00:00:00 IGIHE NETWORK KN KINYARWANDA EN ENGLISH FR FRANCAIS

U Burundi bwohereje intumwa mu Rwanda: Inkuru mpamo y’ubuzima bw’Abarundi bahungutse

Yanditswe na Akayezu Jean de Dieu
Kuya 20 Ukuboza 2022 saa 09:17
Yasuwe :

Mu 2015, ubwo mu Burundi hadukaga imvururu za politiki, bamwe mu Barundi bahungiye mu bihugu bitandukanye birimo n’u Rwanda.

Raporo zirimo iz’Ishami ry’Umuryango w’Abibumbye ryita ku Mpunzi, UNHCR, zigaragaza ko Abarundi barenga ibihumbi 500 ari bo bahunze abenshi bajya muri Tanzania, u Rwanda n’ahandi.

Imibare ya Minisiteri Ishinzwe Ibikorwa by’Ubutabazi [MINEMA] igaragaza ko abarenga ibihumbi 74 ari bo bari bahungiye mu Rwanda bamwe bashyirwa mu Nkambi ya Mahama iri mu Karere ka Kirehe mu gihe abandi bari bafite uburyo bagiye bajya hirya no hino mu bice by’igihugu.

Guverinoma y’u Rwanda yarabakiriye, ibitaho mu buryo butandukanye, bashyirirwaho gahunda zibafasha kubaho no kwiteza imbere, abana bariga, baravuzwa ndetse bahabwa n’ubundi bufasha bw’ibanze.

Ubwo Perezida General Évariste Ndayishimiye yageraga ku butegetsi mu 2020, mu byo yihutiye gukora harimo gusaba Abarundi bari barahunze imvururu zo mu 2015 gutahuka.

Nibura abarenga ibihumbi 30 bahungutse ku bushake baturutse mu Rwanda, binyuze mu mikoranire hagati y’ibihugu byombi mu gihe abandi bagiye bahunguka binyuze mu zindi nzira.

Uko bakirwa iyo bageze i Burundi

Abatashye kuva mu 2020 bigizwemo uruhare na Guverinoma y’u Rwanda ifatanyije n’iy’u Burundi ndetse na UNCHR, bahabwa imodoka zibavana mu Nkambi ya Mahama zikabageza ku Mupaka wa Nemba mu Karere ka Bugesera bagahita bajya mu modoka z’i Burundi.

Imibare ya Leta y’u Burundi igaragaza ko kuva muri Nzeri 2017 kugeza mu Ugushyingo 2022, hakiriwe Abarundi bahunguka barenga ibihumbi 122. Baturutse mu bihugu byose bari barahungiyemo. Ni mu gihe abavuye mu Rwanda bagera mu 36.176.

Umuyobozi Mukuru ushinzwe gucyura Impunzi mu Burundi, Bimenyimana Nestor, yavuze ko abatashye bose kuri ubu bamaze gusubizwa mu buzima busanzwe.

Abava mu Rwanda bakirirwa i Gasenyi ku Mupaka wa Nemba, bagahita bajyanwa ahari Ikigo cyakira impunzi zitahuka mu buryo bw’agateganyo kiri i Kinazi muri Komine Muyiga. Ni nko mu bilometero 80 uvuye ku Mupaka wa Nemba.

Iyo bageze muri iyo Nkambi y’agateganyo ya Kinazi bahabwa ibyangombwa byerekana ko bahungutse. Ni ukuvuga ngo guhera icyo gihe ubuhunzi buba burangiye.

I Kinazi bahamara nk’iminsi itatu ubundi bagafashwa kujya mu miryango yabo cyangwa aho bari batuye mbere yo guhunga. Icyo gihe bahabwa ibiribwa bizamara amezi atatu, bagahabwa imyambaro n’ibindi bikoresho nkenerwa by’ibanze baba bifashishwa muri ayo mezi.

Banahabwa amafaranga ibihumbi $150 ku muntu mukuru urengeje imyaka 18 mu gihe abana bahabwa $75. Ayo mafaranga bayahabwa binyuze kuri telefone ndetse izo telefone ni nshya. Ni telefone iba ifite na simukadi.

Iyo bageze mu muryango basanga abaturage barigishijwe uburyo bwo kubafasha gusubira mu buzima busanzwe.

Bimenyimana yavuze ko Guverinoma y’u Burundi yashyizeho gahunda ihamye yo kubasubiza mu buzima busanzwe ku buryo n’abasanze inzu zabo zarasenywe bafashwa mu buryo bwo kubakirwa ndetse bagahabwa amabati y’isakaro.

Ati "Inzu y’amabati 23, ni ukuvuga ko iba ifite ibyumba, tukayimwubakira neza nka leta. Akayibona isakaye neza."

Guverinoma y’u Burundi kandi yashyizeho uburyo bw’amakoperative yo kwiteza imbere aho nibura imwe igenda ihabwa miliyoni 10 z’Amarundi buri mwaka kugira ngo abaturage biteze imbere harimo n’abahungutse.

Yavuze ko abana bahunguka basanzwe ari abanyeshuri nabo bashyiriweho uburyo bwo kugera i Burundi bakabasha kwiga bigendanye n’urwego rw’amashuri bari bagezeho mu Rwanda. Gusa ngo babanza gukora ibizamini.

Bimenyimana avuga ko ku bahunze basanzwe ari abakozi ba leta, bafashwa gusubizwa mu nshingano bari barimo cyangwa se bagahabwa akandi kazi.

U Burundi bwateye indi ntambwe ku gucyura impunzi

Kuva kuri uyu wa Mbere kugeza ku wa Gatatu, u Rwanda rwakiriye intumwa ziyobowe na n’Umunyamabanga Uhoraho muri Minisiteri y’Umutekano mu Burundi Lt Gen. de Police, André Ndayambaje uri kumwe n’abayobozi b’Intara zihana imbibi n’u Rwanda.

Barimo Guverineri w’Intara ya Kirundo Hatungimana Albert, uw’Intara ya Kayanza, Cishahayo Rémy ndetse na Bandenzamaso Léonidas w’Intara ya Bururi.

Bari kumwe n’Umuyobozi Mukuru ushinzwe gucyura impunzi mu Burundi, Bimenyimana Nestor.

Mu byabazanye harimo gukora ubukangurambaga bwo gushishikariza impunzi gutahuka mu gihugu cyazo aho ku munsi wa mbere bahuye n’abahagarariye abandi mu Mujyi wa Kigali n’indi mijyi.

Mu biganiro bagiranye, babanje gusasa inzobe bagaruka ku mpamvu zitandukanye zatumye bahunga igihugu cyabo ndetse n’ibyo basaba leta kugira ngo babashe guhunguka.

Umuyobozi uhagarariye Impunzi ziri mu Rwanda, Patrice Ntadohoka yabanje kwibutsa impamvu yatumye bahunga avuga ko ku wa 21 Werurwe 2014, Inteko Ishinga Amategeko yateranye yemeza ko Nkurunziza atemerewe kwiyamamariza kuyobora u Burundi

Yavuze ko kuba leta y’u Burundi yohereje intumwa zikaza kuganira n’impunzi ari intambwe ikomeye kandi bashimye ubutumwa bazaniwe n’izo ntumwa.

Ati ‘‘Ubutumwa batuzaniye twabwakiriye neza cyane, twanashimiye Leta y’u Rwanda yashoboye kubakira, nabo turabashimira ko badutekerejeho kuko imyaka yari ibaye myinshi. Ni intambwe ikomeye cyane [...] Nyuma badupfunduriye agaseke bari batuzaniye, batumwe na Leta y’u Burundi.’’

Yakomeje agira ati ‘‘Twabasabye ibyakorwa kugira ngo umuntu atahutse, urabona hariho nk’abantu ibyabo byamaze gufatwa, impunzi ziri hano, amazu yafashwe, amasambu bari bafite yafashwe, amakonti yabo yafunzwe, nk’amafaranga wakoreye ugasanga konti irafunze.’’

Muri ibi biganiro, Nsabimana Yves wahunze ubwo yari Umudepite uhagarariye u Burundi muri EALA, yashimiye leta y’u Rwanda ku bwo kuba yarabafashe neza nk’Impunzi.

Ati “Si ukuvuga ko tuba hanze kuko tubishaka, si ugushaka kuba hanze cyangwa kujya mu bindi bihugu. Ndagira ngo mbabwire ko ntabwo bidushimishije na gato kuba impunzi, kuba tutari mu gihugu cyacu.”

Yakomeje agira ati “Icyatumye abantu bahunga ni umwanzuro w’urukiko rwemerera perezida w’u Burundi kongera kwiyamamaza bwa gatatu, uriya mwanzuro n’ubu niwo mukigenderaho. Mwafashe amasezerano ya Arusha murayasesa.”

Ntadohoka yanavuze ko hari n’abahungiye mu Rwanda ariko kuri ubu bakaba bashakishwa n’ubutabera bw’u Burundi, barimo n’abanyamakuru bityo bakaba batinya ko bahungutse bashobora gutabwa muri yombi.

Ati ‘‘Hari n’abafite impapuro zibasabira gutabwa muri yombi, bashakishwa n’ubutabera mpuzamahanga, urumva ntashobora kugenda bahita bamufata, kandi tuziko Urukiko rwo muri aka Karere ka Afurika y’Iburasirazuba rwaciye urubanza ruvuga ko izo mpapuro bashyiriweho zitari iz’ukuri.’’

Yakomeje agira ati ‘‘Ibituma byose duhunguka birahari, bakurikije amategeko twataha. Ntabwo twahunze ko turi abasirikare ngo turatera leta [...] Izo nzitizi zose nizivaho tuzataha, erega twese igihugu ni icyacu turagikunda.’’

Ku rundi ruhande ariko, Ntadohoka yagaragaje icyizere bafitiye Perezida Ndayishimiye, ashimangira ko afite ubushake bwo gukemura ibibazo byose u Burundi bufite birimo n’ibyatumye aba baturage bahunga.

Ati “Icyizere cya mbere ni uko, urabona aba bantu baje i Burundi ntabwo twari tuzi ko bashobora kuza kutureba hano, icyo ni icyizere cya mbere. Urumva baje batwegera, ni intambwe ikomeye.”

Abafite akangononwa bamazwe impungenge

Nyuma y’ibiganiro byahuje impande zombi ndetse byitabiriwe n’Abahagarariye Minisiteri Ishinzwe Ibikorwa by’Ubutabazi mu Rwanda, Umunyamabanga Uhoraho muri Minisiteri y’Umutekano mu Burundi Lt Gen. de Police, André Ndayambaje yamaze impungenge impunzi z’Abarundi ziri mu Rwanda.

Ati “Turagira ngo tubashyikirize ubutumwa bw’uko Leta y’u Burundi yifuza kubakura mu buzima barimo kubera ko nta mpamvu n’imwe yerekeye iy’umutekano cyangwa ku bukungu yatuma baguma hanze ahubwo bagende gufatanya n’abandi Barundi kubaka igihugu , kubaka iterambere ry’igihugu nabo biteze imbere.”

Yakomeje agira ati “Twongere dukure umutwaro ku gihugu cy’u Rwanda, umutwaro wo gufasha izo mpunzi kugira ngo nabo bashobore gukomeza ibikorwa byabo.”

Lt Gen. de Police, André Ndayambaje yavuze ko ibibazo byose bagejejweho n’Abarundi bahungiye mu Rwanda babyakiriye kandi babijeje ko bazabiganiraho n’izindi nzego bigashakirwa umuti.

Ati “Hari abafite ibibazo by’imitungo, iby’ubutabera n’ibindi bitandukanye, ibyo nabyo tuzabigeza ku nzego zibishinzwe, hanyuma nabo impamvu zatuma badataha ziveho, babashe guhunguka. Ni uguhunguka ubishaka ariko kandi ugahunguka umutima utuje kandi utekanye.”

Umunyamabanga Uhoraho muri Minisiteri ishinzwe ibikorwa by’ubutabazi Philippe Habinshuti, yashimye intambwe yatewe n’u Burundi avuga ko u Rwanda rwiteguye gukomeza gufatanya nabwo mu gucyura impunzi zifuza gutaha ku bushake.

Ati “Ni igikorwa gikomeza harimo n’abatashye mu Cyumweru gishize, ariko turebye mu mwaka wa 2021 ukagereranya na 2022, urabona ko baragabanutse baba bakeya akaba ari nayo mpamvu twishimiye kwakira bagenzi bacu b’i Burundi baje muri gahunda yo kugira ngo bashishikarize Abarundi gutaha.”

Habinshuti yavuze ko u Rwanda nk’igihugu gifite ubunararibonye ku bijyanye no gucyura impunzi, rwashimye intambwe yatewe n’u Burundi kuko ari iganisha ku gucyemura ibibazo bihari.

Ati “Ni gahunda nziza ngira ngo no mu byo twaganiriye twabagaragarije ku bunararibonye natwe dufite, tubereka ko ariyo ntambwe ya mbere kuko umuntu wahunze igihugu ,ikintu cya mbere cyatuma afata umwanzuro wo gusubira muri icyo gihugu ni uko ubuyobozi bumugaragariza ko icyatumye ahunga cyangwa n’ibyamubuza gusubirayo byose bidahari.”

Ibiganiro byahuje intumwa z’u Rwanda n’u Burundi kuri uyu wa Mbere kandi byanitabiriwe na Ndèye Aissatou Masseck Ndiaye uhagarariye Ishami ry’umuryango w’Abibumbye ryita ku Mpunzi, UNHCR, mu Rwanda.

Umuyobozi uhagarariye Impunzi ziri mu Rwanda, Patrice Ntadohoka yabanje kwibutsa impamvu yatumye bahunga
Umunyamabanga Uhoraho muri Minisiteri y’Umutekano mu Burundi Lt Gen. de Police, André Ndayambaje yamaze impungenge impunzi z’Abarundi ziri mu Rwanda
Umunyamabanga Uhoraho muri Minisiteri ishinzwe ibikorwa by’ubutabazi Philippe Habinshuti, yashimye intambwe yatewe n’u Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .