Sena yatumije Minisitiri w’Intebe ku bibazo birimo ubushobozi buke bw’abatanga ibizamini by’akazi

Yanditswe na Ferdinand Maniraguha
Kuya 27 Gashyantare 2019 saa 05:53
Yasuwe :
0 0

Sena yafashe umwanzuro wo gutumiza Minisitiri w’Intebe, Dr Edouard Ngirente, kugira ngo atange ibisobanuro ku bibazo bijyanye n’imicungire y’abakozi ba Leta birimo n’abahabwa gutanga ibizamini by’akazi batabifitiye ubushobozi.

Komisiyo y’Abakozi ba Leta n’umurimo igaragaza ko igipimo cy’uko abanyarwanda bishimira imitangire y’akazi cyavuye kuri 63.1% mu 2011 kigera kuri 70.9 % mu 2016.

Kuri uyu wa Gatatu ubwo abasenateri bagezwagaho isesengura rya raporo y’ibikorwa bya Komisiyo y’Igihugu Ishinzwe Abakozi ba Leta y’umwaka wa 2017/18 na gahunda y‘ibikorwa by‘umwaka wa 2018/19, bagaragaje ko imicungire y’abakozi mu Rwanda irimo ibibazo bikwiye gusobanurwa na Minisitiri w’Intebe.

Mu bibazo byagaragajwe na Komisiyo ya Sena ishinzwe imibereho myiza ari nayo yasesenguye iyo raporo, harimo ubushobozi buke bw’abashinzwe gutanga ibizamini by’akazi, uburyo butaboneye bwo kubakira abakozi ba Leta ubushobozi, gutinda kwishyura bamwe mu bakozi ba Leta ibyo bemererwa n’amategeko nk’imishahara n’ibindi.

Senateri Bajyana Emmanuel yagaragaje ko uburyo abatanga ibizamini bya Leta batoranywa bitizewe kuko nta suzuma babanza gukorerwa, asaba ko hajyaho uburyo nabo basuzumwa kugira ngo harebwe niba bashoboye.

Perezida wa Komisiyo ya Sena y’Imibereho y’Abaturage n’Uburenganzira bwa Muntu, Gallican Niyongana, na we yagize ati “Kugeza ubu uko bikorwa haba hari ikigo runaka basabye kuza gutanga ibizamini, ubushobozi buke kiba gifite n’uko gitoranya abaza gutanga ibizami sinabyinjiramo ariko usanga badafite ubushobozi ari naho haza kuvamo igitekerezo cy’uko bikwiye gutekerezwa kugira ikigo cyaba kimwe cyangwa bingahe bibizobereyemo.”

Ku bijyanye n’amakosa agaragara mu miciungire y’abakozi ba Leta, Niyongana yavuze ko Komisiyo ndetse na Minisiteri by’abakozi ba Leta bisa n’aho ubwabyo nta bubasha bifite bwo gukemura icyo kibazo burundu.

Ati “Komisiyo y’abakozi ba Leta nayo nta cyizere yaguha kuko si yo ibikora, umurimo ikora ni ukugenzura. Icyizere twumvaga cyava kuri Minisitiri twaranamubajije tuti ‘ubu uwakubwira ngo ugirane imihigo na sena kugira ngo imicungire y’abakozi ba Leta amakosa ashiremo wakora iki?’ Yaratubwiye ati ‘twebwe dukora politiki, bigakorwa na Minaloc, ayo makosa si inshingano za Mifotra biri ku bandi. Urumva rero haracyarimo ikibazo.”

Iyo mpurirane ya Minisiteri zifite mu nshingano abakozi ba Leta nizo zatumye hitabazwa Minisitiri w’Intebe ngo atange ibisobanuro.

Nubwo hari ibyakozwe nko gushyiraho uburyo bw’ikoranabuhanga bwo gusaba akazi ka Leta, ibibazo mu mitangire yako ntibirashira kuko hari abavuga ko hakirimo ruswa mu kugatanga, cyane cyane igihe hakorwa ikizamini cyo kuvuga (Interview) aho uwo abatanga akazi bashaka ngo bamuha amanota menshi, uwo badashaka watsinze mu kizamini cyo kwandika agahabwa make.

Komisiyo y’Abakozi ba Leta yagiye igaragaza ko hakiri ruswa y’amoko atatu mu mitangire y’akazi mu bigo bya Leta nk’ishingiye ku gitsina, ku mafaranga n’icyenewabo.

Sena yafashe umwanzuro wo gutumiza Minisitiri w’Intebe, Dr Edouard Ngirente, kugira ngo atange ibisobanuro ku bibazo bijyanye n’imicungire y’abakozi ba Leta birimo n’abahabwa gutanga ibizamini by’akazi batabifitiye ubushobozi
Minisitiri w'Intebe Dr Ngirente yatumijwe na Sena ngo atange ibisobanuro ku bibazo biri mu micungire y'abakozi ba Leta

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza