U Rwanda rugiye gutanga urukingo rwa Ebola rushobora kurinda umuntu kugera ku myaka ibiri

Yanditswe na Habimana James
Kuya 19 Ugushyingo 2019 saa 08:03
Yasuwe :
0 0

Amezi 15 arashize icyorezo cya Ebola kiyogoza Repubulika Iharanira Demokarasi ya Congo, abantu 2,193 bamaze kuhasiga ubuzima.

Iki cyorezo kandi cyageze mu bihugu birimo Uganda abantu batatu bamaze kuhasiga ubuzima, ibihugu bituranyi birimo n’ u Rwanda nabyo bifata ingamba zikomeye.

Iki cyorezo cyakomeje gutera ubwoba u Rwanda kuko cyanageze mu Mijyi nka Goma na Bukavu yose ihana imbibi narwo, hafatwa ingamba zikomeye zirimo no gupima mu buryo bukomeye abambukiranya imipaka.

Hatanzwe kandi inkingo ku bantu bashobora guhura bya bugufi n’uwanduye iki cyorezo, aba barimo abajyanama b’ubuzima n’abaganga.

Kuva iki cyorezo cyaduka kandi ibihugu bitandukanye cyane cyane iby’u Burayi na Amerika, byashyize ingufu mu igeragezwa ry’inkingo zo guhagarika iki cyorezo.

Ibi byatumye ibihugu nka RDC n’u Rwanda bigenda bitanga izi nkingo zitandukanye zirimo urwitwa Ervebo, rwakozwe n’uruganda rw’imiti rwa MERCK.

Umuyobozi w’Ikigo cy’igihugu gishinzwe ubuzima (RBC), Dr Nsanzimana Sabin, yabwiye IGIHE mu Rwanda hari urukingo rwa mbere rwatanzwe ariko hari n’urundi rugiye gutangwa mu minsi ya vuba, urwo rukaba ruzwi cyane nk’urukingo rwa Johnson and Johnson.

Avuga ko hatagize igihinduka mu Ukuboza uyu mwaka ruzatangwa, uru rukaba ruvura Ebola ku kigero cyo hejuru ya 95%, abarukoze bakaba banavuga ko rurusha urwa mbere ubushobozi kuko rurinda umuntu mu gihe kirekire gishobora no kugera ku myaka ibiri.

Ni bande bashobora kuzahabwa uru rukingo?

Dr Nsanzimana avuga mbere hari urukingo batanze ku bantu bashobora guhita bandura, ubu abagera ku bihumbi bitatu bamaze gukingirwa.

Avuga ko iyi gahunda noneho izagera ku bantu benshi cyane cyane abambukiranya imipaka inshuro nyinshi.

Ati “Ushobora gusanga wambutse umupaka inshuro imwe utajyaga uhaca kenshi, mu by’ukuri uzajya ahaca wese ntabwo azajya aterwa urwo rushinge ahubwo ni babandi bigaragara ko bahora bahanyura mbese bafite ibyago byo kwandura, wowe ushobora kwivira nko mu Ntara y’Amajyepfo ukahanyura umunsi umwe, uru rwo rero ruzajya rutangwa kuri babandi bahanyura kenshi kuko ruzajya ruhabwa umuntu kabiri.”

Dr Nsanzimana avuga ko rufite ubushobozi buri hejuru ya 95%, rukaba ari urukingo aho urufashe iyo ahuye n’urwaye Ebola itamugeraho.

Ati “Muri make dufite urukingo rwemewe rushobora kuba rwarinda abantu kwandura Ebola, ubundi ikihutirwa kuri Ebola ni ukugera kwa muganga hakiri kare.”

Abanyarwanda bamaze gusobanukirwa ibimenyetso bya Ebola mu buryo budasanzwe

Dr Nsanzimana avuga ko kuva ingamba zo kuvuga ibimenyetso bya Ebola zafatwa, hari abantu benshi basigaye babona n’urwaye imyuna bagahita bahamagara muri RBC, ko babonye umuntu ukekwaho Ebola.

Ati “Ubu n’usigaye ava imyuna basigaye baduhamagara batubwira bati tubonye Ebola hano ariko ibyo biradushimisha, kuko icyo gihe baba barabonye amakuru y’icyo kimenyetso, abakozi bacu basigaye bakira ibi bibazo kandi babiha agaciro kugira ngo n’ubutaha bazatubwire, ntabwo wabisuzugura, ibi ni ibyerekana ko abaturage bacu bafite amakuru.”

Umuyobozi Mukuru wa RBC, yavuze ko nubwo ku mipaka ya Repubulika Iharanira Demokarasi ya Congo hatarimo kuvugwa iki cyorezo, ariko mu gace ka Ituri kigihari bityo ingamba zikomeje.

Urwaye Ebola agira umuriro, ababara umutwe, aribwa mu ngingo, mu muhogo, agacika intege, agahitwa, akaruka cyane kandi kenshi. Mu bindi bimenyetso agaragaza harimo kuribwa mu nda no kuva amaraso ahantu hose hari umwenge ku mubiri. Yandura ku muntu ukoze ku murwayi wayo adafite ubwirinzi.

Umuyobozi Mukuru wa RBC, Dr Nsanzimana avuga ko hagiye gutangwa urukingo rwa Ebola mu gukomeza kuyirinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza