibiri

Yanditswe na Igizeneza Jean Désiré
Kuya 21 Ukuboza 2022 saa 08:23
Yasuwe :

Kuva mu 2020 Leta y’u Rwanda ku nkunga ya Banki y’Isi binyuze mu mushinga wayo wo gufasha uburezi bw’ibanze (Rwanda Quality Basic Education for Human Capital Development Project), imaze guha akazi abarimu n’abayobozi b’ibigo by’amashuri barenga ibihumbi 52 bazafasha mu kuzamura ireme ry’uburezi muri rusange.

Ibi byajyanye n’amahugurwa yatanzwe ku barimu bo mu mashuri abanza 12,520, amahugurwa ajyanye na porogaramu z’ikoranabuhanga zizabafasha mu myigishirize yabo harimo porogaramu izwi nka ‘Microsoft Innovative Educators’.

Abarimu bo mu cyiciro cya kabiri cy’amashuri abanza kugeza ku bo mu cyiciro rusange bigisha Imibare n’Ubumenyi nabo bahuguwe ku bijyanye n’uburyo bwo kwigisha hashingiwe ku dushya twibanda kuri aya masomo.

Kugeza ubu u Rwanda rumaze gutera intambwe ishimishije ku bijyanye no kugeza uburezi bw’ibanze kuri bose, gusa ubwiyongere bw’abagana ishuri bwatumye hasabwa kubaka andi mashuri ndetse n’ibindi bikorwaremezo bijyana na yo hatibagiwe no kongera abarimu.

Umuhuzabikorwa w’Imishinga mu Rwego rw’Igihugu rushinzwe Uburezi bw’Ibanze REB, Shyaka Emmanuel, yavuze ko guha akazi aba barimu ari igikorwa kizafasha ibigo mu kuziba ibyuho bijyanye n’umubare w’abanyeshuri biyongereye.

Ati “Kubera ko buri mwaka tuba twiteze ko umubare w’abanyeshuri bagana ishuri wiyongera, ibigo bifite mu nshingano gutanga akazi ku barimu bigomba guteganya ko hagomba gukenerwa abarimu benshi mu bigo.”

Muri iki gihe abarimu bigisha ibijyanye na siyansi n’Ikoranabuhanga, STEM bahawe mudasobwa 3,128 na porojegiteri 3,128, ibikoresho bizabafasha mu kongera ubumenyi batanga.
Ibigo bya leta n’ibifashwa na yo na byo byahawe mudasobwa 3,840 mu gihe mudasobwa 2,585 zahawe abarimu bo mu mashuri nderabarezi, TTC, Ibigo by’icyitegererezo n’amashuri agezweho (smart classrooms) hamwe n’aabahugura abanda mu bigo bitandukanye.

Shyaka ati “Turateganya no gutanga mudasobwa zirenga ibihumbi 20 ku barimu bo mu mashuri abanza.”

Umwe muri aba barimu bahawe akazi mu kwigisha Ubumenyi n’Ikoranabuhanga n’Imibare ku Rwunge rw’Amashuri rwa Akumuniho rwo mu Karere ka Nyarugenge, Mukayisenga Julienne yavuze ko yiteguye gutanga umusanzu ku iterambere ry’Uburezi mu Rwanda.

Yavuze ko hashize amezi make kuva atangiye kwigisha yemeza ko yanaje mu gihe cyiza aho abarimu bongerewe umushahara.

Ati “Nubwo aka kazi nanjye nzakungukiramo ubundi bumenyi, niteguye gutanga umusanzu mu burezi binyuze mu kwigisha abanyeshuri banjye mbinyujije mu dushya dutandukanye tuzabafasha kunguka ubumenyi n’ikinyabupfura.”

Umuyobozi w’Urwunge rw’Amashuri rwitiriwe Mutagatifu Jean de la Mennais rwa Kirambo mu Karere ka Burera, Nduwamungu Evariste yavuze ko ibikoresho by’ikoranabuhanga bahawe bigiye kubafasha mu burezi bwa buri munsi batanga.

Yemeje ko nk’ikigo ngenderwaho gikwiriye kuba intangarugero mu gutanga uburezi bufite ireme, ahamya ko ibikoresho bahawe bizafasha abarimu b’iki kigo abereye umuyobozi kuzamura uburyo bw’imyigishirize, ibizafasha abanyeshuri kuzagira icyo bimarira mu bihe biri imbere.

Ati “Turashimira Leta y’u Rwanda n’abafatanyabikorwa bayo, ku bufatanye bakomeje kugaragaza mu guteza imbere urwego rw’uburezi, natwe twiyemeje kongera imbaraga ku buryo tuzagera ku musaruro wisumbuye.”

Uyu mushinga kandi ufite intego yo gushyigikira uburyo bushya bwimakajwe na leta bwo gufasha abana bo mu cyiciro cya mbere cy’amashuri abanza n’ay’inshuke ku buryo bazajya biga mu buryo bugezweho, ibizabafasha gukomeza mu byiciro byisumbuye bafite ubumenyi buhagije.

Mu gushyira mu bikorwa iyi gahunda, amashuri y’inshuke ya leta n’afashwa na yo 2603 bahawe ibitabo by’abanyeshuri n’iby’abarimu babo ibihumbi 647 ndetse yubakirwa amashuri 3,840 arimo ibikoresho byose bikenerwa n’abana kugira ngo bige neza.

Uyu mushinga kandi wafashije mu kubaka amashuri agezweho 11,004 hamwe n’ubwiherero 14,680.

Ibi byose bingana na kimwe cya kabiri cy’ibyari byubatswe na Leta ubwayo mu kugabanya ubucucike bw’abanyeshuri no kugabanya intera bakoraga bagana ishuri. Muri rusange hubatswe amashuri 22,505 n’ubwiherero 31,932.

Biteganyijwe ko uyu mushinga uzamara imyaka itanu, ukazatwara miliyoni 200$ yatanzwe na Banki y’Isi ukazashyirwa mu bikorwa na Minisiteri y’Uburezi, Urwego rw’Igihugu rushinzwe Uburezi bw’Ibanze, REB n’Ikigo cy’Igihugu gishinzwe Ibizamini n’Ubugenzuzi bw’Amashuri, NESA.

U Rwanda ruherutse gusinyana amasezerano na Banki y’Isi afite agaciro ka miliyoni 129.062$ agamije kongera igihe uyu mushinga uzamara ku buryo wazageza mu 2017.

Akubiyemo miliyoni 50$ z’inguzanyo n’izindi miliyoni 50$ by’inkunga ndetse na miliyoni 29.062$ z’inkunga yatanzwe n’Umuryango Mpuzamahanga wita ku Bufatanye mu Burezi (Global Partnership for Education:GPE).

Kugeza ubu u Rwanda rumaze gutera intambwe ishimishije ku bijyanye no kugeza uburezi bw’ibanze kuri bose
Umuhuzabikorwa w’Imishinga mu Kigo cy’Igihugu gishinzwe Uburezi bw’Ibanze REB, Shyaka Emmanuel, yavuze ko guha akazi aba barimu ari igikorwa kizafasha ibigo mu kuziba ibyuho bijyanye n’umubare w’abanyeshuri biyongereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .