U Burusiya bwemeye gufatanya n’u Rwanda kubaka Ikigo cy’Ubushakashatsi ku ngufu za nucléaire

Yanditswe na Evariste Nsengimana
Kuya 24 Ukwakira 2019 saa 08:26
Yasuwe :
0 0

U Rwanda n’Ikigo cya Leta y’u Burusiya gishinzwe Ingufu (Rosatom) byasinyanye amasezerano y’ubufatanye mu mushinga wo kubaka mu Rwanda Ikigo cy’Ubushakashatsi ku bumenyi bw’ingufu za nucléaire n’Ikoranabuhanga.

Aya masezerano yashyizweho umukono na Minisitiri w’Ibikorwa Remezo mu Rwanda, Ambasaderi Gatete Claver n’Umuyobozi wa Rosatom, Alexey Likhachev, kuri uyu wa Kane, i Sochi mu Burusiya, ahateraniye Inama yiga ku mikoranire hagati ya Afurika n’u Burusiya.

Ambasaderi Gatete Claver yanditse ku rukuta rwa Twitter rwe ko yashyize umukono ku masezerano yo kubaka icyo kigo n’umuyobozi wa Rosatom, Alexey Likhachev.

Ati “Umuyobozi wa Rosatom (Alexey Likhachev) nanjye twashyize umukono ku masezerano y’ubufatanye mu kubaka ikigo cy’ubushakashatsi ku bumenyi bw’ingufu za nucléaire n’ikoranabuhanga mu Rwanda.”

Minisitiri Gatete yavuze ko by’umwihariko umushinga wo kubaka icyo kigo uzafasha mu iterambere ry’inzego zitandukanye mu Rwanda zikenera ingufu.

Ati “Uyu mushinga witezweho gufasha cyane inzego zifatiye runini ubukungu bw’igihugu zirimo ubuzima, inganda, ubuhinzi, ibidukikije n’izindi.”

Mu 2018 nibwo Guverinoma y’u Rwanda n’iy’u Burusiya zashyize umukono ku masezerano y’ubufatanye agamije gutangiza mu Rwanda Ikigo cy’Ubushakashatsi n’Ikoranabuhanga mu bumenyi bujyanye n’ikoreshwa ry’ingufu za nucléaire.

Ubwo bushakashatsi buzajya bukorwa n’icyo kigo bugamije gushaka ibisubizo biganisha ku iterambere. Izi ngufu zifashishwa mu bikorwa bya gisivili birimo iby’ubuvuzi nko kuvura indwara za kanseri hifashishijwe uburyo bwo kuyishiririza (radiothérapie).

Zifashishwa kandi mu gutanga amashanyarazi, mu bijyanye n’ubuhinzi n’ubworozi n’ubucukuzi bw’amabuye y’agaciro.

Abanyeshuri ba mbere bagomba kujya guhugurwa kuri uyu mushinga, byari biteganyijwe ko uyu mwaka urangira berekeje mu Burusiya bagatangira amasomo.

Minisitiri w’Ibikorwa Remezo mu Rwanda, Ambasaderi Gatete Claver n’Umuyobozi wa Rosatom, Alexey Likhachev, bashyira umukono ku masezerano yo kubaka Ikigo cy’Ubushakashatsi ku ngufu za nucléaire
Minisitiri Gatete Claver na Alexey Likhachev bishimiye intambwe yatewe n'ibihugu byombi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza