00:00:00 IGIHE NETWORK KN KINYARWANDA EN ENGLISH FR FRANCAIS

U Burayi bwijeje u Rwanda ubufasha mu kugera ku bukungu buciriritse mu 2035

Yanditswe na Akayezu Jean de Dieu
Kuya 22 Ukuboza 2022 saa 08:17
Yasuwe :

Ambasaderi w’Umuryango w’Ubumwe bw’u Burayi mu Rwanda, Belen Calvaro Uyarra yavuze ko uyu muryango uzakomeza gushimangira ubufatanye n’imikoranire myiza mu gufasha u Rwanda kugera ku ntego yo kugira ubukungu buciriritse mu 2035.

Ni ibyo yatangaje kuri uyu wa 21 Ukuboza 2022, ubwo yaganiraga n’itangazamakuru nyuma yo kwakirwa na Perezida w’Inteko Ishinga Amategeko, Umutwe w’Abadepite, Mukabalisa Donatille.

Aba bombi bahuriye mu cyumba cy’Inteko Ishinga Amategeko mu biganiro byitabiriwe na ba Visi Perezida b’Umutwe w’Abadepite , Edda Mukabagwiza na Sheikh Musa Fazil Harerimana.

Amb Uyarra yashimiye ibiganiro yagiranye na Depite Mukabalisa avuga ko bishimangira umubano mwiza ukomeje kuranga u Rwanda na EU.

Ati “Ibi biganiro ni amahirwe akomeye yo kurebera hamwe ibikomeje kuranga umubano mwiza uri hagati y’u Rwanda na EU no kurebera hamwe inzego zitandukanye twafatanyamo kandi zihutirwa.”

“Twanarebye kandi uko EU yakomeza gushyigikira u Rwanda muri gahunda zarwo zo guhindura imibereho n’iterambere ry’Abanyarwanda. EU izakomeza gufasha u Rwanda kugera ku ntego yo kuba igihugu gifite ubukungu buciriritse mu 2035.”

U Rwanda rufite intego yo kugira ubukungu buciriritse mu 2035 kandi rukaba rwateye imbere mu 2050 mu gihe ubukungu bwaba bwihuta ku kigero cya 10%, ku buryo Umunyarwanda yazaba yinjiza 12.476 $ ku mwaka, ni ukuvuga asaga miliyoni 10 Frw ku mwaka.

Imibare y’Ikigega Mpuzamahanga cy’Imari, IMF, igaragaza ko kugeza ubu umuturage w’u Rwanda yinjiza nibura $912,7 [hafi ibihumbi 970Frw] ku mwaka. Ni imibare ya 2022.

Ni mu gihe intego ya 2035 ni uko Umunyarwanda azaba yinjiza $4.036 mu gihe biteganyijwe ko mu 2050, Umunyarwanda azaba yinjiza $12.476 ku mwaka[ni ukuvuga arenga miliyoni 1,3Frw].

Amb Uyarra ati ‘‘Turimo gukorana bya hafi na Guverinoma y’u Rwanda kandi tuzakomeza gushyigikira icyerekezo 2050. Turi gukorana mu burezi, dushyigikira urubyiruko kugira ngo rubashe kugera iterambere rukoresheje ikoranabuhanga rigezweho.’ EU ihuza neza na gahunda y’iterambere y’u Rwanda.”

Depite Mukabalisa yavuze ko ibiganiro byabaye hagati y’impande zombi byagarutse ku nzego zitandukanye EU ifatanyamo n’u Rwanda kandi hagaragajwe ubushake bwo gukomeza gukorana bya hafi.

Ati “Turashimira inkunga badutera mu rwego rw’ubuhinzi, uburezi, ingufu, ubuzima […] mu nzego nyinshi zigira uruhare mu kuzamura ubukungu n’ubuzima bw’igihugu cyacu hanyuma tunabashimira inkunga bateye abasirikare n’abapolisi bacu bari mu butumwa bw’amahoro muri Mozambique.”

“Ikindi twishimiye ni inkunga batera Inteko Ishinga Amategeko y’u Rwanda, idufasha cyane cyane mu nshingano zacu zo kumenya no kugenzura ibikorwa bya Guverinoma ariko no gushyiraho amategeko twumvise ibitekerezo by’abaturage, hanyuma tugaragaza ubushake bwo gukomeza guteza imbere uwo mubano hagati ya EU n’u Rwanda.”

Mu byo aba bayobozi banaganiriyeho kandi birimo n’inkunga ya Miliyoni 20 z’Amayero uyu muryango uherutse guteramo inkunga ingabo z’u Rwanda na Polisi mu gihugu cya Mozambique, aho barimo kugarura amahoro n’umutekano muri cyo gihugu.

Inama nkuru y’Umuryango w’Ubumwe bw’u Burayi niyo yemeje ko iyi nkunga izatangwa binyuze mu kigega cy’uwo muryango gishinzwe gutera inkunga ibikorwa by’amahoro cyizwi nka European Peace Facility.

Minisitiri w’Ububanyi n’amahanga n’ubutwererane, Dr. Vincent Biruta yavuze ko u Rwanda rwakiriye neza iyo nkunga.

Yagaragaje ko izafasha inzego z’umutekano z’u Rwanda mu bikorwa byo kurwanya imitwe y’iterabwoba muri Cabo Delgado, u Rwanda rufatanyamo na Mozambique.

Minisitiri Biruta avuga ko iyo nkunga izafasha ingabo na polisi muri Cabo Delgado kubona ibikoresho n’ibindi byangombwa kugira ngo amahoro n’umutekano bigaruke muri iyo ntara ndetse n’impunzi n’abakuwe mu byabo basubire iwabo mu ituze n’umutekano usesuye.

Muri Nyakanga umwaka ushize wa 2021 nibwo u Rwanda rwatangiye kohereza Ingabo na polisi kurwanya ibyihebe mu ntara ya Cabo Delgado.

Ambasaderi w’Umuryango w’Ubumwe bw’u Burayi mu Rwanda, Belen Calvaro Uyarra yakiriwe n’abagize Inteko Ishinga Amategeko y’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .