Ni uruzinduko rwabaye kuri uyu wa Mbere. Inzego zombi zaganiriye ku mikoranire myiza zifitanye hagamijwe kongera amasezerano y’imikoranire mu kugorora yaba mu bukungu, ikoranabuhanga, ubumenyi, guhanahana amakuru, inyigisho, abanyeshuri, kongerera ubumenyi abakozi n’ibindi.

Ni amaserano yari yararangiye ariko kugira ngo yongere avugururwe habanza ibiganiro by’inzego zombi, agashyikirizwa inzego nkuru za Leta ku mpande zombi kugira ngo asinywe.

Umuvugizi wa RCS, SSP Pelly Gakwaya Uwera yavuze ko uru ruzindiko ari intambwe ikomeye mu gushyimangira ubufatanye mu by’igorora hagati y’u Rwanda na Kenya.

Yagize ati “Nkuko mubizi ibihugu byacu Kenya n’u Rwanda bifitanye umubano mwiza, ni muri urwo rwego Urwego rw’Amagereza yo muri Kenya baje hano kugira ngo basure RCS mu kongera kuganira ku bufatanye buri mu masezerano twahoze dufitanye, ubu rero barashaka uburyo bayavugurura.”

Yakomeje agira ati “Hari nk’ikigezweho cyane cyo kugurana banyeshuri ku mpande zombi, ariko ibyo byose ari ukureba icyo baturushije. Nkabo iyo baje babona Biogaz cyangwa ikintu cya Mituweli bakibaza uburyo twabigezeho, uburyo abagororwa bose babasha kwivuza, tukabereka ko ari gahunda za Leta, z’Igihugu cyacu cyitajya gisiga n’abari mu igororero.”

SSP Gakwaya Uwera yavuze ko aya masezerano yitezweho kunoza uburyo bwo kugorora bitewe n’umusaruro buri rwego ruriho no kwigiranaho.

Brigadier (Rtd) John Kabaso Warioba yavuze ko umubano usanzwe uhuza ibihugu byombi ugiye gukomeza kugenda neza kubera ubumenyi buri wese azaha undi.

Yagize ati “Mu gihe aya masezerano y’imikoranire azaba yasinywe RCS ifite byinshi izatwigiraho kandi na twe dufite byinshi cyane tuzabigiraho nk’ u Rwanda kuko twese nabonye dufite imbogamizi zimeze kimwe.”

Iri tsinda kandi ryanasuye urwibutso rwa Jenoside yakorewe Abatutsi mu 1994 ruri ku Gisozi mu Mujyi wa Kigali.

Brigadier (Rtd) John Kabaso Warioba yakirwa ku cyicaro cya RCS

CGP Marizamunda yakira itsinda ryaturutse muri Kenya

Komiseri Mukuru wungirije wa RCS, DCG Muhisoni aganira n'umwe mu bashyitsi baturutse muri Kenya

SSP Pelly Gakwaya yavuze ko uru ruzinduko ari intambwe ikomeye mu bufatanye bw'impande zombi

CGP Marizamunda aganira n'itsinda ryaturutse muri Kenya ku bufatanye bw'impande zombi mu kugorora

Ibiganiro byibanze ku masezerano yo kugorora impande zombi zitegura kuvugurura

Iri tsinda ryanasuye urwibutso rwa Jenoside yakorewe Abatutsi ruri ku Gisozi