00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bwatangiye kubona umusaruro w’amasezerano n’u Rwanda ku bimukira

Yanditswe na IGIHE
Kuya 22 May 2022 saa 01:17
Yasuwe :

U Bwongereza bwatangaje ko abimukira ba mbere batangiye gusaba ko bafashwa gusubira iwabo, nyuma yo kugaragaza ko budakeneye abinjirayo mu buryo bunyuranyije n’amategeko ndetse bukemeranya n’u Rwanda kwakira bamwe muri bo.

Ku wa 14 Mata 2022 nibwo u Rwanda n’u Bwongereza byashyize umukono ku masezerano y’imyaka itanu, agena ko ruzajya rwakira abimukira baturutse muri icyo gihugu, binjiyeyo binyuranyije n’amategeko guhera ku wa 1 Mutarama 2022.

Ni amasezerano agamije ahanini gushakira umuti ikibazo cy’abimukira bageze mu Bwongereza. Harimo n’impamvu yo guca intege abakomeza kwisuka muri icyo gihugu, bafashijwe n’abantu babambutsa rwihishwa, mu buryo bw’ubucuruzi bw’abantu.

Daily Mail yatangaje ko kugeza ubu nibura abimukira 100 bamaze kumenyeshwa ko mu gihe kiri imbere bazimurirwa mu Rwanda.

Ni igihugu bazaba bashobora kugumamo bagahabwa serivisi nk’abenegihugu, cyangwa bakaba bafashwa gusubira mu bihugu byabo.

Mu gihe aba mbere batarurizwa indege bajyanwa mu Rwanda, Mail on Sunday yatangaje ko bamwe bamaze gutangaza ko batagikeneye kuguma mu Bwongereza.

Yatangaje ko "abimukira bagera ku 10 bamaze gusaba gusubizwa iwabo aho kugira ngo ubusabe bwabo bw’ubuhunzi buzasuzumirwe muri iki gihugu".

Hari amakuru ko bamwe mu bari batangiye gusaba ubuhungiro, ariko bamaze kuvanamo ubusabe bwabo.

Bamwe mu bayobozi muri Minisiteri ishinzwe abinjira n’abasohoka n’umutekano (Home Office) batangaje ko biteze ko umubare w’abisubiraho mu busabe bwo kuba mu Bwongereza bazaba benshi, ubwo indege izaba imaze kugeza mu Rwanda aba mbere, "nibura bitarenze ukwezi gutaha."

Umwe yagize ati "Ni intangiriro nziza. Twakomeje kuvuga ko dukeneye kubona indege zigenda kugira ngo babashe kugabanyuka, ariko ariko ibi biragaragaza icyerekezo turimo kuganamo n’impamvu twashyizeho iyi politiki."

Mu gihe u Rwanda rwemeye kwakira aba bimukira, rwanateguye inzu bashobora gutuzwamo zirimo Hope House iherereye mu Murenge wa Kinyinya, Desire Resort Hotel iherereye i Kagugu mu Karere ka Gasabo na Hallmark residences iri mu Murenge wa Kanombe, hose ni mu Umujyi wa Kigali.

Ni inzu zigezweho, zifite ibikenewe byose mu buzima bwa buri munsi kuko ziri ku rwego rwa hoteli.

Abamenyeshejwe ko bagomba koherezwa mu Rwanda baba bafite iminsi irindwi yo kujurira, nko kuba batanga ikirego mu rukiko. Hari amakuru ko hamaze gutangwa ibirego bigera kuri 20.

Indege ya mbere itwaye aba bimukira ngo yagombaga kuba yarageze mu Rwanda, ariko yatindijwe n’ikirego cyatanzwe n’ihuriro ry’imiryango ndetse n’ishyirahamwe ry’ubucuruzi, mu nyungu z’abimukira.

Bityo, ngo birashoboka cyane ko nta ndege izahaguruka mu Bwongereza mbere y’itariki 10 Kamena.

Icyakora Ibiro bya Minisitiri w’Intebe byatangaje ko byifuza ko abimukira ba mbere bakwiye koherezwa mbere y’inama y’abakuru b’ibihugu na Guverinoma bya Commonwealth (CHOGM), izabera mu Rwanda guhera ku wa 20 Kamena.

U Bwongereza bukomeje gufatira ingamba abimukira bagenda mu buryo butemewe

Hari amakuru ko u Bwongereza bwifuza ko abimukira 300 bajya boherezwa buri mwaka.

Mu gihe hakiri izo mpaka, u Bwongereza bwatangaje ko ku wa Gatanu itsinda ry’abimukira 41 ryinjiye mu Bwongereza riciye mu nzira y’amazi iri hagati y’icyo gihugu n’u Bufaransa, izwi nka English Channel.

Ni mu gihe abimukira 106 bahanyuze bakoresheje ubwato butoya ku wa Kane, ku buryo kuva uyu mwaka watangira abamaze kwambuka bagera mu 9000.

Minisitiri w’Umutekano mu Bwongereza Priti Patel na Minisitiri w’Ububanyi n’amahanga w’u Rwanda Dr. Vincent Biruta, baheruka gukorera urugendo i Geneve mu Busuwisi, bajyanywe no kuganiriza imiryango mpuzamahanga ifite aho ihuriye n’abimukira, ku bufatanye ibihugu byombi byagiranye.

Ni inzego zari zagaragaje impungenge kuri aya masezerano, mu gihe agamije gufasha mu gukemura ikibazo cy’abimukira.

Bahuye n’Intumwa mu muryango w’Abibumbye zo muri Australia, Canada, Nouvelle Zelande na Leta zunze ubumwe za Amerika.

Bombi bagaragaje ko icyo aya masezerano ahagamije ari “ukurokora ubuzima”, ndetse ko hakenewe uburyo bwinshi mu gukemura ikibazo cy’abimukira.

Mu gihe u Bwongereza buteganya kohereza ahandi aba bimukira, hari amakuru ko abantu basaba ubuhungiro mu Bufaransa batangiye kwiyongera, "kuko batazi neza ikizababaho nibagera mu Bwongereza".

Umubare w’abantu baba mu nkambi zo mu nkengero ya Calais mu Bufaransa hafi y’amazi abageza mu Bwongereza, na wo waragabanutse nk’uko BBC yabitangaje.

Ariko ngo biragoye kumenya niba byaratewe n’iyo gahunda nshya, cyangwa niba ari ukubera amayeri akaze akoreshwa na Polisi y’u Bufaransa mu gusenya inkambi z’abimukira.

Perezida Paul Kagame aheruka kuvuga ko muri iki gihe u Burayi buhanganye n’ibibazo by’abimukira, bitizwa umurindi n’abantu babajyanayo rwihishwa kandi bakabikoreramo amafaranga menshi.

Kenshi ngo usanga abo bimukira bavuga ko barimo guhunga itotezwa mu bihugu byabo, ari n’ukuri.

Yakomeje ati "Ariko ntabwo ari igihe cyose, kubera ko bamwe muri bo usanga babasha kwishyura ibihumbi by’amayero, amadolari cyangwa amapawundi, kugira ngo bajyanwe rwihishwa muri ibyo bihugu."

"Bamwe muri bo ni abantu bafite amafaranga cyangwa badafite ibyo bibazo nko gutotezwa, ni ukuba ashobora kwishyura ubundi akabona inzira umujyana."

Yavuze ko umuntu akoze ubushakashatsi akabaza n’abanyarwanda cyangwa abandi banyafurika, niba bishimiye kuba hano cyangwa niba bashaka kujya mu Burayi, Amerika cyangwa Canada, amahitamo ya mbere y’aba bantu ’yego, yego, yego, dushaka kugenda, tujyaneyo’.

Ni igisubizo ngo wabona nubwo baba bagiye kubaho ubuzima bubi kurusha ubwo babayemo, ku buryo hakenewe ko abantu bahindura imyumvire.

Muri Mata u Rwanda n'u Bwongereza byasinyanye amasezerano n'u Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .