U Rwanda na Finland byasinyanye amasezerano agamije kwagura ubutwererane hagati y’ibihugu byombi

Yanditswe na Iradukunda Serge
Kuya 8 Ukuboza 2020 saa 02:27
Yasuwe :
0 0

Leta y’u Rwanda n’iya Finland byasinyanye amasezerano agamije kwagura ubufatanye bw’ibihugu byombi mu nzego zitandukanye zirimo uburezi no guteza imbere inganda.

Minisiteri y’Ububanyi n’Amahanga y’u Rwanda igaragaza ko mu myaka mike ishize aribwo ibihugu byombi byatangiye gufatanya mu bintu bitandukanye ariko ikemeza ko ikigero cy’ubu bufatanye kikiri hasi.

Mu biganiro Minisitiri w’Ububanyi n’Amahanga w’u Rwanda, Dr Vincent Biruta yagiranye na Minisitiri wungirije ushinzwe ibijyanye na politike muri Minisiteri y’Ububanyi n’Amahanga ya Finland, Kai Sauer, kuri uyu wa 8 Ukuboza bagarutse ku buryo ubu butwererane bwarushaho kuzamuka bashyira n’umukono ku masezerano abigena.

Dr Biruta yavuze ko aya masezerano yashyizweho umukono n’impande zombi azagura ubufatanye bw’ibihugu byombi ndetse akaba imbarutso y’andi masezerano azagenda abaho hagati y’ibigo byo mu bihugu byombi.

Ati “Amasezerano twashyizeho umukono, ni amasezerano mu by’ukuri y’ibanze atuma ibihugu byombi bishobora kugirana ubutwererane, ni amasezerano ya rusange ariko afungurira andi menshi mu byiciro bitandukanye.”

“Mu biganiro twagiranye twarebye inzego zitandukanye zishobora kugirana ubutwererane harimo ubutwererane mu bijyanye no gukurikirana imihindagurikire y’ibihe, hari inama ziteganyijwe n’ikigo kibishinzwe hano mu Rwanda ndacyeka ko haza kuvamo amasezerano yihariye, hari ibijyanye n’ubucukuzi bw’amabuye y’agaciro, hari ibijyanye n’uburezi.”

Yakomeje agaragaza hamwe mu ho ibihugu byombi biteganya gufatanya harimo mu bijyanye n’ibidukikije, hashyirwaho uburyo inganda zishobora kubona ibyo zipfunyikamo bitari amashashi, ubucukuzi bw’amabuye y’agaciro, uburezi bujyanye n’amasomo y’ubumenyingiro by’umwihariko mu ishuri rikuru rya IPRC Ngoma.

Biteganyijwe ko Kai Sauer azahura n’abandi bayobozi bo mu Rwanda barimo abo mu Rwego rw’Igihugu rushinzwe iterambere, RDB, abo mu rwego rw’ibidukikije ndetse n’abo mu rw’ubucukuzi bw’amabuye y’agaciro.

Kuva mu 2017 kugera mu 2019, ubucuruzi bwakorwaga hagati y’u Rwanda na Finland bwazamutse ku kigero cya 21% buva kuri miliyoni 12,8$ bugera kuri miliyoni 18.6$. Ugereranyije n’ubucuruzi u Rwanda rukorana n’ibindi bihugu ubwo rukorana na Finland buracyari hasi kuko imibare yerekana ko rwoherezayo ikawa mu gihe rukurayo byinshi birimo ifumbire mva ruganda, imashini zubaka umuhanda n’izikoreshwa mu buhinzi.

Aya masezerano azafasha mu gushimangira ubutwererane hagati y'ibihugu byombi
Umuhango wo gusinya aya masezerano witabiriwe n'abayobozi batandukanye ku ruhande rw'u Rwanda na Finland

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .