Sudani ntikiri guverinoma ishingiye ku idini ya Islam

Yanditswe na Umwali Zhuri
Kuya 6 Nzeri 2020 saa 12:19
Yasuwe :
0 0

Guverinoma y’inzibacyuho muri Sudani yatangaje ko igiye gutandukanya imyemerere y’idini n’ubuyobozi bw’igihugu, bituma imiterere y’iki gihugu yari imaze imyaka 30 ihinduka kuko cyayoborwaga bijyanye n’amahame y’idini ya Islam.

Minisitiri w’Intebe wa Sudani, Abdalla Hamdok na Abdel-Aziz al-Hilu, ukuriye umutwe uharanira impinduka muri Sudani, baherutse gusinyana amasezerano yemeza ayo mahame. Ni amasezerano yasinyiwe i Addis Ababa muri Ethiopia.

Inyandiko y’ayo masezerano ivuga ko kugira ngo Sudani ibe igihugu kigendera ku mahame ya demokarasi aho abaturage bose baba banganya uburenganzira, Itegeko Nshinga rikwiye kuba rishingiye ku mahame atandukanya idini na leta.

Aya masezerano yemejwe nyuma y’uko guverinoma muri iki gihugu itangiye ibiganiro by’amahoro bigamije guhosha intambara imaze igihe i Darfur ndetse n’ibindi bice by’igihugu byari byarashegeshwe n’umwuka mubi ku buyobozi bwa Omar al-Bashir uherutse kweguzwa.

Kuva mu 1989, Sudani ikiyoborwa na Bashir, yatangiye kwimakaza amategeko akaze ashingiye ku idini ya Islam, byatumye kiba igihugu cyisangwamo cyane n’abafatwa nk’abaterabwoba bakomeye ku Isi bo mu mutwe wa Al-Qaeda ku buryo nka Leta Zunze Ubumwe za Amerika zashyize iki gihugu ku rutonde rw’ibihugu bitera inkunga imitwe y’iterabwoba.

Minisitiri w'Intebe wa Abdalla Hamdok, ni umwe mu bashyigikiye izi mpinduka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .