U Rwanda rugiye kwakira inama yiga ku guhuza indangagaciro za Bibiliya n’imiyoborere muri Afurika

Yanditswe na Akayezu Jean de Dieu
Kuya 23 Ukwakira 2019 saa 08:32
Yasuwe :
0 0

Mu Rwanda hagiye kubera Inama Mpuzamahanga y’Umuryango wa Bibiliya muri Afurika, ABLI [The African Biblical Leadership Initiative], izahuriza hamwe abayobobozi mu nzego za leta n’abayobora imiryango ya Bibiliya hirya no hino baganira ku buryo indangagaciro za Bibiliya zishobora gufasha mu miyoborere ya Afurika.

Iyi nama izakirwa n’Umuryango wa Bibiliya mu Rwanda (Bible Society of Rwanda], iteganyijwe kuba hagati ya 23 na 25 Ukwakira 2019, aho izabera muri Kigali Convention Center mu Mujyi wa Kigali.

Mu munsi ine igomba kumara harimo umwe wihariye ku rubyiruko wabaye ku wa 19 Ukwakira muri Kaminuza y’u Rwanda ishami rya Huye n’indi minsi itatu yikurikiranya ya ABLI Forum, iteganyihjwe gutangira kuri uyu wa Gatatu.

Biteganyijwe ko iritabirwa n’abayobozi, abagore n’abagabo baturutse muri Afurika no hanze yabo.

Insanganyamatsiko yayo mu magambo y’icyongereza ivuga ko “From Trauma to Triumph: Synergizing Leadership for Healing and Harmony”, bishatse kuvuga ugenekereje mu Kinyarwanda ngo
“Kuva mu ihungabana kugera ku ntsinzi; Guhuriza hamwe ubuyobozi bugamije gukiza no kubanisha abantu mu mahoro”.

Abazitabira bazasangizwa inzira y’u Rwanda y’ubumwe n’ubwiyunge no kwiyubaka rukaba intangarugero mu mibereho n’imiyoborere myiza nyuma ya Jenoside yakorewe Abatutsi mu 1994.

Abazitabira iyi nama bazaba baturutse mu bihugu 25 byo hirya no hino ku Isi barimo Abayobozi b’Imiryango ya Bibiliya mu bihugu byabo, Abahagarariye za Guverinoma, Abafata ibyemezo n’abavuga rikumvikana, Imiryango itari iya Leta, abarimu n’abashakashatsi.

Hazaba harimo kandi Abayobozi b’Amatorero, Amadini n’Imiryango ishingiye ku myemerere, abanyamakuru n’abazatanga ibiganiro baturutse muri Afurika no hirya yaho.

Mu bazatanga ibiganiro harimo Rt Lord Paul Boateng, wigeze guhagararira u Bwongereza muri Afurika y’Epfo akaba ari n’umwe mu bagize urwego rufatwa nk’Abasenateri muri iki gihugu.

Biteganyijwe kandi ko n’ Umuvugabutumwa akaba n’Umuyobozi w’Itorero Saddleback ryo muri Leta Zunze Ubumwe za Amerika, Richard Duane Warren, uzwi nka Pasiteri Rick Warren, ari mu bazatanga ibiganiro.

Umuryango wa Bibiliya washinze imizi mu Rwanda mu mwaka wa 1977. Mu ntego zawo harimo gusobanura Bibiliya, hibandwa kuyo abakirisitu bakeneye birimo Bibiliya Yera, Bibiliya Ntagatifu na Bibiliya Ijambo ry’Imana.

Indi ntego ni ugucapa Bibiliya, kuyamamaza, gushaka umutungo utuma Bibiliya iboneka no kuyikorera ubuvugizi muri rusange

Musenyeri Kambanda Antoine, Umuvugizi w'Umuryango wa Bibiliya mu Rwanda
Umuyobozi w’Itorero Saddleback ryo muri Leta Zunze Ubumwe za Amerika, Richard Duane Warren, uzwi nka Pasiteri Rick Warren, ari mu bazatanga ibiganiro
Inama Mpuzamahanga y’Umuryango wa Bibiliya muri Afurika, ABLI irabera muri Kigali Convention Centre

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza