Sendika y’abakozi bacukura amabuye y’agaciro yagaragaje uruhuri rw’ibibazo bibangamiye abakora uyu mwuga

Yanditswe na Bukuru JC
Kuya 4 Ukuboza 2020 saa 02:44
Yasuwe :
0 0

Sendika y’abakozi bo mu bucukuzi bw’amabuye y’agaciro na kariyeri mu Rwanda (REWU), yasabye abakoresha guha abakora muri uwo mwuga amasezerano atari aya nyirarureshwa cyangwa y’urwiyerurutso hagamijwe gukomeza gukwepa ibyo amategeko agenga umurimo ateganya.

Iyi Sendika ibisabye mu gihe u Rwanda rwizihiza Umunsi mpuzamahanga w’umucukuzi kuri uyu wa 04 Ukuboza 2020.

REWU yavuze ko hari byinshi bimaze kugerwaho biteza imbere uyu mwuga byagizwemo uruhare n’Ikigo gishinzwe ubucukuzi bw’amabuye y’agaciro, gas na peteroli mu Rwanda (RMB) ariko hari ibitarakemuka birimo n’abakoresha badaha agaciro gakwiye umurimo ukorwa n’abacukuzi.

Umunyamabanga Mukuru wa REWU, Mutsindashyaka André, yavuze ko urwego ahagarariye mu nshingano zarwo harimo no gukorera ubuvugizi abakora umwuga w’ubukuzi bw’amabuye y’agaciro na kariyeri, bityo kugaragaza ibibazo bahura nabyo ari ipfundo ryo guteza imbere uyu mwuga igihe byaba bikemuwe.

Mu bibazo agaragaza byugarije umucukuzi mu Rwanda, harimo kuba abakozi benshi bakora mu bucukuzi nta masezerano y’umurimo bagira, bikabagiraho ingaruka zo kubaho nta cyizere cyo gukomeza gukora kuko buri munsi baba bazi ko basezererwa mu kazi.

Mutsindashyaka ati “Hari n’abatanga amasezerano ya nyirarureshwa y’igihe gito, nyamara ugasanga umukozi amaze mu kigo imyaka itatu cyangwa irenze, bene aya ntacyo amarira umukozi kuko na banki ntiziyashingiraho mu kuguriza umukozi ushaka inguzanyo.”

Yakomeje avuga ko bimwe mu bigo by’ubucukuzi bidashyira abakozi mu bwiteganyirize bw’izabukuru n’indwara zikomoka ku kazi; abakozi benshi bagihemberwa mu ntoki aho kubahemba binyuze mu bigo by’imari nabyo ari imbogamizi zikomereye urwego ahagarariye

Yongeraho ati “Hejuru y’ibyo kandi hari kuba mu bucukuzi bw’amabuye y’agaciro hakigaragaramo abakozi bakora ariko umurimo bakoze ntibawuhemberwe, hitwajwe ko batabonye amabuye y’agaciro kandi baba biriwe mu ndani bacukura.”

Yavuze ko iyo mikorere igira ingaruka ku miryango yabo cyane cyane bikaba byatuma ku babyaye abana hari bamwe mu bana babo bahura n’ikibazo cyo kugwingira kubera imirire mibi.

Mu bindi bibazo iyi sendika igaragaza harimo kuba mu bucukuzi hakigaragara impanuka zihitana ubuzima bw’abakozi bo mu bucukuzi, rimwe na rimwe ziterwa n’uko abakozi badahugurwa ku by’ubuzima n’umutekano wabo mu kazi; kuba birukanwa binyuranije n’amategeko agenga umurimo, bikiyongera ku kuba umukozi aba amaze igihe akorera ubuntu kuko ataragera ku mabuye, kuba abakozi badakorerwa isuzuma ry’uko ubuzima bwabo buhagaze (medical checkup), cyane cyane ibirebana n’inzira z’ubuhumekero.

Ikindi ni uko abakozi bize iby’ubucukuzi bakorera mu bigo bimwe na bimwe bahembwa umushahara w’intica ntikize, ahandi ntibahabwe umwanya wo gukoresha ubumenyi bwabo bahabwa inshingano zitajyanye n’ubumenyi bafite, bamwe bikabaviramo kureka akazi kuko baba babona ntacyo kazabagezaho ndetse no kuba hari abana bakoreshwa imirimo ibujijwe bakigaragara mu birombe bya za kariyeri, bibagiraho ingaruka zo guta ishuri, abakobwa b’abangavu bagasambanywa batarageza ku myaka y’ubukure.

Ati “Sendika y’abakozi bo mu bucukuzi irasaba inzego z’ubuyobozi kugira uruhare mu kubwira abakoresha bagakemura ibi bibazo kuko biri mu bizateza imbere uru rwego n’abarukoramo nta n’umwe utsikamiye undi.”

REWU ikomeza isaba Minisiteri ifite Umurimo mu nshingano zayo ko ikwiye gushyiraho umushahara fatizo ukwiye guhembwa abakozi bo mu bucukuzi, kugira ngo ikibazo cy’abakorera ubuntu kirangizwe burundu.

Mutsindashyaka yakomeje avuga ko ubumenyi bwigishwa mu mashuri burebana n’ubucukuzi bwahuzwa n’ubumenyi abakoresha bo mu bucukuzi mu Rwanda bakeneye.

Gusa nubwo, Abacukuzi bagaragaza ibi bibazo, iyi sendika yashishikarije abakozi bo mu bucukuzi gukomeza gukora cyane bakunze umurimo wabo, kugira ngo umusaruro urusheho kwiyongera hagamijwe gukomeza gufasha igihugu by’umwihariko mu guhangana n’ingaruka icyorezo cya COVID 19 cyagize ku bukungu bw’igihugu.

Umunyamabanga Mukuru wa REWU, Mutsindashyaka André, aganira n'abakora ubucukuzi bw'amabuye y'agaciro
Bamwe mu bakora mu bucukuzi bagezwaho ikiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .