00:00:00 IGIHE NETWORK KN KINYARWANDA EN ENGLISH FR FRANCAIS

Stade ya Huye iri kuvugururwa amasigamana (Amafoto)

Yanditswe na Mihigo Saddam
Kuya 27 April 2022 saa 10:09
Yasuwe :

U Rwanda ruri kwitegura kwakira imikino mpuzamahanga irimo iyo gushaka itike ya CAN ya 2023 izabera muri Côte d’Ivoire. Gusa, kugeza magingo aya nta Stade yemerewe kwakira irushanwa na rimwe rya CAF na FIFA.

Amaso yerekejwe kuri Stade ya Huye aho iri kuvugururwa amasigamana kugira ngo izabashe kwakira iyo mikino.

Mu 2019 CAF yaburiye amashyirahamwe y’umupira w’amaguru ari mu bihugu bifite stade zitujuje ibyangombwa byo kwakira imikino birimo n’u Rwanda.

Nyuma u Rwanda rwaje gukomorerwa ruhabwa kwakira imikino yo gushaka itike ya CAN 2021 n’igikombe cy’Isi cya 2022 kuri Stade ya Kigali.

Gusa kuri ubu ntabwo byemewe ko ibihugu byari byakomorewe byongererwa iminsi yo kwakira imikino iteganyijwe.

Nyuma y’uko u Rwanda rumenye itsinda ruzashakiramo itike ya CAN 2023, hahise hibazwa aho Amavubi azakirira ibihugu birimo; Sénégal, Mozambique na Bénin.

Hagati ya tariki ya 4-5 Kamena 2022 u Rwanda ruzasura Mozambique i Maputo mbere yo kwitegura kwakira Sénégal hagati ya tariki 13-14 Kamena 2022.

Ku ruhande rw’u Rwanda, biragoye ko umukino wa Amavubi na Sénégal wabera mu Rwanda bitewe n’uko kugeza ubu nta Stade iri mu rwa Gasabo
yemewe na CAF.

FERWAFA yatanze ubusabe bwo kuba havugururwa Stade ya Huye kugira ngo ibyo ibura byongerwemo bityo u Rwanda rutazajya gusaba kwakirira imikino mu mahanga.

Magingo aya, imirimo yo kuvugurura Stade ya Huye yaratangiye ndetse
n’ibisabwa biri gushyirwamo mbere y’uko CAF izongera igasuzuma.

Ibizavugururwa kuri Stade ya Huye kugira ngo Amavubi azahakirire Sénégal

Ubwatsi bwa Stade ya Huye ntabwo CAF yabushize amakenga, byabaye ngombwa ko bufatwaho buke bukajya gusuzumwa ubuziranenge, igisubizo ntikiratangwa.

CAF itegeka ko ikibuga kigomba kuba gifite ibara ry’icyatsi, imirongo igaragara neza mu ibara ry’umweru kandi cyorohera abakinnyi bose kukirukamo.

Amazamu ya Stade ya Huye birasaba ko agomba kuba yimurwa byoroshye kandi akaba ari hafi ku buryo ku munsi w’umukino ashingwa mu myobo bitagoranye.

Intebe zicarwaho n’abasimbura ndetse n’abandi bari muri tekinike, zigomba kuba ziri ahantu hatwikiriye neza kandi hegereye ikibuga kiri
gukinirwamo.

Amatara ya Stade ya Huye agomba kuba amurika neza ku mikino ikinwa nijoro ndetse akaba atajya munsi ya Lux 1200 z’urumuri arekura kandi ikibuga cyose kigaragara neza.

Kuri buri muryango winjira n’usuhoka hagomba kuba hari amagambo ahanditse asobanurira abafana mu rurimi bumva n’igice bicayemo.

Imiryango minini yinjira muri Sade igomba kuba iyobora abayigana mu buryo bwumvikana ndetse hanagagazwa igice umuryango werekezamo abantu.

Aho abanyamakuru binjirira n’aho bakorera hagomba kuba hari ibyapa bihagaragaza kandi hakaba hari ibikenerwa byose bituma abanyamakuru
bakora neza.

Bimwe mu bisabwa aho abanyamakuru bakorera, hari aho gucomeka mudasobwa zabo, internet yihuta no kuba hashyizwe lisiti z’amakipe agiye gukina.

Muri Stade zifite ubushobozi buhambaye usanga hari na televiziyo ishobora kurohereza umunyamakuru kureba mu mashusho agenjwe buhoro (Slow Motions) icyabaye mu kibuga.

Stade ya Huye kandi iri mu zisabwa kuba hari ibirango byerekana ahakorerwa ubutabazi n’ubuvuzi ku buryo abafana bashobora kuhagana bitagoranye.

Stade yubatse nk’uko Stade ya Huye ya imeze (Barbourfields Stadium) igomba kongeramo imisarane itanu yicarwaho mu rwambariro.

Bene izi Stade kandi zirasabwa kuba zifitemo igitanga gikorerwaho masaje (Massage Table), urubaho rw’amayeri rukoreshwa n’abatoza basobanurira abakinnyi imikinire n’amakaramu akoreshwa.

Iki cyumba kandi kigomba kuba kirimo uburyo butuma hazamo umuyaga mwiza uvuye mu byuma byabugenewe (air-conditioning).

Stade zubatse nk’iya Huye zirasabwa kugira icyumba gipimirwamo ibiyobyabwenge bikoreshwa muri siporo, kirimo ibisabwa byose birimo TV, ibitanga umuyaga mwiza, ubwiherero buri aho hafi, kandi bikaba atari buri wese wemerewe kuhinjira.

Stade ya Huye igomba kuzaba ifite aho abanyacyubahiro bashobora gufatira ikawa igice cya mbere cy’umukino kirangiye kandi hakaba harimo intebe zitajya zimurwa ngo zijyanwe ahandi.

Stade ya Huye irasabwa kuba ifite ibyicaro by’abafana biriho nimero ndetse inzego zishinzwe imyubakire zikabanza gukirikirana ishyirwaho rya nimero.

Nyuma yo gushyiramo izo nimero, icyo kigo gitanga raporo igaragaza umubare ntarengwa Stade ifitiye ubushobozi bwo kwakira.

Ahicara abafana naho hari kuvugururwa kuko imvura ibanyagira kandi hatwikiriye
Abiganjemo urubyiruko bahawe akazi mu kuvugurura Stade ya Huye
Aho abakinnyi b'abasimbura bicara naho hazavugururwa
Aho abanyamakuru bicara naho hari kuvugururwa ngo huzuze ibisabwa
Amatara ya Stade ya Huye azavugururwa ku buryo yuzuza ibisabwa
Amazamu yo ku kibiga cya Stade ya Huye nayo yakuwemo agiye kuvugururwa
Buri gice kigize Stade ya Huye kizavugururwa
Ubwiherero bw'iyi stade buzatangira kuvugururwa
Hari gukorwa ibishoboka byose ngo Stade ya Huye ivugururwe ijye ku rwego rwo kwakira imikino mpuzamahanga
Hari icyizere ko Stade ya Huye izavugururwa ikagira ubushobozi bwo kwakira imikino mpuzamahanga
Ibice bitandukanye bya Stade ya Huye biri kuvugururwa
Ibikoreso byo kuvugurura Stade ya Huye byamaze kuhagezwa
Igice gikunze guturukamo amazi yuzura mu kibuga cya Stade ya Huye nacyo kiri kuvugururwa
Imbere muri Stade ya Huye naho hari kuvugururwa
Imbere mu byumba bya Stade Huye hari kuvugururwa kuko hatari hujuje ibisabwa
Intebe zagenewe abareba imikino muri Stade ya Huye nazo ziri kuvugururwa
Kuri ubu Stade ya Huye yafunzwe by'agateganyo kugira ngo ivugururwe
Imirimo yo kuvugurura Stade ya Huye irarimbanyije
Mu byo bari gutunganya harimo inzira y'amashanyarazi
Stade ya Huye ifite ikibazo ko ahicara abanyacyubahiro banyagirwa iyo imvura iguye
Stade ya Huye iheruka kwakira umukino w’Ikipe y’Igihugu mu Ugushyingo 2018
U Rwanda ruri kwitegura kwakira imikino mpuzamahanga irimo iyo gushaka itike ya CAN ya 2023
Ubwiherero bwa Stade ya Huye nabwo buri kuvugururwa

Amafoto: Prudence Kwizera


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .