00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda nta nyungu rufite mu guhungabanya umutekano wa RDC- Amb Gatete

Yanditswe na Cyprien Niyomwungeri
Kuya 1 June 2022 saa 09:31
Yasuwe :

U Rwanda rwagaragaje impungenge zikomeye rutewe n’ubufatanye bw’Ingabo za Repubulika Iharanira Demokarasi ya Congo (FARDC) n’Umutwe w’Iterabwoba wa FDLR, rusaba Akanama ka Loni k’Umutekano binyuze muri MONUSCO kutarebera ngo ubu bufatanye bukomeze.

MONUSCO ni Ingabo z’Umuryango w’Abibumbye ziri mu butumwa bw’amahoro muri RDC. Ubwo Akanama ka Loni kigaga ku kibazo cy’ibiri kubera muri RDC, Ambasaderi w’u Rwanda muri Loni, Amb. Gatete Claver, yasabye Umuryango w’Abibumbye binyuze muri MONUSCO, kwirinda kurebera ubu bufatanye buri hagati y’Igisirikare cya RDC, FARDC na FDLR.

Yagize ati "U Rwanda rutewe impungenge cyane n’ubufatanye bwa gisirikare bw’Ingabo za FARDC na FDLR. Aka kanama kagomba kwibuka ko mu myaka hafi 30, FDLR yateje akaga gakomeye abaturage mu Burasirazuba bwa RDC n’umutekano muke mu Karere."

Amakuru ahari ni uko FDLR yahawe impuzankano ya FARDC, abarwanyi bayo akaba ari bo bashyirwa imbere mu mirwano. FDLR ifite gahunda yo kugira ngo igere ku Mupaka w’u Rwanda noneho ibashe kiwnjira no gukora iterabwoba ryayo ku Rwanda.

Amb. Gatete yagarutse ku kintu giteye impungenge cyane cy’amagambo y’urwango ku Rwanda akomeje gukwirakwizwa ahamagarira abantu gukora jenoside. Aya magambo atizwa umurindi na bamwe mu bayobozi n’abanyapolitiki ba RDC.

Ati "Ibi ntibigomba gucecekwa n’aka kanama n’umuryango mpuzamahanga turebeye ku byabaye mu Rwanda mu 1994. Turasaba Guverinoma ya RDC guhagarika imvugo zibiba urwango n’ubutumwa buhembera ubwicanyi mu isura ya jenoside.”

Yabwiye Akanama ka Loni ko u Rwanda ruha agaciro gakomeye kugirana umubano mwiza na RDC, yibutsa uburyo nyuma yo gutorwa kwa Tshisekedi muri Mutarama 2019, rwagiranye amasezerano n’iki gihugu atandukanye yo kuzahura umubano wari warahindanyijwe n’ubuyobozi bwabanje. Arimo ay’ubucuruzi bwambukiranya imipaka n’ubutwererane bw’abatuye ibihugu byombi.

Muri RDC hamaze igihe hari imirwano ikomeye hagati y’ingabo za Leta n’Umutwe wa M23 yatumye abaturage bamwe bahungira muri Uganda, abandi berekeza i Goma.

Amb. Gatete yavuze ko Rwanda nk’igihugu gituranye na RDC ruhangayikishijwe n’ubwiyongere bw’ubukana bw’ikibazo cy’umutekano mu Burasirazuba bwa Congo, kandi giteye inkeke ku mahoro n’umutekano w’Akarere, kikagira ingaruka zitaziguye ku Rwanda.

Ku wa 23 Gicurasi 2022 Ingabo za FARDC zateye ibisasu ku butaka bw’u Rwanda mu Karere ka Musanze na Burera bikomeretsa abaturage bikabije kandi bisenya inzu zitandukanye. Iki gitero ni icya kabiri muri uyu mwaka nyuma y’ikindi nka cyo cyabaye ku wa 19 Werurwe 2022.

Ubu bushotoranyi bwiyongeraho gushimuta abasirikare b’u Rwanda babiri bari ku burinzi ku mupaka bikozwe n’abarwanyi ba FDLR, ubu bafunzwe n’ubuyobozi bwa RDC. U Rwanda rwasabye ko bahita barekurwa.

Amb. Gatete ati "Nubwo habayeho ubu bushotoranyi, ntacyo ubuyobozi bw’ingabo za FARDC cyangwa ubwa RDC bwigeze bubivugaho cyangwa ngo bubitangeho ibisobanuro. Ikibazo cyibazwa ubu, ni iki u Rwanda rutegerejweho gukora mu gihe rwakongera gushotorwa?"

Minisitiri w’Ububanyi n’Amahanga w’u Rwanda, Dr Vincent Biruta, yavuze ko ’Igihugu iyo gitewe kiritabara, biravuga ngo bikomeje ntabwo twakomeza ngo twicare dutegereze ko abaturage bacu bahora baraswa buri munsi, ushatse aze ashimute abo ashatse bose’.

Ikibazo cya M23

Amb. Gatete yavuze ko u Rwanda ruhangayikishijwe no kubura kw’imirwano ya FARDC na M23 kandi rushyize imbere ko impande zombi ziyihagarika zigashakira hamwe ibisubizo nk’uko byemejwe n’Inama y’Abakuru b’Ibihugu bya EAC yateraniye i Nairobi ku wa 21 Mata 2022.

Ati "U Rwanda rwamaganye kwitirira Umutwe wa M23 Abanyarwanda, aba ni Abanye-Congo kandi agahinda kabo kagomba gukemurirwa imbere muri RDC".

Yibukije ko mu 2013 nyuma yo gutsindwa kwa M23 abari abarwanyi bayo bamwe bahungiye mu Rwanda abandi bajya muri Uganda. Abahungiye mu Rwanda bambuwe intwaro boherezwa kure y’Umupaka wa RDC, ari naho bakiri nk’uko byemejwe n’urwego rwashyizweho n’akarere icyo gihe.

U Rwanda kandi rwashyize imbaraga mu guhuza abari abarwanyi ba M23 na Leta ya RDC bemeranya kuri gahunda ya 2019 yari igamije kubacyura no kubahiriza ibyo bifuza. Ibi byagendanye no gusubiza RDC intwaro zambuwe abo barwanyi. Ibi ariko ubutegetsi bwa RDC bwabitesheje agaciro bunagaragaza imbaraga nke mu kubahiriza ibyemeranyijweho.

Amb. Gatete yakomeje agira ati “Ndashaka gushimangira ko u Rwanda rwamaganye rwivuye inyuma ibirego bya RDC byo gufasha M23. Ntibifite ishingiro kandi ntibyemewe. U Rwanda nta nyungu n’imwe rufite mu guhungabanya RDC.”

Gatete yavuze ko u Rwanda rubona ibi birego nk’urwitwazo rw’abashaka kurusebya bari muri RDC, banashaka gufata amakimbirane ari kubera imbere mu gihugu ngo bayitirire abantu bo hanze yacyo.

Yavuze kandi ko u Rwanda rufite ubushobozi n’inshingano zo guharanira ubusugire bw’abaturage barwo, cyo kimwe n’ubusugire bwarwo nk’igihugu nk’uko biteganywa n’amategeko mpuzamahanga.

Amb. Gatete yavuze ko ubufatanye bwa FARDC na FDLR buteye impungenge ku mutekano w'Akarere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .