U Rwanda na Amerika baganiriye ku ifatwa rya Paul Rusesabagina

Yanditswe na Bukuru JC
Kuya 3 Nzeri 2020 saa 08:28
Yasuwe :
0 0

Umunyamabanga wungirije wa Leta Zunze Ubumwe za Amerika Ushinzwe Afurika, Tibor Nagy, yatangaje ko yagiranye ibiganiro na Ambasaderi w’u Rwanda muri icyo gihugu, Mathilde Mukantabana, byagarutse ku ifatwa rya Paul Rusesabagina, ukurikiranyweho ibyaha birimo iby’iterabwoba.

Urwego rw’Igihugu rw’Ubugenzacyaha (RIB), ku wa Mbere nibwo rwatangaje ko “binyuze mu bufatanye n’amahanga, Paul Rusesabagina yafashwe, ubu akaba ari mu maboko ya RIB.”

RIB ivuga ko hari hashize igihe Rusesabagina ashyiriweho impapuro mpuzamahanga zisaba ko afatwa agashyikirizwa ubutabera, kugira ngo abazwe ku byaha bikomeye aregwa birimo iterabwoba, gutwika, ubushimusi n’ubwicanyi, byakorewe abaturage b’inzirakarengane, b’Abanyarwanda mu duce dutandukanye tw’u Rwanda turimo Nyabimata mu Karere ka Nyaruguru muri Kamena 2018 no muri Nyungwe mu Karere ka Nyamagabe mu Kuboza 2018.

Ubwo yagarukaga ku kiganiro cyabaye kuri uyu wa Gatatu, Amb Nagy yakomeje ati “Leta Zunze Ubumwe za Amerika yiteze ko Guverinoma y’u Rwanda izamufata bya kimuntu, igakurikirza amategeko, kandi igaha Rusesabagina inzira y’amategeko iboneye kandi inyuze mu mucyo.”

Rusesabagina ariko si we wa mbere waba aburanishijwe n’inkiko zo mu Rwanda akurikiranyweho ibyaha bikomeye, ku buryo icyizere kijyanye n’ubutabera kimaze kubakwa mu Rwanda.

Ifatwa rya Rusesabagina ryakangaranyije abibumbiye mu mitwe igamije guhungabanya umutekano w’u Rwanda by’umwihariko ababa mu mahanga barimo n’umuryango we, batangiye kuvuga ko Rusesabagina afite ubwenegihugu bw’u Bubiligi, bityo adakwiye kuburanira mu Rwanda.

Umukobwa wa Rusesabagina, Anaise Kanimba, yabwiye itangazamakuru ko Se yabaga mu buhungiro, akaba umuturage wa Leta Zunze Ubumwe za Amerika (ufite green card), ndetse akagira ubwenegihugu bw’u Bubiligi.

Ati "Twifuza ko ibyo bihugu bibiri byadufasha kugira ngo agaruke mu rugo."

Byongeye, bakomeje kumvikana mu busabe bw’uko akwiye kuburanishwa n’urukiko mpuzamahanga ku byaha yaba akekwaho. Ni ubusabe ariko butahawe agaciro.

Minisitiri w’Ububanyi n’Amahanga, Dr Vincent Biruta, yabwiye Reuters ati "Paul Rusesabagina ni Umunyarwanda ukekwaho ibyaha byakorewe mu Rwanda, bikorerwa Abanyarwanda, bityo agomba kuburanishwa n’urukiko rwo mu Rwanda."

Biteganyijwe ko Rusesabagina akomeza gukorwaho iperereza, dosiye ikanozwa neza mbere yo gushyikirizwa Ubushinjacyaha.

Itegeko ryerekeye kurwanya iterabwoba, mu ngingo ya 12 igaragaza igihe ifatwa n’ifungwa ry’agateganyo ry’ukekwaho igikorwa cy’iterabwoba rimara, iteganya ko Umugenzacyaha akora inyandikomvugo y’ifatwa n’ifungwa ry’agateganyo ry’ukekwaho igikorwa cy’iterabwoba igira agaciro k’iminsi 15, ishobora kongerwa byemejwe n’Umushinjacyaha uyobora ku Rwego Rwisumbuye.

Kongera icyo gihe bigomba gutangirwa impamvu zigaragaza aho iperereza rigeze, n’ikigambiriwe gukorwa muri icyo gihe cy’inyongera gisabwa. Icyakora, icyo gihe ntigishobora kurenga iminsi mirongo icyenda.

Rusesabagina ategerejwe imbere y'urukiko ku byaha ashinjwa by'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .