U Rwanda na Uganda byasinye amasezerano yo guhererekanya abanyabyaha

Yanditswe na Rabbi Malo Umucunguzi
Kuya 21 Gashyantare 2020 saa 05:20
Yasuwe :
0 0

Umwe mu myanzuro ikomeye yavuye mu nama yahuje abakuru b’ibihugu bane igamije kugarura umubano mwiza hagati y’u Rwanda na Uganda, ni isinywa ry’amasezerano yo guhererekanya abanyabyaha.

Aya masezerano arakomeye kuko u Rwanda rushinja Uganda gucumbikira abakekwaho ibyaha binyuranye bahunze ubutabera no gukingira ikibaba ibikorwa by’imitwe igamije kuruhungabanyiriza umutekano, birimo iby’imitwe ya RNC, FDLR, RUD Urunana n’indi.

Kuri uyu wa Gatanu nibwo habaye inama ya kane yahuje Perezida Paul Kagame, Yoweri Museveni, João Manuel Gonçalves Lourenço wa Angola na Felix Tshisekedi Tshilombo wa RDC, ibera ku mupaka wa Gatuna ugabanya u Rwanda na Uganda.

Ni inama yemerejwemo ko mu kwezi kumwe, Uganda igenzura ibirego u Rwanda rwagaragaje, bigakemurwa ubundi mu minsi 15 nyuma y’itangwa rya raporo ku bakuru b’ibihugu, imipaka igafungurwa ku mugaragaro.

Nyuma y’inama yabereye mu muhezo, Minisitiri w’Ububanyi n’amahanga wa Angola, Manuel Domingos Augusto, yasomye imyanzuro yemeranyijweho, aho ibihugu by’abahuza bya Angola na RDC, byagaragaje ko byishimiye intambwe zikomeje guterwa, harimo kurekura abantu bari bafungiwe ku mpande zombi, no kwizeza gukomeza kubahiriza amategeko kuri buri ruhande.

Yakomeje ati “Abakuru b’ibihugu bya Repubulik ya Angola na Repubulika ya Demokarasi ya Congo bakirije yombi isinywa ry’amasezerano agamije guhererekanya abanyabyaha, ryabaye uyu munsi mu nama ihuje ibihugu bine, hagati ya Repubulika y’u Rwanda na Repubulika ya Uganda, agaragaza uburyo bw’amategeko bwo gukurikirana ibibazo bijyanye n’ubutabera birimo iby’abo bashinjwa ibikorwa byo guhungabanya umutekano, bikorwa n’abenegihugu bikabera ku rundi ruhande.”

Mbere y’iyi nama, u Rwanda rwari rwasabye Uganda gutesha agaciro pasiporo yahawe Charlotte Mukankusi wo muri RNC ari nayo yakoreshaga mu ngendo ze, ibyo Uganda yatangaje ko yamaze kubishyira mu bikorwa, mu gihe bimwe mu bitangazamakuru byo muri icyo gihugu byavugaga ko ari impimbano.

U Rwanda kandi rwari rwasabye Uganda kohereza abantu bagize uruhare mu bitero byo mu Kinigi mu mwaka ushize, byahitanye abantu 14 abandi bagakomereka. Ku wa Gatatu hari babiri boherejwe.

Gusa u Rwanda rukomeje gusaba Uganda gukurikirana ibikorwa n’ikusanywa ry’inkunga ihabwa imitwe yo guhungabanya u Rwanda, bikorwa n’abarimo Prossy Bonabaana, Sula Nuwamanya, Dr Rukundo Rugali, Emerithe Gahongayire na Emmanuel Mutarambirwa, byose bigashyigikirwa na RNC, binyuze mu muryango utari uwa leta Self-Worth Initiative.

Mu bandi rusaba kohererezwa bari muri RUD Urunana yagabye igitero mu Kinigi, uretse Sous Lieutenant Selemani Kabayija na Private Fidèle Nzabonimpa bagejejwe mu Rwanda, hari Mugwaneza Eric na Capt. Nshimiye a.k.a Gavana ari na we wayoboye igitero cyo mu Kinigi.

U Rwanda kandi rusaba Uganda gukurikirana abayobozi bakorana na RNC na RUD Urunana barimo Umunyamabanga wa Leta Philemon Mateke, Brig Gen Abel Kandiho uyobora CMI, Brig Gen Fred Karara, Col Sike Asiimwe, Major Fred Mushambo, Col Kaka Bagyenda n’abandi bayobozi bagira uruhare muri ibyo bikorwa.

Abakuru b'ibihugu bine bahuriye mu nama i Gatuna
Minisitiri w'Ububanyi n'amahanga wa Uganda, Sam Kutesa na Minisitiri w'Ububanyi n'amahanga w'u Rwanda Dr Vincent Biruta, bashyira umukono ku masezerano yo guhererekanya abanyabyaha
Abakuru b'ibihugu bine bishimiye intambwe zikomeje guterwa mu gusana umubano w'u Rwanda na Uganda

Amafoto: Niyonzima Moise

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza