Sena yahaye Guverinoma umukoro wo guhangana n’ikibazo cyo gusambanya abana gikomeje kwiyongera

Yanditswe na Uwimana Abraham
Kuya 18 Ugushyingo 2020 saa 07:29
Yasuwe :
0 0

Komisiyo y’Imibereho y’Abaturage n’Uburenganzira bwa Muntu muri Sena, yasabye Guverinoma gukora ubukangurambaga-ngiro buhoraho bwegereye ingo mu mudugudu, mu isibo no mu mashuri bugamije gukumira isambanywa ry’abana no gutegura imfashanyigisho yihariye yifashishwa muri ubwo bukangurambaga.

Ibi iyi Komisiyo yabitangaje ku wa 17 Ugushyingo 2020, ubwo yagezaga ku Inteko Rusange ya Sena, Raporo ku gikorwa cyo gusesengura icyaha cyo gusambanya abana n’ubwiyongere bw’umubare w’abangavu baterwa inda.

Perezida wa Komisiyo y’Imibereho y’Abaturage n’Uburenganzira bwa Muntu, Umuhire Adrien, yavuze ko mu gusesengura ikibazo cyo gusambanya abana, Komisiyo yari igamije gutanga inama zafasha gukumira icyo kibazo mu rwego rwo kubaka umuryango ubayeho neza kandi utekanye.

Komisiyo kandi yari igamije kumenya impamvu zituma abantu bafite imyaka y’ubukure basambanya abana, kumenya ingaruka zituruka ku gusambanya abana, no gutanga inama ku ngamba zafasha gukemura iki kibazo.

Mu byo Sena yasabye Guverinoma kwihutira harimo gukora no gutangaza buri mwaka urutonde rw’abo inkiko zahamije burundu icyaha cyo gusambanya abana kandi rukagezwa mu nzego zegereye abaturage.

Ikindi ni ugushyira mu mihigo y’ingo no mu mihigo y’Inzego z’Ibanze ingamba zo gukumira, kurwanya no kurandura burundu ikibazo cyo gusambanya abana.

Ibi ngo bigomba kwiyongera ku gukora ubukangurambaga-ngiro buhoraho bwegereye ingo mu mudugudu, mu isibo no mu mashuri bugamije gukumira isambanywa ry’abana no gutegura imfashanyigisho yihariye yifashishwa muri ubwo bukangurambaga.

Muri iyi Raporo, Komisiyo yerekanye ko umubare w’abana basambanywa ari munini kandi ugenda wiyongera buri mwaka, ikindi ni uko abana basambanyirizwa cyane cyane mu ngo no ku ishuri kandi bagasambanywa n’abashinzwe kubarera kandi baboneka mu ngeri zose.

Komisiyo yavuze ko ikibazo cyo gusambanya abana ari ikibazo gikomereye Igihugu gikwiye gushakirwa umuti udasanzwe kuko kiri kwangiza umuryango n’Igihugu, akaba ari yo mpamvu yahaye Guverinoma ibyo igomba kwitaho cyane mu guhangana n’iki kibazo.

Iyi Raporo yagaragaje ko mu mwaka 2018/2019 abana basambanyijwe ari 3215, muri bo abakobwa ni 3135 bangana na 97.5% naho abahungu ni 80 bangana na 2.5%, muri abo kandi 2287 bahwanye na 71.1% ni abafite imyaka hagati ya 11 na 17 naho 928 bangana na 28.9% ni abafite munsi y’imyaka 10.

Mu mwaka wa 2019/2020 abana basambanyijwe ni 4265. Muri bo abakobwa ni 4154 bangana na 97.4% naho abahungu ni 111 bangana na 2.6%, muri abo abari bafite munsi y’imyaka 10 ni 1,239 bangana na 29%, naho 3026 bangana na 71% bakaba abafite hagati y’imyaka 11 na 17.

Sena yahaye Guverinoma umukoro wo kurandura ikibazo cy'isambanywa ry'abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .