Imbamutima za Musenyeri Kambanda nyuma yo kugirwa Cardinal

Yanditswe na Iradukunda Serge
Kuya 26 Ukwakira 2020 saa 10:13
Yasuwe :
0 0

Hashize umunsi umwe mu Rwanda hatashye inkuru nziza ko Arkiyepiskopi wa Kigali, Musenyeri Antoine Kambanda yagizwe cardinal. Kumva ko nyuma y’imyaka 120 Kiliziya Gatolika igeze mu gihugu habonetse cardinal wa mbere byashimishije benshi barimo na nyirubwite wemeza ko yatunguwe n’iyi nkuru.

Ku Cyumweru nibwo Umushumba wa Kiliziya Gatolika ku Isi, Papa Francis, yashyize hanze urutonde rw’aba cardinal bashya 13. Ni amazina Papa yatangajwe nyuma y’isengesho rizwi nka Angelus ryasomewe ku rubuga rwa Mutagatifu Petero i Roma saa Sita z’amanywa.

Mu kiganiro yagiranye n’ikinyamakuru cya Vaticannews kuri telefoni, Musenyeri Kambanda, yavuze ko iyi nkuru nziza yamusanze mu kazi ke ka buri munsi iramutungura cyane.

Ati “Byarantunguye cyane, ntabwo nari mbyiteze. Nari ndi mu mirimo yanjye isanzwe ya buri munsi, umuntu ampamagaraga ambwira amakuru. Bwa mbere sinabyizeye. Byarantunguye. Ndashima Imana, ni umwanditsi w’amateka: amateka muri rusange cyangwa amateka y’umuntu.”

Yakomeje avuga ko atigeze arota kugera kuri uyu mwanya agereranya n’inema yahawe na Rurema.

Ati "Ni nyagasani wabishatse. Nkunda Imana kandi niyemeje kuyikorera mu buzima bwanjye. Kuba cardinal bimpa amahirwe yo gukorera Imana byisumbuyeho. Ndashimira cyane nyirubutungane ku bwo kumpa izi nshingano. Nkunda kiliziya, nshimishwa no gukorera Kiliziya kandi ibi bizampa amahirwe yo kuyikorera byisumbuyeho.”

Abajijwe uko yakira icyizere akomeje kugirirwa n’aba Papa dore ko ku wa 7 Mata 2013 yagizwe Musenyeri wa Diyosezi ya Kibungo nyuma y’imyaka itanu agirwa Arkiyepiskopi wa Kigali ubu akaba yagizwe Cardinal, Musenyeri Kambanda yavuze ko ari ibyishimo ariko biherekejwe n’inshingano ziremereye.

Ati “Ndashima Imana ku bw’ubuntu bwayo bukora muri Kiliziya yayo, kuri ubu ihura n’imbogamizi zitandukanye. Tugomba gukora cyane mu guhererekanya no kugira ngo ubutumwa bwo gukizwa bwumvikane neza. Birakomatanyije ni ibyishimo, umutwaro ukomeye n’umukoro.”

Musenyeri Kambanda yakomeje ashimira Abasenyeri bo mu Rwanda n’abo mu Karere k’Ibiyaga Bigari abizeza gukomeza ubufatanye no mu nshingano nshya yahawe.

Ati “Ndashimira cyane bagenzi banjye b’Abasenyeri mu Rwanda no mu karere kubera ubufatanye, ubumwe n’umurimo dukora. Niba Papa yarangize Cardinal, binashingiye ku cyizere, imirimo n’inshingano za gishumba z’umuryango wose. Ndizeza bagenzi banjye n’abo mu karere ubufatanye bwanjye n’ubumwe by’umwihariko mu bijyanye n’amahoro n’ubwiyunge muri aka karere. Turi mu bihe bikomeye, kuri ubu byanivanze n’icyorezo cya COVID-19 nk’abigisha dukeneye kuyobora abantu ku mahoro,ubuvandimwe.”

Musenyeri Kambanda yabaye Cardinal wa mbere ukomoka mu Rwanda akaba uwa gatatu uvuye mu Ihuriro ry’Abagize Inama y’Abepisikopi Gatolika bo muri Afurika yo Hagati (ACEAC) ihuriza hamwe u Rwanda, u Burundi na Repubulika Iharanira Demokarasi ya Congo.

Mu nshingano z’aba-cardinal harimo gutora Papa, kumugira inama ndetse bagira n’uruhare rukomeye mu miyoborere ya Vatican.

Aba ba-cardinal 13 bashya bazimikwa ku wa 28 Ugushyingo 2020. Barimo icyenda bafite munsi y’imyaka 80 ari nabo bemererwe kwitabira inama nkuru y’aba-cardinal igihe baba bagiye gutora Papa (conclave) bakanatora, n’abandi bane bayirengeje, bivuze ko bo bataba bemerewe gutora.

Musenyeri Kambanda ni muntu ki?

Musenyeri Kambanda yavutse ku itariki ya 10 Ugushyingo 1958, avukira muri Arkidiyosezi ya Kigali. Ubu afite imyaka 62.

Amashuri abanza yayigiye i Burundi no muri Uganda, amashuri makuru ayakomereza muri Kenya. Yarangije amasomo ya Tewolojiya mu Iseminari nkuru ya Nyakibanda muri Diyosezi ya Butare.

Mu ruzinduko rwamaze iminsi ibiri Papa Yohani Pawulo II yagiriye mu Rwanda mu 1990, ku wa 8 Nzeri nibwo yahaye ubusaserdoti abadiyakoni 31, mu misa yabereye i Mbare, ni mu Murenge wa Shyogwe mu Karere ka Muhanga.

Barimo 25 bo mu Rwanda na batandatu bo muri Repubulika ya Demokarasi ya Congo. Benshi muri bo ubu ntibakiriho, ariko mu bakiriho harimo babiri babaye abasenyeri. Abo ni Arkiyepiskopi wa Kigali Antoine Kambanda n’Umushumba wa Diyosezi ya Ruhengeri, Musenyeri Harorimana Vincent.

Agihabwa ubusaserdoti, Musenyeri Kambanda yatangiriye ubutumwa bwe nk’umwarimu akaba n’ushinzwe amasomo mu iseminari Nto ya Ndera i Kigali.

Kuva mu 1993 kugeza mu 1999 yagiye gukomereza amasomo muri Kaminuza i Roma, ahakura impamyabushobozi ihanitse muri Tewolojiya. Kuva mu 1999 kugera mu 2005 yabaye umuyobozi wa CARITAS ya Arkidiyosezi ya Kigali, aba n’Umuyobozi wa Komisiyo y’Ubutabera n’amahoro muri Arkidiyosezi ya Kigali.

Yabifatanyaga no kwigisha mu iseminari Nkuru ya Nyakibanda, akaba n’umuyobozi wa Roho mu iseminari Nkuru ya Rutongo. Kuva 2005 kugeza 2006 yabaye umuyobozi wa seminari Nkuru ya Kabgayi, mu 2006 kugera 2013 yagizwe Umuyobozi wa Seminari Nkuru ya Nyakibanda.

Ku itariki ya 3 Gicurasi 2013 nibwo Papa Francis yamutoreye kuba Umushumba wa Diyosezi ya Kibungo. Intego ye ni “Ut vitam habeant” bivuze ngo ‘Bagire ubuzima’.

Mu Ugushyingo 2018 nibwo Umushumba wa Kiliziya Gatolika ku Isi, Papa Francis, yemereye Musenyeri Thadée Ntihinyurwa wayoboraga Arkidiyosezi ya Kigali, kujya mu kiruhuko cy’izabukuru, amusimbuza Musenyeri Kambanda Antoine, wanayoboraga Diyosezi ya Kibungo.

Ibirori byo kumushinga iyi Arkidiyosezi ku mugaragaro byabereye kuri Stade Amahoro ku wa 27 Mutarama 2019.

Musenyeri Antoine Kambada wagizwe cardinal yavuze ko atigeze arota kugera kuri uru rwego

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .