U Rwanda rugiye kugerageza amagare akoreshwa n’amashanyarazi

Yanditswe na IGIHE
Kuya 25 Ugushyingo 2018 saa 09:08
Yasuwe :
0 0

Ikigo Mpuzamahanga cyita ku Bukungu Butangiza Ibidukikije (GGGI) cyashyigikiye ikoreshwa ry’amagare yifashisha amashanyarazi ku bazitabira Ihuriro Nyafurika ku bukungu butangiza Ibidukikije mu kwirinda ihumana ry’ikirere no koroshya ingendo.

Iri huriro rizabera muri Kigali Convention Centre (KCC) n’ahari ibikorwa bigamije ubukungu butangiza ibidukikije mu gihugu, kuva ku wa 26-30 Ugushyingo 2018.

Rizahuza abarenga 1 000, barimo abashoramari, abashyiraho za politiki n’abahanga mu by’imari bazaturuka hirya no hino muri Afurika, bazasangizanya inararibonye ku bukungu butangiza ibidukikije n’iterambere ridahangarwa n’imihindagurikire y’ibihe.

Insanganyamatsiko yaryo igira iti “Kugira ngo habeho Afurika yita ku bidukikije kandi ihangana n’imihindagurikire y’ibihe.”

Rizasobanurirwamo akamaro k’impinduka ziganisha ku bukungu burambye n’uburyo ubutangiza ibidukikije bufitiye akamaro kanini Afurika.

The New Times yanditse ko muri gahunda yo kubungabunga ibidukikije, ubuzima bwiza no kwirinda ihumana ry’ikirere ku mugabane, abazitabira ihuriro bashyiriweho uburyo bwo gutwara amagare mashya akoresha amashanyarazi yageze i Kigali mu Ukwakira 2018.

Gahunda y’iri huriro igaragaza ko amagare azaba ahari ku bazashaka kuyatwara bava cyangwa bajya kuri KCC.

Umuyobozi ushinzwe Imishinga muri GGGI Rwanda, Michelle DeFreese, yatangaje ko uyu mushinga watangiye muri Mutarama 2018, ugamije gushyiraho uburyo bwo kugabanya imyuka yoherezwa mu kirere no koroshya ubwikorezi.

Ati “Twagerageje gushyiraho uburyo bwo gusangira amagare muri Musanze na Rubavu. Mu 2019, turizera ko bizakorwa muri Kigali.”

Yavuze ko amagare 30 arimo atandatu akoreshwa n’amashanyarazi yateguwe buri munsi azafasha abazitabira ihuriro.

Ati “Ni umubare muto ariko harigwa uko umwaka utaha twazagura. Ku munsi wa nyuma hateguwe ingendo ebyiri zizafasha abazitabira ihuriro kuzenguruka Kigali no hanze yayo.”

Gahunda igaragaza ko urugendo rwa mbere ruteganyijwe saa 8:00-11:00 z’igitondo, urwa kabiri ruzaba saa 1:00-3:30 z’umugoroba.

Abazitabira izi ngendo zizatangirira, zikanasorezwa kuri KCC, abazitabira bazahabwa amabwiriza, ingofero n’icupa ry’amazi. Abashaka kwitabira basabwe kwitwaza imyenda ya siporo.

Ikoreshwa ry’amagare rirunganira intego y’u Rwanda yo gukoresha uburyo budahumanya ikirere, hagabanywa ikoreshwa ry’ibikomoka kuri peterori.

Mu 2019 binateganyijwe ko moto n’imodoka zikoreshwa amashanyarazi zizaba zagejejwe mu Rwanda.

DeFreese yavuze ko “Ni iby’agaciro kureba uko bizahindura urwego rw’ubwikorezi no kugabanya ikibazo cy’umwuka uhumanya ikirere mu mijyi. Gutangiza uburyo bwo gukoresha aya magare muri Kigali bizatuma bukoreshwa mu koroshya ingendo.”

Yavuze ko mu gihe u Rwanda rwakira inama nyinshi, abayobozi bakwiye gukangukira gushishikariza abaturage gukoresha uburyo bw’ingendo bworoshye butuma boroherwa no kugera aho bacumbitse.

Abazitabira iri huriro kandi bazahakura impamba izabafasha gushyiraho uburyo bugabanya ihumana ry’ikirere mu bihugu byabo.

Amagare akoreshwa n'amashanyarazi agiye kwifashishwa ku bazitabira Ihuriro ry'Ubukungu butangiza Ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza