U Rwanda rugiye kwizihiza umunsi w’ururimi kavukire hazirikanwa ururimi shami rw’Ururashi

Yanditswe na Nkurunziza Ferdinand
Kuya 19 Gashyantare 2020 saa 09:46
Yasuwe :
0 0

Buri mwaka tariki ya 21 Gashyantare, hizihizwa umunsi mpuzamahanga wahariwe ururimi kavukire. U Rwanda rugiye kwizihiza uyu munsi ruha umwanya Ururimi shami rw’ikinyarwanda rukoreshwa mu karere ka Kirehe ruzwi nk’Ururashi”.

Ibirori byo kwizizihiza uyu munsi ku nshuro ya 17 bizabera mu Karere ka Kirehe, ahakoreshwa cyane “Ururashi”, ku nsanganyamatsiko igira iti “Dukoreshe Ikinyarwanda kinoze twese”.

Mu Rwanda, kwizihiza umunsi Mpuzamahanga w’Ururimi Kavukire bigamije kurengera ubusugire bw’Ikinyarwanda nk’ingobyi y’umuco n’ubumwe by’abanyarwanda, kugihesha agaciro nk’ururimi ruhuza Abanyarwanda no gukangurira Abanyarwanda b’ingeri zose gukunda, kuvuga neza, kwandika neza, guhanga mu Kinyarwanda no gusigasira indimi shami.

Uyu mwaka, kwizihiza Umunsi Mpuzamahanga w’Ururimi Kavukire bijyanye no kurushaho kwita ku Kinyarwanda, gutekereza ku kamaro kacyo, buri wese agahagurukira kugikoresha neza mu byo avuga no mu byo yandika.

Inteko Nyarwanda y’Ururimi n’Umuco irashishikariza abanyarwanda by’umwihariko urubyiruko gusigasira Ikinyarwanda nk’umurage ntagereranywa ndetse bakamenya ubukungu bukubiye muri uru rurimi.

Kwizihiza uyu munsi ku rwego rw’iguhugu bizakorerwa mu karere ka Kirehe ndetse no mu midugudu yose y’u Rwanda hagamijwe gusigasira “Ikinyarwanda nk’ingobyi y’umuco.”

Mbere y’itariki ya 21 Gashyantare, hateganyijwe ibikorwa bitandukanye birimo ibiganiro mu mashuri, ku maradiyo na televiziyo ndetse n’amarushanwa ku Kinyarwanda mu mashuri yisumbuye.

Ishami ry’Umuryango w’Abibumbye ryita ku Bumenyi, Uburezi n’Umuco (UNESCO) ni ryo ryashyizeho Umunsi Mpuzamahanga w’Ururimi Kavukire mu 1999 nk’uko bigaragara mu mwanzuro 30C/62 w’Inama Rusange yaryo yo mu kwezi k’Ugushyingo 1999.

Inama Rusange y’Umuryango w’Abibumbye na yo mu mwanzuro wayo A/RES/61/266 wo muri Gicurasi 2000, yashyigikiye ko buri tariki ya 21 Gashyantare hazajya hizihizwa uyu munsi.

Ibi byakozwe mu rwego rwo gushyigikira indimi z’abatuye isi kubera ko hari izigenda zicika cyangwa zikazimira kandi zihatse ubumenyi butandukanye no guteza imbere ubusabane n’ubumwe by’abatuye isi kuko ururimi kavukire ari umuyoboro w’ubumwe n’ubusabane bw’abatuye igihugu.

Mu Rwanda, Ikinyarwanda cyemewe n’Itegeko Nshinga nk’ururimi rw’igihugu ndetse n’urw’ubutegetsi. Indirimbo yubahiriza igihugu na yo irubona nk’umurunga ubumbatiye ubumwe bw’Abanyarwanda, aho igira iti “…Ururimi rwacu rukaduhuza…”

Abana bagomba gutozwa kuvuga, kwandika no gusoma ururimi kavukire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .