Tuyiringire uheruka kurekurwa na Uganda yavuze uko Abanyarwanda bakoreshwa imirimo y’uburetwa

Yanditswe na Evariste Nsengimana
Kuya 21 Ukwakira 2019 saa 06:56
Yasuwe :
0 0

Tuyiringire Elias w’imyaka 24 ukomoka mu Karere ka Musanze mu Murenge wa Gataraga, uheruka kurekurwa muri Gereza za Uganda aho yari afungiye, yavuze uko we n’abandi banyarwanda bakoreshwa imirimo ivunanye irimo guhinga, kwikorera imitwaro iremerewe utabishoboye agakubitwa azira ubusa.

Uyu musore avuga ko yavuye mu rugo ajyanywe n’umuntu wamubwiraga ko agiye kumuha akazi ko kumukorera mu rugo no kumuhingira muri Uganda ku wa 18 Gashyantare 2018, akaba yaragarutse ku wa Kane w’icyumweru gishize arangije igihano yakatiwe.

Nyuma yo kuhagera yatangiye akazi bamuhemba imitwaro 15 asaga ibihumbi 30Frw ku kwezi ariko nyuma y’amezi atatu hatangira gukorwa imikwabu yo gushakisha abanyarwanda ari nayo yaje gufatirwamo.

Ati “Mu gihe mbyutse nsanga abasirikare baraririye aho nararaga bahita bamfata ngira ngo ni njye jyenyine hari ikosa cyangwa ikindi kintu banshinja, bambwira ko nisobanura ngeze kuri Polisi.”

Nyuma yo kugenda bageze ku muhanda ahasanga abandi bahicaje, ababajije impamvu, bamubwira ko bazira ko ari abanyarwanda baba muri icyo gihugu.

Ubwo bahise baburiza imodoka ibajyana kuri sitasiyo ya Polisi ya Kisoro bategereza ko baza wenda kubasubiza mu Rwanda kuko bari bamaze kumenya ko batabashaka muri Uganda, ariko siko byagenze kuko bahafungiwe iminsi 15.

Nyuma bahise babajyana mu Rukiko bababeshya ko uwemera icyo bamushinja aza guhabwa igihano gito naho ugorana akabihakana bamuha ikiremereye.

Ati “Aho nari nicaye naje kwibaza igihano baza kumpa nta kosa nakoze, ari uko ndi muri Uganda, nta muntu nibye nta muntu natutse nta n’icyo nakoze, nanga kubyemera. Ababyemeye umucamanza yabakatiye gufungwa amezi 23.”

Tuyiringire na bagenzi be bafatanywe barenga 30 bahise babajyana muri Gereza ya Kisoro ahamara amezi icyenda atarakatirwa.

Ati “Bansubije imbere y’umucamanza ankatira ku ngufu amezi 15, akuramo icyenda nari maze mfunzwe, nyarangije nibwo naje. Hamwe n’abandi, nta kintu na kimwe baturegaga, batuzizaga ko turi abanyarwanda tuba muri Uganda bitemewe ariko kwemerwa sinzi icyo bisaba kuko buri Munyarwanda wese bamufataga.”

Tuyiringire yavuze ko hari n’abo bakatira imyaka itatu, avugamo nk’umugore witwa Uwimana Yvonne wayikatiwe kandi yari afite n’abana, uyu munsi akaba atazi uko babayeho.

Ati “Imirimo ivunanye turayikora, bakadukubita n’inkoni nyinshi kugira ngo dukore. Irimo kumena amabuye, kwikorera ibiti byo gusaturamo inkwi zo gucanishiriza abafungwa no guhinga ku mbaragara batitaye ngo uri umuntu cyangwa uri imodoka, utashobora kubikora bakagukubita inkoni nyinshi.”

Yavuze ko nubwo bakoreshwaga imirimo ivunanye ntabwo warwara ngo bakuvuze ndetse ko byamugizeho ingaruka uyu munsi akaba nta kintu yakwishoborera.

Baramurekuye ariko amafaranga ibihumbi 75Frw, ibyangombwa yari afite birimo indangamuntu yo mu Rwanda yabisizeyo byose. Avuga ko agereranyije muri Gereza yabonyemo abari hagati ya 50 na 60 bose batagira icyaha bashinjwa uretse kuba muri Uganda ari abanyarwanda.

Tuyiringire yavuze ko amaze kugera mu Rwanda yiruhukije ndetse ko azajya gushima Imana yo yahamukuye, akanatanga ubuhamya bw’inzira yanyuzemo. Ahamya ko hari abanyarwanda bagenzi be bashobora kuba bapfira muri Gereza zaho ariko bakabihisha kugira ngo bitazamenyekana.

Yasobanuye ko umuntu wari umujyanye kumuha akazi yagerageje gutanga amafaranga ngo bamurekure bayanga, agahita arekera aho.

Tuyiringire wari umaze igihe afungiwe muri gereza muri Uganda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza