00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Zimbabwe byasinyanye amasezerano arimo ayo guhererekanya abanyabyaha

Yanditswe na IGIHE
Kuya 30 July 2022 saa 09:56
Yasuwe :

Umubano n’ubufatanye bw’u Rwanda na Zimbabwe bikomeje kwaguka, aho kuri uyu wa Gatanu ibi bihugu byasinyanye amasezerano atatu y’ubufatanye mu nzego z’ubwikorezi n’ibikorwaremezo, imigenderanire no kohererezanya abanyabyaha.

Ku ruhande rw’u Rwanda ni amasezerano yashyizweho umukono na Minisitiri w’Ububanyi n’Amahanga, Dr Vincent Biruta uri mu ruzinduko rw’akazi muri Zimbabwe. Ni umuhango wanakurikiwe na Perezida Emmerson Mnangagwa.

Ku ruhande rwa Zimbabwe, amasezerano yasinywe na Minisitiri w’Ububanyi n’Amahanga n’Ubucuruzi Mpuzamahanga, Frederick Shava na Minisitiri w’Umutekano imbere mu gihugu Kazembe Kazembe.

Amasezerano yasinywe arimo ayo kohererezanya abanyabyaha, ay’ubufatanye mu migenderanire ndetse n’ayo gukora amaperereza ku mpanuka z’indege za gisivili n’ibindi bibazo byazo bikomeye.

Minisitiri Dr Biruta yavuze ko ubufatanye bw’u Rwanda na Zimbabwe bugamije cyane ubucuruzi n’ishoramari ribyara inyungu ku baturage b’ibihugu byombi.

Ati “Hari inzego nyinshi, navuze ku bucuruzi n’ishoramari, ni urwego rugari rurimo ubuhinzi, ingufu ndetse n’izindi. Dusanzwe dufite amasezerano y’ubufatanye ahari, icyo dukeneye ni ukuyashyira mu bikorwa agatangira gukora”.

Muri Werurwe uyu mwaka, i Harare muri Zimbabwe, habereye inama y’iminsi itatu ku buhahirane n’ishoramari hagati y’ u Rwanda na Zimbabwe.

Perezida wa Zimbabwe, Emmerson Mnangagwa yasabye abashoramari n’abacuruzi bo mu bihugu byombi kwibanda ku kongerera agaciro ibikomoka muri Afurika aho kugira ngo bakomeze kubyohereza hanze, ubundi bigaruke bibahenze.

Minisitiri Dr Biruta agendeye kuri iyi nama, yavuze ko u Rwanda na Zimbabwe, bafitanye umubano mwiza cyane. Amasezerano hagati y’ibihugu byombi amaze kuba 22.

Arimo ayo guteza imbere ubuhinzi n’ubworozi, kurengera ibidukikije no guhangana n’ingaruka z’ihindagurika ry’ikirere, guteza imbere ikoranabuhanga ndetse no kwihutisha serivisi za Leta zitangwa binyuze mu ikoranabuhanga, guteza imbere ubukerarugendo no gutegura inama no gufatanga hagati y’Urugaga rw’Abikorera bo mu Rwanda (PSF) ndetse n’Ishyirahamwe ry’inganda muri Zimbabwe.

Minisitiri Biruta ati “Twasinyanye amasezerano yo kohererezanya abanyabyaha, iki ni ikintu cy’ingenzi mu guhangana n’abanyabyaha bashobora kuba bari aha [Zimbabwe] cyangwa mu Rwanda barakoze ibyaha hano”.

Zimbabwe ni kimwe mu bihugu bitungwa agatoki ko byaba byihishemo benshi mu basize bakoze Jenoside yakorewe Abatutsi mu 1994.

Igihamya ni Protais Mpiranya biheruka kwemezwa ko yapfiriye muri icyo gihugu. Uyu yashakishwaga Urwego rwasigaranye imirimo y’inkiko mpuzamahanga mpanabyaha (IRMCT). Biheruka kwemezwa ko Mpiranya yapfiriye muri Zimbabwe mu 2006.

Leta y’u Rwanda irateganya gukura abarimu 477 muri Zimbabwe, bitezweho umusanzu mu kuzamura ireme ry’uburezi aho bazaba bigisha amasomo ya siyansi (STEM) mu byiciro birimo uburezi bw’ibanze, ubumenyingiro na Kaminuza n’amashuri makuru.

Zimbabwe iri mu bihugu bifite urwego rw’uburezi rwiyubatse uhereye mu myaka ya 1980 kugeza uyu munsi aho ifite umwihariko mu bijyanye n’imibare na Siyansi.

Ni amasezerano kandi arimo ay'ubufatanye mu migenderanire
Amasezerano yasinywe harimo ayo guhererekanya abanyabyaha
U Rwanda na Zimbabwe kuri ubu bifitanye umubano mwiza cyane
Kuri uyu wa Gatanu nibwo Perezida Emmerson Mnangagwa yakiriye Minisitiri Dr Vincent Biruta mu biro bye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .