U Bufaransa bwahaye u Rwanda miliyari zisaga 50 Frw zirimo izizifashishwa mu guhangana na COVID-19

Yanditswe na Rabbi Malo Umucunguzi
Kuya 30 Kamena 2020 saa 12:23
Yasuwe :
0 0

Guverinoma y’u Rwanda n’iy’u Bufaransa binyuze mu kigo cyabwo gishinzwe iterambere (AFD), zashyize umukono ku masezerano afite agaciro ka miliyoni 49.5 z’amayero (asaga miliyari 53 Frw), yo kwifashisha mu guhangana n’icyorezo cya Coronavirus no guteza imbere imyigishirize y’imyuga n’ubumenyingiro.

Ayo masezerano yashyizweho umukono kuri uyu wa Kabiri na Minisitiri w’Imari n’Igenamigambi, Dr Uzziel Ndagijimana, Umuyobozi Mukuru wa AFD (Agence Française de Développement) Rémy Rioux na Chargé d’affaires w’u Bufaransa mu Rwanda, Jérémie Blin.

Ni amasezerano yiyongereye mu bindi bikorwa byo kuzahura umubano w’u Rwanda n’u Bufaransa, nk’uko biheruka gushimangirwa na Perezida Paul Kagame na mugenzi we Emmanuel Macron.

Harimo amasezerano y’inguznayo y’igihe kirekire ya miliyoni 40 z’amayero (asaga miliyari 43 Frw) azanyuzwa mu ngengo y’imari, agenewe ibikorwa byo guhangana n’icyorezo cya Coronavirus no guhangana n’ingaruka zayo ku bikorwa bitandukanye n’imibereho y’abaturage.

Zizifashishwa mu kubaka ubushobozi bwo gupima COVID-19 haba mu kugura ibipimo cyangwa kongera ubushobozi bwa za laboratwari, gushyiraho ibigo bishyirwamo abanduye cyangwa bakekwaho iburwayi, no kongera ubushobozi bwo kwita ku banduye barimo kuvurwa.

Mu buryo bw’igihe kirekire kandi zizafasha mu gukomeza urwego rw’ubuzima mu gihugu no kubaka ubushobozi bw’abazahajwe n’ingaruka za COVID-19. Ku bijyanye n’ubuvuzi, ni gahunda izashyirwa mu bikorwa n’Ikigo cy’Igihugu cy’Ubuzima, RBC.

Ku ruhande rw’imibereho y’abaturage by’umwihariko, uyu mushinga uzagira uruhare mu gufasha mu buryo bw’inkunga izahabwa imiryango igera ku 150.000; imiryango 190.000 ihabwe imirimo rusange ariko ibyara inyugu; hanatangwe ibiribwa ku ngo 75.000 irimo abagore batwite n’abana bari munsi y’imyaka ibiri; hatangwe ibiribwa n’inkunga ku ngo 212,000 zaakoraga imirimo iciriritse ubu yahungabanye batafashijwe muri gahunda zisanzwe za leta; inunganire abantu miliyoni 1.9 mu misanzu y’ubwisungane mu kwivuza, itangwa muri RSSB.

Iyi gahunda y’imibereho myiza yo izakurikiranwa n’Ikigo Gishinzwe Kongerera Ubushobozi Inzego z’Ibanze, LODA.

Uretse izo miliyoni 40 z’amayero zizatangwa nk’inguzanyo, AFD hari na miliyoni 2 z’amayero izatanga nk’impano muri Croix Rouge, azakoreshwa mu gufasha ingo zibikeneye, ku bufatanye n’ubuyobozi bw’igihugu,

Izo miliyoni 42 z’amayero muri rusange zizajya mu guhangana na COVID-19, zijyanye na gahunda ibihugu by’i Burayi byiyemeje yo gufasha abafatanyabikorwa babyo mu guhangana na COVID-19, binyuze mu cyo bise "Team Europe".

Andi mafaranga yahawe u Rwanda ni impano ya milyoni 5.8 z’amayero (miliyari zisaga 6 Frw), agenewe guteza imbere imyigire mu mashuri y’imyuga n’ubumenyingiro. Muri iyo myigire hazaba harimo no kwigisha ururimi rw’Igifaransa.

Hari na miliyoni 1.7 z’amayero zizatangwa na AFD mu isura y’ubufasha mu bya tekiniki, bigizwemo uruhare n’ikigo Expertise France, bikazageza inkunga y’u Bufaransa yose hamwe kuri miliyoni 7.5 z’amayero.

Umuyobozi Mukuru wa IFD, Rémy Rioux, aheruka mu Rwanda muri Kamena 2019; rwari rwo rwa mbere umuyobozi w’icyo kigo akoreye mu Rwanda guhera mu 1992.

Yagize ati "Nshimishijwe no kubona urugendo rumaze gukorwa mu gusubukura ibikorwa bya AFD mu bufatanye na Guverinoma y’u Rwanda."

Chargé d’affaires w’u Bufaransa mu Rwanda, Jérémie Blin, avuga ko aya masezerano yasinywe afite akamaro gakomeye mu kuzahura umubano w’u Bufaransa n’u Rwanda.

Yakomeje ati "Ndishimiye cyane. Inguzanyo y’u Bufaransa ya miliyoni 40 inyuzwa ku ngengo y’imari ni ikimenyetso cy’ubushake bw’u Bufaransa bwo kwifatanya n’u Rwanda mu guhangana n’ibibazo by’ubuzima bishingiye ku cyorezo cya COVID-19 no gushyigikira gahunda zigamije kwita ku mibereho y’abaturage bagizweho ingaruka n’icyorezo."

Guverinoma y’u Rwanda iheruka kwemeza ko mu mwaka utaha w’ingengo y’imari, izakoresha miliyari miliyari 2876.9 Frw. Amafaranga akomoka imbere mu gihugu azaba ari 68.3%, mu gihe inguzanyo u Rwanda ruzishyura zizagera kuri miliyari 497 Frw, bingana na 17.3% by’ingengo y’imari yose.

U Rwanda n’u Bufaransa bikomeje kuzahura umubano, aho Ambasade y’icyo gihugu ikomeje imyiteguro yo gufungura Ikigo Ndangamuco cy’Igifaransa, Centre Culturel Francophone, mbere y’uko uyu mwaka wa 2020 urangira.

Ku wa Kabiri, u Rwanda n’u Bufaransa binyuze mu Kigo cyabwo gishinzwe Iterambere (AFD), byasinye amazerano afite agaciro ka miliyari 53 Frw yo kwifashisha mu guhangana n’icyorezo cya Coronavirus no guteza imbere imyigishirize y'imyuga n'ubumenyingiro. Yashyizweho umukono na Minisitiri w’Imari n’Igenamigambi, Dr Uzziel Ndagijimana na Chargé d'affaires w’u Bufaransa mu Rwanda, Jérémie Blin.
Minisitiri Ndagijimana asinya kuri aya masezerano
Chargé d’affaires w’u Bufaransa mu Rwanda, Jérémie Blin asinya ku masezerano n'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .