TAS2019: Minisitiri w’Intebe yasabiye urubyiruko umwihariko mu mishinga y’ikoranabuhanga (Amafoto)

Yanditswe na Rabbi Malo Umucunguzi
Kuya 14 Gicurasi 2019 saa 01:20
Yasuwe :
0 0

Minisitiri w’Intebe, Dr Edouard Ngirente, yavuze ko kuba umugabane wa Afurika ufite urubyiruko rwinshi, rugomba guhabwa umwanya wihariye mu gushaka ibisubizo ufite binyuze mu ikoranabuhanga, kugira ngo uzabashe kugera ku ntego z’iterambere rirambye.

Kuri uyu wa Kabiri nibwo i Kigali hagatangiye inama izwi nka Transform Africa Summit, igamije gushakira hamwe ibisubizo by’ibibazo umugabane ufite binyuze mu ikoranabuhanga.

Ni inama Dr Ngirente yavuze ko ibereye igihe kuko ishingiye ku byifuzo bya Guverinoma zo muri Afurika n’abikorera, hagamijwe gushyiraho uburyo bubyaza umusaruro impinduka mu ikoranabuhanga, kongera ishoramari no guhanga imirimo.

Yavuze ko Afurika ifite urubyiruko rwiyongera cyane aho hiyongereyo miliyoni 140 ugereranyije no mu myaka icumi ishize, ndetse bitarenze umwaka wa 2028 umugabane wa Afurika uzaba ufite abantu hafi miliyari imwe bari munsi y’imyaka 25.

Ibyo ngo byerekana ko urubyiruko rukwiye kugaragara nk’amahirwe uyu mugabane ufite mu gushaka ibisubizo ku bibazo ufite.

Yagize ati “Ku Isi hose, ibigo bihangwa birangajwe imbere n’urubyiruko rurimo guhanga imirimo ndetse rugahindura imibereho y’aho rutuye. Ruzana ibitekerezo bishya bikenewe mu guteza imbere guhanga udushya no guhatana. Ikoranabuhanga ni ingenzi cyane. Ritanga amahirwe yo kugera ku kwishyira hamwe nk’umugabane kandi mu buryo bwihuse. Byongeye, ikoranabuhanga rikuraho imipaka isanzwe imaze igihe iranga ibihugu byacu.”

“Kubera iyo mpamvu, Guverinoma y’u Rwanda binyuze muri gahunda igamije kwihutisha iterambere mu 2017-2024, iteganya gutanga ubumenyi mu ikoranabuhanga ku rubyiruko rwose rufite hagati y’imyaka 16-30 bitarenze 2024. Ibi bizashoboka binyuze mu gushyira mu bikorwa gahunda yo gutanga ubumenyi mu by’ikoranabuhanga. Iyi gahunda ifite intego y’uko ubumenyi mu ikoranabuhanga nibura buzagera kuri 60% mu bakuru bitarenze 2024.”

Yavuze ko ku bw’iyi mpamvu, ibiganiro birimo kuba muri iyi nama biziye igihe kandi ari ingenzi, ariko hejuru y’ibiganiro, ubufatanye ari ngombwa mu guhindura amateka y’ugu mugabane, hagatezwa imbere impinduka mu mibereho n’ubukungu by’abawutuye.

Minisitiri w’Ikoranabuhanga na Inovasiyo, Ingabire Paula, yavuze ko kongera ishoramari no kubaka ubushobozi bw’abaturage ari ibintu bikwiye kwibandwaho.

Mu bihugu bitandukanye harimo kubakwa ibicumbi bizafasha mu guhanga ibishya nka Smart Village i Cairo, Techno Park/Stellenbosch muri Afurika y’Epfo, Technopole de Dakar, Konza Technopolis muri Kenya na Kigali Innovation City mu Rwanda.

Izi gahunda zose zigamije gufasha ibihugu kugera ku ntego zigamije iterambere rirambye by’umwihariko izirebana no kugabanya ubukene, guhanga imirimo n’iterambere ry’abaturage binyuze mu guhanga udushya n’ikoranabuhanga.

Ishoramari mu ikoranabuhanga muri Afurika, mu mwaka ushize wonyine, iryakozwe mu bigo bito ryarenze miliyari y’amadolari ryari ryitezwe mu 2020. Ibigo by’ikoranabuhanga mu by’imari biza imbere mu bihangwa aho byihariye 39.7% by’amafaranga yose yakusanyijwe, bigakurikirwa n’ibigo by’ikoranabuhanga mu bijyanye n’ubuhinzi.”

Minisitiri Ingabire yakomeje ati “Ariko hakenewe no kongerwa imbaraga no gushishikariza abashoramari gushyira amafaranga mu zindi nzego nk’ikoranabuhanga mu by’ubuzima, ingendo, uburezi, hagamijwe ko iterambere rirambye rigerwaho. Ishoramari rikomeje kwiyongera ariko dukeneye kubyaza umusaruro amahirwe ahari, tugashyiraho gahunda zoroshya kwihangira imirimo, kubona amafaranga no gufasha urubyiruko ruhanga udushya ngo rukemure ibibazo Afurika ifite hifashishijwe ibisubizo twishakamo.”

Minisitiri Ingabire yanavuze ko binyuze muri Kigali Innovation City, u Rwanda rurimo gufungura amarembo mu gushyigikira impano n’ibitekerezo bifatika mu ikoranabuhanga, asaba ko ibigo by’ikoranabuhanga bivuka bikomeza gushyigikirwa.

Umuyobozi wa Smart Africa, Lacina Koné, yavuze ko ikoranabuhanga rishobora gufasha umugabane wa Afurika kugera ku ntego zigamije iterambere rirambye, ariko bigasaba ko riba ryakoreshejwe neza.

Ati “Ryadufasha kuzigeraho neza kandi mu buryo bwihuse. Turi hano kubera ko dusangiye imyumvire ko dushobora kuzana impinduka buri wese yihereyeho ariko tugafatanyiriza hamwe, mu nshingano zacu haba mu nzego za leta, abikorera, amashuri makuru na za kaminuza cyangwa urubyiruko.”

Yavuze ko hari urugendo rugamije impinduka rwatangiwe kandi rugomba kugira umusaruro kuri uyu mugabane ndetse rukarenza ibyo abantu batekereza.

Dr Ngirente yavuze ko iyi nama ibereye igihe kuko igamije impinduka mu ikoranabuhanga
Minisitiri Ingabire Paula yavuze ko uretse kongera ishoramari, hakwiye kujyaho na gahunda zihamye zifasha ibigo bivuka mu bijyanye n'ikoranabuhanga
Iyi nama igamije kwihutisha iterambere hashingiwe ku ikoranabuhanga
Iyi nama yitabiriye n'abakozi mu nzego za leta n'abikorera baturutse mu bihugu bitandukanye

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza