Sena yemeje Dr Mukankomeje ku buyobozi bwa HEC

Yanditswe na Akayezu Jean de Dieu
Kuya 13 Ugushyingo 2019 saa 10:30
Yasuwe :
0 0

Inteko Rusange y’Inteko Ishinga Amategeko, umutwe wa Sena yemeje ubusabe bwa Guverinoma bwo gushyira Dr Mukankomeje Rose ku mwanya w’Umuyobozi Mukuru w’Inama y’Igihugu y’Amashuri Makuru na Kaminuza.

Dr Mukankomeje ni umwe mu bayobozi bashya bashyizweho ku wa 4 Ugushyingo 2019, mu mpinduka zakozwe na Perezida wa Repubulika muri Guverinoma no mu zindi nzego.

Abayobozi mu nzego zitandukanye bashyirwaho na Perezida wa Repubulika mu bubasha ahabwa n’Itegeko Nshinga, bemezwa n’Inama y’Abaminisitiri ikabasabira Sena kugira ngo isuzume dosiye zabo nyuma yemeze niba koko berekeza muri izo nshingano cyangwa batujuje ibisabwa.

Kuri uyu wa Gatatu tariki 13 Ugushyingo 2019, nibwo Komisiyo y’Imibereho y’Abaturage n’Uburenganzira bwa Muntu yamuritse ibyavuye muri raporo kuri dosiye ya Dr Mukankomeje.

Komisiyo yasuzumye iyo dosiye yasanze inshingano za HEC, zirimo kugenzura indangagaciro z’uburere, uburezi n’ubushakashatsi, kugira inama guverinoma ku byerekeye politiki n’ingamba z’uburezi, gushyiraho ibipimo ngenderwaho, kugenzura ko ibipimo byubahirizwa no kwemeza integanyanyigisho.

Komisiyo kandi yaganiriye na Dr Mukankomeje wabagaragarije ko yakoze imirimo itandukanye ku buryo ubunararibonye yakuyemo buzamufasha kuzuza inshingano.

Ikindi kandi ngo komisiyo yasanze afite amakuru ajyanye n’imikorere y’ikigo agiye kuyobora.

Nyuma yo gusuzuma iyi raporo abasenateri bose uko ari 24 bari bitabiriye Inteko Rusange bemeje ku 100%, ko Dr Mukankomeje agirwa Umuyobozi wa HEC.

Dr Mukankomeje yavutse tariki 10 Ukwakira 1957. Ni umwe mu bize ibijyanye n’Ibinyabuzima n’andi masomo ajyanye na Siyansi, aho mu 1992 yanabiherewe Impamyabumenyi y’Ikirenga, PhD.

Yakoze mu myanya itandukanye mu nzego za leta harimo ko kuva mu 1995 kugera mu 2001 yari umwe mu bagize Inteko Ishinga Amategeko, nyuma akora muri Minisiteri y’Uburezi kuva mu 2002 kugera mu 2003 nk’Umuyobozi Mukuru ushinzwe Siyansi, Ikoranabuhanga n’Ubushakashatsi.

Yabaye kandi mu buyobozi bukuru bw’Amashuri Makuru na Kaminuza mu Rwanda harimo ko yabaye Visi Perezida wa Kaminuza yari ishinzwe iby’Uburezi, KIE.

Dr Mukankomeje yaherukaga muri Guverinoma mu 2016, ubwo yakurwaga ku mwanya w’Umuyobozi w’Ikigo cy’Igihugu gishinzwe kurengera Ibidukikije, REMA.

Sena yemeje ubusabe bwa Guverinoma bwo kugira Dr. Rose Mukankomeje Umuyobozi wa HEC
Abasenateri bemeje ko Dr Mukankomeje ayobora HEC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza