Serivisi 10 z’ikoranabuhanga zifasha mu kwihutisha iterambere ry’u Rwanda

Yanditswe na Dufitumukiza Salathiel
Kuya 11 Nzeri 2020 saa 06:00
Yasuwe :
0 0

Ikoranabuhanga rigezweho ni kimwe mu biranga iterambere ry’igihugu runaka cyane ko ryoroshya rikanihutisha imitangire ya serivisi; bityo abenegihugu bakagera ku majyambere arambye ndetse na leta ikagenzura iyubahirizwa rya gahunda zayo biyoroheye.

Ikoranabuhanga rigenda rihindagurika bijyanye n’igihe Isi igezemo, kuko rihoramo udushya akenshi usanga twibanda mu kuzana uburyo bworoshye kandi bwihuse bwo gukora ikintu runaka kurusha ubwari busanzwe.

Mu Rwanda hari uburyo bw’ikoranabuhanga butandukanye bumaze kumenyerwa, bwifashishwa hashakwa serivisi runaka mu nzego z’ubuyobozi, bitabaye ngombwa ko abantu bakora ingendo zigana ku biro.

Si ubwo gusa kandi kuko hari n’ubufasha guhererekanya amafaranga hagati y’abantu ku giti cyabo, gutanga no kwaka ubufasha mu nzego z’ubuzima, kwishyurana n’ibindi.

Ku rutonde rurerure rwa serivisi z’ikoranabuhanga, IGIHE yatoranyije 10 zikoreshwa cyane n’abaturage mu buzima bwa buri munsi n’imikorere yazo.

  • Mobile Money

Ni uburyo bwo kubitsa, kubikuza, kohereza cyangwa kwakira amafaranga kuri telefoni bigakorwa n’umuntu ufite konti ku kigo cy’itumanaho bakorana, akaba anagomba kuba telefoni irimo simukadi azajya akoresha ibyo bikorwa.

Mobile Money ifasha uyikoresha kwishyura serivisi nk’amazi, umuriro, mituweli, ibicuruzwa n’ibindi byinshi kandi atavuye aho ari.

Ni uburyo bworoshye kandi buhendutse ku buryo buri muturage abasha kubukoresha iyo abishatse.

Serivisi za Mobile Money ziri mu gihugu hose, aho abantu babitsa, bakabikuza, bakishyura serivisi n'ibindi byinshi kuri telefoni zabo

Irembo

Irembo ni gahunda ya Leta yashyizweho mu rwego rwo korohereza abaturage kubona serivisi hafi ya zose itanga kandi baziherewe ahantu hamwe. Ni urubuga abaturage bifashisha bashaka serivisi za Guverinoma bakoresheje murandasi, aho gukora ingendo zigana ku biro by’inzego za Leta zitandukanye.

Irembo rifasha abaturage kubona serivisi mu buryo bworoshye, bunoze kandi bwizewe zirimo izo mu Biro bya Minisitiri w’Intebe, Minisiteri y’Ububanyi n’Amahanga n’Ubutwererane, Minisiteri y’Ubutegetsi bw’Igihugu, Ubuyobozi Bukuru bw’Abinjira n’Abasohoka mu gihugu no mu Kigo cy’Igihugu gishinzwe Indangamuntu.

Irembo rinatangirwaho serivisi zo muri Polisi y’u Rwanda, Ubushinjacyaha Bukuru, Ikigo cy’Igihugu gishinzwe Imicungire n’Imikoreshereze y’Ubutaka (RLMUA), iz’Ikigo gishinzwe Imiturire mu Rwanda, iz’Urwego rw’Igihugu rushinzwe Iterambere (RDB), n’urushinzwe Imiyoborere (RGB) n’iz’Ikigo cy’Ubuzima (RBC).

Hari kandi iz’Ikigo gishinzwe Ingoro Ndangamurage z’u Rwanda, iz’Ikigo cy’Ubwiteganyirize mu Rwanda (RSSB), Ibyerekeye Inama y’Igihugu y’Amashuri Makuru, iz’Inama Nkuru y’Itangazamakuru, iza Minisiteri y’Ubutabera, iz’Urwego rw’Igihugu rushinzwe imirimo Ngenzuramikorere (RURA) n’iz’Ikigo gishinzwe guteza imbere Uburezi mu Rwanda (REB).

Umuntu anyuze ku Irembo asaba ibyangombwa bitandukanye bitamusabye kujya gushaka umuyobozi w’urwego runaka ngo abimufashemo.

Urubuga Irembo rushoboza abaturage kubona serivisi za leta zitangwa hifashishijwe ikoranabuhanga

Tap&Go

Ubu ni uburyo bujyanye n’igihe bukoreshwa mu gutwara abagenzi mu Mujyi wa Kigali ndetse mu minsi iri imbere, bukazagezwa mu ntara zose z’igihugu.

Ku muntu ufite ikarita ya Tap&Go, agura iye bwite akajya ashyiraho amafaranga y’urugendo ku bashinzwe kuyashyiraho cyangwa agakoresha telefoni ye igendanwa kuri Mobile Money.

Iyo umugenzi afite amafaranga y’urugendo ku ikarita ye, akoza ku mashini yashyizwe mu modoka cyangwa kuri moto, hakavaho ingano y’amafaranga yagenwe ku rugendo.

Ni uburyo bwiza kuko bwagabanyije izamuka ry’ibiciro rya hato na hato by’ingendo, byajyanaga n’aho amasaha ageze. Ubu buryo kandi bwakemuye ibibazo byabagaho mu kwishyura imisoro no guhererekanya amafaranga mu ntoki byahozeho.

Mu bihe nk’ibi igihugu gihanganye na Coronavirus, uburyo bwo kwishyura ingendo hakoreshejwe amakarita bwafashije n’ubundi izindi ngamba zisanzwe zo kwirinda ikwirakwira ry’iki cyorezo.

Ubwikorezi rusange bw'abantu mu Mujyi wa Kigali bwifashisha ikoranabuhanga, kuri ubu hakoreshwa amakarita mu kwishyura ingendo

Kohereza amaraso hakoreshejwe drones

Ubu ni uburyo bw’ikoranabuhanga u Rwanda rwatangije bwa mbere ku Isi kuva mu Ukwakira 2016, aho indege zitagira abapilote zizwi nka “drones” zitwara amaraso ziyakura ku bitaro bimwe zikayajyana aho akenewe.

Ni uburyo bwaje bukenewe cyane kuko ubwari busanzweho bukoresha imodoka butihutaga bihagije, ndetse hakaba n’uduce tw’igihugu byagoranaga ko imodoka zihagera.

Urugendo rwashoboraga gutwara amasaha abiri mu modoka, kuri ubu rutwara iminota iri munsi ya 30 hifashishijwe utwo tudege.

Izi serivisi zitangwa n’Ikigo cy’Abanyamerika gikora utudege tutagira abapilote, cyitwa Zipline aho kuri ubu kiri no mu mishinga igamije kwagura serivisi zikajya no mu bindi byiciro by’ubuzima zikenewemo.

Utudege twa Zipline dutwara amaraso mu gihe kiri munsi y'iminota 30, ku rugendo rwashoboraga gutwara amasaha arenga abiri

Kwiyandikisha muri Kaminuza

Ikoranabuhanga ryageze mu ngeri zose, kuko ubu no kwiyandikisha muri za Kaminuza bidasaba kujya ku cyicaro. Kaminuza zashyizeho imbuga abanyeshuri bazigana biyandikishaho iyo bujuje ibisabwa.

Ku rubuga rwo kwiyandikishirizaho, uwiyandikisha ahasanga amabwiriza agenga iyo kaminuza, ibisabwa ku wiyandikisha, amashami yigishwa, igihe umwaka w’amashuri uzatangirira n’igihe uzarangiraho n’andi makuru nkenerwa ku munyeshuri.

Kaminuza y'u Rwanda ifite uburyo bufasha abanyeshuri kwiga batagiye ku ishuri, E-learning

Kwiga hifashishijwe iyakure (E-learning)

Mu bihe bimwe na bimwe hari ubwo biba ngombwa ko umunyeshuri akenera kwiga atari kumwe na mwarimu imbona nkubone. Urugero rwa hafi ni muri ibi bihe byo kwirinda ikwirakwira rya Coronavirus, biragaragara ko kwiga mwarimu n’abanyeshuri batari mu cyumba kimwe bikenewe.

Kwiga mu buryo bwa E-learning bikorwa mwarimu ategura amasomo akayashyira kuri murandasi, abanyeshuri bakayahasanga. Buri munyeshuri agomba kuba afite konti ye ku rubuga rwemejwe rukoreshwa.

Iyo konti ni yo imufasha kurugeraho akabasha kubona n’ibyo mwarimu yahashyize. Ubu buryo bwemerera abanyeshuri gukora ibizamini n’amasuzuma nk’uko bisanzwe bigenda mu ishuri.

Kwivuza witwaje indangamuntu

Ubu ni uburyo abagenerwabikorwa ba RSSB, muri serivisi ya mituweli bashyiriweho busimbura ubwari busanzweho, aho mu bagize umuryango buri wese yabaga afite ikarita ye iriho n’ifoto yitwazaga agiye kwivuza.

Ubu buryo bushya bwarabyoroheje bunarengera amafaranga yashyirwaga mu gukora ayo makarita, ubu abakoresha mituweli bashaka kwivuza, bitwaza indangamuntu y’umukuru w’umuryango mu kwishyura serivisi bahawe n’inzego z’ubuzima.

Mobile Banking

Ubu ni uburyo bugezweho bwemerera abakiliya b’amabanki kumenya uko konti zabo zihagaze bitagombye kujya kubaza kuri banki. Iyi serivisi ifasha umukiliya kuba yamenya amakuru yose ajyanye na konti ye, abikoreye kuri telefoni ye.

Mu korohereza abakiliya, amabanki yagiye ashyiraho porogaramu (application) ku bafite telefoni zigezweho n’uburyo bwa ‘kode’ ku bafite telefoni zisanzwe, bose bakabasha kumenya amakuru yose ajyanye na konti zabo.

Ubu buryo bufasha umuntu kubitsa, kohereza no kwakira amafaranga no kumenyeshwa izindi gahunda za banki akorana nayo zimureba.

Kubikuza amafaranga na ATM

Ni uburyo bworoshye kandi bwihuse bufasha abakiliya b’amabanki kubikuza amafaranga batagombye kugana abakozi b’ayo mabanki.

Umukiliya yitwaza ikarita ye, akayishyira mu mashini babikurizaho kuri banki afitemo konti. Nyuma yo kwinjizwamo, umukiliya abona ahagenewe gushyira umubare w’ibanga n’ahuzuzwa ingano y’amafaranga ashaka kubikuza, ubundi imashini ikayasohora akayakira.

Usibye kuba bworoshye, ubu buryo buranahendutse kuko ubukoresheje yishyuzwa 200 Frw gusa y’igikorwa igihe abikuje munsi y’ibihumbi 500 Frw.

ATM ziri mu gihugu hose, Abanyarwanda bakaba bazibikurizaho amafaranga mu buryo bworoshye

Imirongo ya telefoni yo kwakiraho ubufasha bw’ibanze

Iterambere ry’igihugu icyo ari cyo cyose rijyana n’imibereho myiza y’abaturage. Umuturage udafite umutekano cyangwa wahohotewe, biragoye ko yaharanira iterambere ry’igihugu.

Mu Rwanda, hashyizweho imirongo myinshi ku bigo bitandukanye igamije gufasha abaturage kubaza no gusobanuza ibyo bakeneye.

Imwe mu mirongo ikomeye bakuraho ubufasha ni nka 110 ku mutekano wo mu mazi, 111 ku nkongi z’umuriro, 112 ku butabazi bwihuse, 113 ku mpanuka zo mu muhanda na 114 ku bufasha bujyanye na Coronavirus.

Hari kandi 116 ku gutabariza umwana uri mu kaga, 987 ku kurwanya ruswa, 912 ukeneye imbangukiragutabara na 3512 ku ihohoterwa rishingiye ku gitsina.

Mu rwego rwo kurushaho gufasha abaturage kugera ku iterambere ryihuse bifashishije ikoranabuhanga, Leta y’u Rwanda ku bufatanye n’Ikigo cy’Itumanaho, MTN Rwanda, bashyizeho gahunda ya ’Connect Rwanda’ aho ingo zidafite telefoni zigendanwa zizihabwa, bigatuma abazituye bagira ubushobozi bwo kugera kuri izi serivise zose twarondoye.

Iyi gahunda imaze gutangwamo telefoni zirenga 110 000, kandi 90% by’izatanzwe zirakoreshwa, ibigaragaza umusaruro w’iyi gahunda.

Ikigo Mara Group gikorera mu Rwanda telefoni za Mara Phones zigezweho kandi zihendutse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .