U Bushinwa bwizihije itangira ry’umwaka mushya bunishimira ubufatanye bufitanye n’u Rwanda

Yanditswe na Habimana James
Kuya 17 Mutarama 2020 saa 12:27
Yasuwe :
0 0

Ambasaderi w’u Bushinwa mu Rwanda, Rao Hongwei, yavuze ko mu gihe barimo kwizihiza itangira ry’umwaka mushya mu gihugu cyabo, bafite byinshi byo kwishimira mu bufatanye bw’ibihugu byombi mu myaka 49 ishize.

Rao Hongwei yabitangaje ubwo ambasade y’u Bushinwa mu Rwanda, yizihizaga umunsi mukuru w’itangizwa ry’umwaka mushya muri iki gihugu, ni umuhango wabereye ku biro bya ambasade biherereye mu Mujyi wa Kigali.

Uyu mwaka witiriwe umwaka w’Imbeba. Mu muco w’u Bushinwa imbeba ifatwa nk’itungo rikomeye kuko isobanura byinshi harimo ubutunzi no kugira umutungo mwinshi.

Abashinwa baba hirya no hino ku Isi bafata umwanya bakajya mu Bushinwa kwizihiza uyu munsi, cyangwa bakifatanya n’inshuti zabo aho baherereye ku Isi mu bikorwa byo kuwishimira.

Ambasaderi Rao Hongwei yavuze ko kugira uyu muco mu Bashinwa, ari byo bibumbatiye umuhate bagira wo gukorana ingufu bakiteza imbere.

Yavuze ko u Bushinwa bufite byinshi byo kwishimira mu gihe barimo no kwizihiza isabukuru y’imyaka 70 y’ishingwa rya Repubulika ya Rubanda y’u Bushinwa.

Yagize ati “Kugeza ubu umusaruro mbumbe w’u Bushinwa ugeze kuri tiriyari 100 z’Amayuwani (Yuan: Amafaranga akoreshwa muri icyo gihugu), naho umusaruro w’umuntu ku giti cye ugiye kugera ku madolari ibihumbi 10 ku mwaka.”

Yagaragaje ko mu gihe bishimira umwaka mushya, banafite ibyo bishimira mu bufatanye n’u Rwanda.

Yagize ati “Ubu bufatanye bw’u Rwanda n’u Bushinwa bugeze ku rwego rwo hejuru, nk’ubu itsinda ry’ingabo zaturutse mu Bushinwa ryafashize iz’u Rwanda kugira ngo akarasisi kagende neza ubwo u Rwanda rwizihizaga isabukuru y’imyaka 25 yo kwibohora, kugeza ubu kandi abahanga barenga 100 b’u Bushinwa mu by’ubucukuzi bw’amabuye y’agaciro bagiye kuza mu Rwanda, mu mushinga uhari wo kureba amabuye y’agaciro ari mu butaka.”

Ati “Kugeza ubu kandi u Bushinwa bwateye inkunga mu iyubakwa ry’inyubako ikorerwamo n’inzego zitandukanye mu Rwanda, sosiyete y’ubwikorezi ya RwandAir yatangije ingendo zihuza Kigali na Guangzhou, kugeza ubu kandi ibikorerwa mu Rwanda byageze ku isoko ry’ u Bushinwa n’ibindi.”

Yavuze ko mu cyerekezo cy’u Rwanda 2050, umubano w’ibihugu byombi uzakomeza gutera imbere.

Minisitiri w’Urubyiruko n’Umuco, Rosemary Mbabazi, witabiriye uyu muhango, yavuze ko ubufatanye bw’u Rwanda n’u Bushinwa buri ku rwego rwiza.

Yagize ati “U Bushinwa n’u Rwanda bifitanye ubufatanye bukomeye bumaze imyaka 49, ibi byagiye bishyirwamo ingufu n’abayobozi bakuru muri ibi bihugu, nk’aho muri Nyakanga 2018 u Rwanda rwakiriye Perezida w’u Bushinwa, Xi Jinping, aho hasinywe amasezerano agera kuri 15 mu bice bitandukanye by’ubukungu.”

Yavuze ko muri Nzeri 2019, u Rwanda kandi rwakiriye inama y’ubucuruzi yahuje ibihugu byombi, aho buri ruhande rwagaragaje ahari amahirwe, ibi bikaba byarongereye ubufatanye mu bucuruzi hagati y’abikorera.

Muri Kamena umwaka ushize ibihugu byombi byasinyanye amasezerano ya miliyoni 42.8 z’amadorali azafasha kwagura umuhanda Prince House-Giporoso-Masaka, kwagura uyu muhanda bizafasha kugabanya akavuyo k’imodoka.

U Bushinwa kandi bufasha abanyeshuri b’abanyarwanda gubabwa ubumenyi ndetse rwiteguye gukorana nabwo mu gihe kiri imbere.

Abadipolomate muri za ambasade zitandukanye bitabiriye uyu muhango
Abashinwa bafata umwanya bagasangira n'inshuti zabo
Abashinwa bari mu Rwanda bishimiye itangira ry'umwaka
Ambasaderi wa Israel mu Rwanda, Ron Adam yaje kwifatanya n'u Bushinwa mu kwizihiza umwaka mushya
Ambasaderi wa Leta Zunze Ubumwe za Amerika mu Rwanda Peter H Vrooman nawe yaje kwifatanya n'u Bushinwa
Ambasaderi w'u Bushinwa mu Rwanda, Rao Hongwei ari kumwe na Minisitiri w'Urubyiruko n'Umuco, Rosemary Mbabazi bagaragaje ubufatanye buri hagati y'ibihugu byombi
Ambasaderi w’u Bushinwa mu Rwanda, Rao Hongwei yashimye ubufatanye buri hagati y'ibihugu byombi
Inshuti z'u Bushinwa zifatanyije na bo mu kwizihiza umwaka mushya
Minisitiri w'Urubyiruko n'Umuco Rosemary Mbabazi yagaragaje ko u Rwanda rwishimira umubano uri hagati y'ibihugu byombi
Minisitiri w'Urubyiruko n'Umuco, Rosemary Mbabazi, yavuze ko u Bushinwa bukomeje kugirana umubano mwiza n'u Rwanda
Ubuyobozi muri Ambasade y'u Bushinwa mu Rwanda bwakiriye inshuti mu kwizihiza umunsi mukuru w'umwaka mushya
Umubano w'u Bushinwa n'u Rwanda umaze imyaka irenga 49
Umwaka mushya mu Bushinwa ufatwa nk'ikintu gikomeye kuko ufatirwamo ingamba zikomeye zerekeye iterambere ry'igihugu
Uyu muhango uba witabiriwe n'abantu batandukanye biganjemo inshuti z'Abashinwa

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza