00:00:00 IGIHE NETWORK KN KINYARWANDA EN ENGLISH FR FRANCAIS

U Budage bugiye gusubiza u Rwanda uduhanga tw’abantu 904 twatwawe mu bukoloni

Yanditswe na IGIHE
Kuya 19 Mutarama 2023 saa 10:07
Yasuwe :

Leta y’u Budage yatangaje ko igiye gutangira gahunda yo gusubiza ibihugu bya Afurika yakoronijwe bimwe mu bisigazwa by’abantu byiganjemo uduhanga twagiye dutwarwa mu gihe cy’ubukoloni.

Iki cyemezo cyatangajwe ku wa Gatatu tariki 19 Mutarama n’inzu ndangamurage y’i Berlin.

Mu bushakashatsi u Budage bwari bumaze imyaka bukorera ku duhanga tw’abantu 1 135, byaje kugaragara ko utugera kuri 904 ari utw’abantu bakomokaga mu Rwanda, 202 bakaba barakomokaga muri Tanzania, mu gihe abandi 22 ari abo muri Kenya. Abandi 7 baburiwe inkomoko ihamye.

Umuyobozi w’Umuryango ‘Prussian Cultural Heritage Foundation’ ari nawo ucunga inzu ndangamurage y’i Berlin, Hermann Parzinger yavuze ko ubu bushakashatsi bwari bugamije gusubiza ibi bisigazwa by’abantu mu bihugu bakomokamo.

Ati “Intego nyamukuru y’ubu bushakashatsi ku bisigazwa by’abantu ni ukugira ngo basubizwe mu bihugu bakomokagamo. Twiteguye gutangira gushyira mu bikorwa iyi gahunda, kuri ubu dutegereje ibyemezo by’ibihugu aba bantu bakomokamo.”

Inyandiko za ‘Prussian Cultural Heritage Foundation’ zigaragaza ko ibi bisigazwa by’abantu byagiye bigera mu Budage mu buryo butandukanye, hari abagiye batabururwa aho bashyinguwe ndetse n’abagiye bicwa n’Abadage ibisigazwa byabo bikajyanwa kugira ngo bikorerweho ubushakashatsi ku buzima n’imibereho y’Abanyafurika.

Hashize imyaka u Budage bufashe icyemezo cyo gusubiza ibihugu bya Afurika ibisigazwa by’imibiri y’abaturage n’ibihangano byagiye byibwa mu gihe cy’ubukoloni.

U Budage bwakoronije ibihugu bitandukanye muri Afurika y’Iburasirazuba birimo u Burundi, u Rwanda, igice kimwe cya Tanzania n’icya Mozambique. Nyuma yo gutsindwa intambara ya kabiri y’Isi u Budage bwambuwe ibi bihugu bifatwa n’abandi ari nabwo u Rwanda rwahabwaga u Bubiligi.

U Budage bugiye gusubiza u Rwanda uduhanga tw’abantu 904 twatwawe mu bukoloni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .