00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda na Pologne byasinye amasezerano mu by’umutekano

Yanditswe na IGIHE
Kuya 6 Ukuboza 2022 saa 07:32
Yasuwe :

U Rwanda na Pologne kuri uyu wa Mbere byasinye amasezerano agamije ubufatanye mu by’umutekano, by’umwihariko mu bijyanye n’inganda mu by’ubwirinzi.

Ni amasezerano yasinywe uruhande rw’u Rwanda ruhagarariwe na Minisitiri w’Ingabo, Maj Gen Albert Murasira mu gihe Pologne yari ihagarariwe na Minisitiri w’Ububanyi n’Amahanga wungirije uri mu ruzinduko mu Rwanda, Pawel Jabłoński.

Minisitiri Pawel Jabłoński yari aherekejwe na Miniistiri w’ubukungu ndetse n’ikoranabuhanga wungirije, Grzegorz Piechowiak.

Jabłoński kuri uyu wa Mbere yaganiriye na Minisitiri w’Ububanyi n’Amahanga w’u Rwanda, Dr Vincent Biruta hasinywa amasezerano arimo ajyanye n’ishoramari ndetse n’ubufatanye mu bya Kaminuza.

Ubufatanye bw’u Rwanda na Pologne muri iyi minsi buri gutera imbere ndetse Jabłoński yatangaje ko mu gihe cya vuba Pologne izafungura Ambasade mu Rwanda.

Muri Kamena 2021 nibwo u Rwanda rwashyizeho Ambasaderi warwo wa mbere muri Pologne nyuma y’imyaka myinshi yari ishize uhagarariye u Rwanda muri icyo gihugu afite icyicaro ahandi.

Pologne yagiranye ubufatanye n’u Rwanda mu by’ubwirinzi ni kimwe mu bihugu by’i Burayi bikora intwaro nyinshi ndetse byungukiye cyane mu ntambara iri kubera muri Ukraine.

Iki gihugu gifite nka Sosiyete yitwa PGZ, ishamikiye kuri leta, igenzura nibura inganda 50 zikora ibijyanye n’intwaro n’amasasu ndetse n’ibindi bikoresho byifashishwa ku rugamba birimo imodoka zitamenwa n’amasasu n’ubwirinzi bwo mu kirere.

PGZ irateganya gukora ishoramari rishya rya miliyari 1,8$ mu myaka nibura icumi iri imbere, kugira ngo ikube nibura kabiri ingano y’ibikoresho yari yarateganyije gukora mbere y’intambara.

Mu zindi gahunda z’iyi sosiyete harimo no gufungura inganda nshya muri Belarus.

Magingo aya igeze ku bushobozi bw’aho umwaka wa 2023 uzarangira imaze gukora imbunda 1000 zifite ikoranabuhanga ryihariye mu kubungabunga umutekano wo mu kirere. Ni mu gihe nko mu 2022 intego zari uko hazakorwa izo ntwaro 600 naho mu mwaka wari wabanje zari 350 zivuye kuri 300.

Ni imwe muri sosiyete zagize uruhare mu kohereza amasasu, za mortiers, Howitzer zifashishwa mu kurasa kure, amakote atamenwa n’amasasu, imbunda nto n’ibindi muri Ukraine. Irateganya ko izinjiza amafaranga arenga miliyari 1,4$ yateganyaga mbere y’urugamba.

Aya masezerano yasinywe agamije ubufatanye mu by'inganda zikora ibijyanye n'ubwirinzi
Ibihugu byombi byiyemeje guteza imbere umubano ushingiye ku mutekano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .