00:00:00 IGIHE NETWORK KN KINYARWANDA EN ENGLISH FR FRANCAIS

Shabana wahungiye mu Rwanda, yagarutse ku gahinda k’abakobwa basigaye muri Afghanistan

Yanditswe na Akayezu Jean de Dieu
Kuya 16 Mutarama 2023 saa 12:56
Yasuwe :

Shabana Basij-Rasikh washinze ishuri School of Leadership of Afghanistan, SOLA, ryigisha abakobwa bo muri Afghanistan, yatabarije abagore n’abakobwa basigaye muri icyo gihugu nyuma y’uko Abatalibani basubiye ku butegetsi.

Shabana n’abakobwa yari acumbikiye mu ishuri rye, bahunze umurwa mukuru Kabul mbere gato y’uko Abatalibani bawugeramo muri Kanama 2021.

Ku bufatanye na Leta Zunze Ubumwe za Amerika, Shabana n’abakobwa bigishaga bahawe ubuhungiro mu Rwanda, ishuri rikomeza imirimo yaryo.

Uyu mugore ufatwa nk’Impirimbanyi y’uburenganzira n’uburezi bw’abakobwa, yavuze ko bibabaje kuba abakobwa n’abagore basigaye muri Afghanistan kuri ubu batemerewe kwiga, ngo bategure ejo hazaza habo n’ah’igihugu cyabo.

Leta y’Abatalibani iherutse kubuza abakobwa kujya mu mashuri, inashyiraho ibyo bagomba kubahiriza kugira ngo bajya mu ruhame hamwe n’uburyo bakwiriye kwambara.

Ni ibintu Abatalibani bavuga ko bigamije kurinda abagore n’abakobwa, hubahirizwa amahame y’idini ya Islam, nubwo atavugwaho rumwe.

Umuyobozi wa SOLA, Shabana Basij-Rasikh aherutse kuganira n’umunyamakuru Melissa Harris-Perry agaruka kuri iki cyemezo cyafashwe na Leta y’Abatalibani, ashimangira ko kidatunguranye kuko ariwo murongo bafashe kuva bajya ku butegetsi.

Shabana Basij-Rasikh muri icyo kiganiro cyiswe ‘The Takeaway’ yavuze ku cyatumye ashinga SOLA, ahamya ko byaturutse ku gahinda no kwiheba yabonaga abakobwa bari bafite muri sosiyete ya Afghanistan.

Ati “Barumuna bacu, abakobwa bato, babyara bacu, abaturanyi bacu, inshuti zacu ntibari bari ku ishuri. Ni ibintu babonaga, bakishinja ibyaha ariko bakanagira ibyishimo ku bw’uko twabashije kubafasha bagakomeza amasomo.”

Shabana Basij-Rasikh yavuze ko kuva Abatalibani bafata ubutegetsi mu 2021, nta mpinduka zifatika bakoze mu bijyanye n’uburenganzira bw’abakobwa n’abagore.

Ati ‘‘Nakuriye mu bihe by’ubutegetsi bw’ abatalibani ,ntabwo ndiyo uyu munsi ariko ntabwo nigeze ntekereza ko mu myaka yanjye 30 y’amavuko nzaba ndi kuvuga ibihe by’icuraburindi nk’ibi mu mateka ya Afghanistan muri iki gihe.’’

Shabana Basij-Rasikh avuga ko muri iki gihe ibintu bikomeje kuba bibi mu gihugu cye cya Afghanistan ndetse abakobwa n’abagore bakomeje kuvutswa uburenganzira bw’ibanze.

Ati “Ibintu mu by’ukuri birakomeye ku bagore n’abakobwa muri Afghanistan, abagore bambuwe buri bwisanzure bushoboka, abo ngerageza kuvugana nabo , mu biganiro ngirana nabo bambwira ko n’umwuka bahumeka bashobora kuzawamburwa kuko bambuwe byose.”

Yakomeje agira ati “Kandi mvugana n’abakobwa n’abagore bageragezaga guharanira uburenganzira bwa bagenzi babo, baharanira uburezi bw’abakobwa mbere y’ubutegetsi bw’ abatalibani […] . Nubwo babayeho mu bihe by’ubutegetsi bubi bw’ abatalibani, bagerageza gukomeza guharanira uburenganzira bwa bagenzi babo ariko ntabwo byoroshye. Ukutava ku izima, abagore bo muri Afghanistan bafite, ni ibintu bikomeza.”

Shabana Basij-Rasikh akigera mu Rwanda yashimye uko bakiriwe, agaragaza agahinda ko kuba abanyeshuri be bagiye kumara igihe batazi uko kingana mu buhungiro bazira ko bavutse ari abakobwa.

SOLA (School of Leadership Afghanistan) ni ishuri rukumbi ryigamo abakobwa gusa muri Afghanistan, rikaba ryarimuriwe mu Rwanda by’agateganyo. Abakobwa 250 bo muri iri shuri rikuru n’imiryango yabo bageze mu Mujyi wa Kigali ku wa 24 Kanama 2021.

Shaban yavuze ko uburenganzira bw'abakobwa n'abagore basigaye muri Afghanistan bugeramiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .