“Sindi muto wo kutagira umumaro”, igitabo gikubiyemo amahirwe urubyiruko rw’uyu munsi rufite

Yanditswe na Uwimana Abraham
Kuya 23 Ukwakira 2020 saa 01:03
Yasuwe :
0 0

Politiki ya Leta y’u Rwanda ni politiki idaheza aho buri wese mu cyiciro cye yisanga muri gahunda zose z’iterambere ry’igihugu. Kuri ubu urubyiruko rushyirirwaho gahunda zarwo zihariye zirufasha kwiteza imbere no kuzamura imibereho yarwo ndetse n’ubukungu bw’igihugu.

Leta y’u Rwanda mu kubaka ubushobozi bw’urubyiruko yakoze byinshi byatumye mu 2010, u Rwanda rwakira inama ngarukamwaka y’urubyiruko rwibumbiye mu Muryango w’Ibihugu Bivuga Ururimi rw’icyongereza, ruba urwa kabiri ruyakiriye nyuma ya Ghana.

Igitabo “Sindi muto wo kutagira umumaro”, gikubiyemo byinshi bireba urubyiruko rw’u Rwanda, cyerekana neza aho rwavuye n’aho rugeze, uko rwari rubayeho mu bihe bya kera ugereranyije n’ubu, ibikirubereye imbogamizi n’uburyo byakemuka ndetse n’amahirwe ahari rukwiye kubyaza umusaruro.

Ni igitabo cyanditswe na Dr Rusibana Claude, umwarimu muri Kaminuza ya Kigali, akaba n’umushakashatsi mu bijyanye n’amabanki, ubucuruzi na politiki y’ubukungu n’ishoramari, yafatanyije na Musoni Protais, Umuyobozi Mukuru w’Umuryango, PAM Rwanda.

Musoni yakoze imirimo itandukanye muri Leta harimo ko yabaye umuyobozi w’Umujyi wa Kigali, yabaye Minisitiri w’ubutegetsi bw’igihugu ndetse na Minisitiri ushinzwe ibikorwa by’inama y’abaminisitiri, yigeze kandi no kuba perefe wa perefegitura ya Kibungo kera.

Dr Rusibana aganira na IGIHE yavuze ko igitekerezo cyo kwandika iki gitabo yakigize mu 2016, ubwo we n’urundi rubyiruko bari mu muganda wo kuremera umukecuru utishoboye bamwubakira inzu, ngo nibwo yabonye ko imbaraga urubyiruko rufite zagira umumaro munini mu kubaka igihugu.

Ati “Mu 2016 urubyiruko twishyize hamwe tujya gukora umuganda, tugezeyo tubona umukecuru inzu yendaga kugwira, atubwira ko abonye uyimusanira byamushimisha, twaratashye twegeranya ubushobozi dusubirayo inzu turayubaka ubu yaruzuye neza, aho rero niho naboneye ko n’ubwo urubyiruko ari bato, atari bato bo kutagira umumaro.”

Aha ngo niho yahise abonera ko urubyiruko rukoresheje imbaraga rufite, ubwenge rufite no gukunda igihugu, rwakubaka igihugu bakakigeza ku rugero cyifuza, bituma ahitamo kwandika igitabo aruhwitura ndetse arushishikariza gukoresha izo mbaraga zarwo no kubyaza umusaruro amahirwe rwahawe.

Minisitiri w’Urubyiruko n’Umuco, Mbabazi Rosemary, avuga kuri iki gitabo yavuze ko ashimira abanditsi bacyo ndetse ko yizeye ko abazagisoma bizabafasha kumva ko urubyiruko rushoboye.

Ati “Iki gitabo kivuga amateka y’urubyiruko rw’u Rwanda, twizeye ko kizaba umusingi n’ubukangurambaga bugamije gufasha abakiri bato kugira uruhare mu iterambere ry’igihugu. Kigaragaza neza imibereho y’urubyiruko mu bihe bitandukanye ndetse n’amahirwe rufite muri iki gihe yarufasha kugera ku nzozi zarwo.”

Muri amwe mu mahirwe urubyiruko rw’ubu rufite nk’uko byasobanuwe muri iki gitabo, harimo ko ruri mu gihugu gifite umutekano, hashyizweho gahunda ya Igira ku murimo, imishinga itanga akazi ku rubyiruko, gahunda yo guhuza abashaka akazi n’abagatanga, NEP kora wigire, uburezi kuri bose, ikoranabuhanga n’ibikorwaremezo, ubuyobozi burwumva n’ibindi.

Mu nama ya 12 ya “World Policy Conference”, yabereye i Marrakesh muri Maroc ku wa 12 Ukwakira 2019, Perezida Kagame yagaragaje ko kuba urubyiruko ari rwo rugize umubare munini w’Abanyarwanda, bishimangira uruhare rufite mu kubaka u Rwanda rushya.

Dr Rusibana yavuze ko urubyiruko ruzasoma iki gitabo ruzabona amahirwe Leta y’u Rwanda yabahaye mu kwiteza imbere, rukazabonamo ibibazo bibugarije n’uburyo bashobora kubyirinda hamwe n’imyitwarire ikwiriye urubyiruko rw’u Rwanda.

Iki gitabo cyasohokanye n’indirimbo ivuga muri make ubutumwa bugikubiyemo na yo yitwa “Sindi muto wo kutagira umumaro”, kigura amafaranga 10000 Frw. Kiboneka ku bigo bitandukanye by’urubyiruko mu turere, muri za kaminuza, ndetse ngo no kuri murandasi mu minsi iri mbere kizaba kiriho.

Reba hano indirimbo “Sindi muto wo kutagira umumaro”

Dr Rusibana Claude, Umwanditsi Mukuru w'igitabo "Sindi muto wo kutagira umumaro", yavuze ko urubyiruko ruzakuramo byinshi bizarufasha kwiteza imbere
Sindi muto wo kutagira umumaro, igitabo cy'ubukangurambaga kigenewe urubyiruko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .