00:00:00 IGIHE NETWORK KN KINYARWANDA EN ENGLISH FR FRANCAIS

São Tomé-et-Príncipe yasabye u Rwanda ubufasha mu byo gupima ibimenyetso bya gihanga (Amafoto)

Yanditswe na Akayezu Jean de Dieu
Kuya 24 May 2022 saa 07:12
Yasuwe :

Itsinda ry’abayobozi baturutse mu Birwa bya São Tomé-et-Príncipe riyobowe na Minisitiri w’Ubutabera, Uburenganzira bwa Muntu akaba n’Intumwa Nkuru ya Leta bari mu ruzinduko rw’akazi i Kigali aho bakiriwe n’Ubuyobozi bwa Laboratwari y’u Rwanda y’ibimenyetso bya gihanga byifashishwa mu butabera (Rwanda Forensic Laboratory) bakagirana ibiganiro.

Minisitiri Dr. Cilcio Bandeira dos Santos n’itsinda bari kumwe, basuye Rwanda Forensic Laboratory kuri uyu wa 23 Gicurasi 2022, aho bakiriwe n’Umuyobozi w’agateganyo wa Rwanda Forensic Laboratory, Dr Justin Kabera.

Dr Kabera yeretse aba bayobozi baturutse mu Birwa bya São Tomé-et-Príncipe imikorere y’iyi laboratwari ifasha mu gupima no gutanga ibimenyetso bya gihanga, bifasha mu butabera n’ahandi hantu bikenewe.

Rwanda Forensic Laboratory ikomoka kuri Kigali Forensic Laboratory yatangiye mu 2005 ariko yakoraga idafite ibikoresho bihagije. Kuyishyira ku rundi rwego byatangiye mu 2011 ubwo Polisi yagiranaga amasezerano n’ikigo cy’Abongereza, Key Forensic Services, yo kubaka no gutanga ibikoresho bibereye Laboratwari y’igihugu.

Kuva mu 2018 kugera mu 2021, Rwanda Forensic Laboratory imaze gukora ibizami by’isanomuzi (ADN) bigera ku 3468 bisabwe n’inkiko n’abantu ku giti cyabo.

Aba bayobozi bo mu Birwa bya São Tomé-et-Príncipe beretswe ibimaze gukorwa n’iyi laboratwari ifite ibikoresho bigezweho ndetse n’abakozi b’abahanga babihuguriye bafite ubumenyi buhanitse mu gusuzuma ibyo bimenyetso.

Nyuma y’ibiganiro byahuje impande zombi, aba bayobozi batemberejwe muri laboratwari zirimo ahapimirwa ibiyobyabwenge biba biri mu mubiri w’umuntu, ahapimirwa ADN, ahapimirwa ibikumwe cyangwa inyandiko, ahasuzumirwa icyateye urupfu n’ahandi.

Mu kiganiro yagiranye na IGIHE nyuma y’ibi biganiro no gutemberezwa ahakorera serivisi zitandukanye muri iyi laboratwari, Umunyamabanga wa Leta muri Minisiteri y’Ubutabera, Imiyoborere n’Uburenganzira bwa Muntu muri Repubulika y’Ibirwa bya São Tomé-et-Príncipe, Eloisa Cabinda yavuze ko batahanye byinshi mu gihugu cyabo.

Ati “Twaje hano kwigira ku Rwanda. Hari uburyo butandukanye bwo gukoresha ikoranabuhanga mu butabera, dushaka ko natwe tujya gukoresha iryo koranabuhanga mu gihugu cyacu, nidusubirayo tuzareba uko twarikoresha.”

Yakomeje agira ati “By’umwihariko hano kuri iyi laboratwari, batweretse ibyo bamaze gukora, uko babigezeho ndetse ni ibintu byiza natwe dushobora gutangira gukora mu gihugu cyacu. Iyi ni intambwe y’ubufatanye hagati y’u Rwanda na São Tomé-et-Príncipe.”

Eloisa Cabinda avuga ko baratekereza uko bashobora kohereza itsinda ry’abahanga b’iwabo bakazaza kwigira kuri izi serivisi ndetse byaba ngombwa bakaba basaba ko Abanyarwanda bava i Kigali bakajya i São Tomé gutangayo amahugurwa.

Ati “Icyo turakora tugeze mu rugo [muri São Tomé-et-Príncipe] ni ugushyiraho uburyo bwo gushyira mu bikorwa ibyo twabonye, nibiba ngombwa tuzohereza hano abakozi bacu baze kwiga, hanyuma babone ubushyira mu bikorwa, hari byinshi hano u Rwanda rufite dushobora gukenera iwacu.”

Rwanda Forensic Laboratory ifite amashami ane, aho irya mbere ari iry’ibinyabutabire birimo gupima ibihumanya n’ingano ya alcohol mu mubiri no gupima ibiyobyabwenge, aho bafata amaraso cyangwa se inkari ku muntu muzima cyangwa se ibindi bice by’umubiri ku wapfuye bakamenya ko yabinyoye koko.

Hari kandi agashami k’ibinyabuzima karimo gupima ADN (amasano abantu bafitanye hakoreshejwe uturemangingo duto). Kuri iyi ngingo, ADN ipimwa hagamijwe guhuza umwana na nyina, Se cyangwa abandi bafitanye isano. Hanahuzwa kandi umuntu n’ahabereye icyaha.

Umuyobozi w’agateganyo wa Rwanda Forensic Laboratory [RFL], Dr Justin Kabera yabwiye IGIHE ko nyuma yo kuganira n’aba bayobozi, hatangiye gutekerezwa uko imikoranire yatangira ku buryo u Rwanda rushobora gufasha iki gihugu gutangiza serivisi nk’izi.

Ati “Bashimishijwe n’uko muby’ukuri ubutabera bwo mu Rwanda bugeze kure kuko ntabwo ari ahantu hose wasanga laboratwari nk’iyi itanga ibimenyetso bishobora kwifashishwa mu butabera. Batubwiye ko tumaze kubarenga kandi bazakomeza gukenera ubumenyi bwacu.”

Minisitiri Cilcio Bandeira dos Santos n’itsinda ayoboye muri uru ruzinduko bazasura inzego zirimo Urukiko rw’Ikirenga, Ubushinjacyaha Bukuru ndetse biteganyijwe ko bazagirana ibiganiro na Minisitiri w’Ubutabera akaba n’Intumwa Nkuru ya Leta y’u Rwanda, Dr Ugirashebuja Emmanuel.

Umuyobozi w'agateganyo Rwanda Forensic Laboratory, Dr Justin Kabera yijeje imikoranire myiza abo mu Birwa bya São Tomé-et-Príncipe
Umuyobozi w'agateganyo wa Rwanda Forensic Laboratory, Dr Justin Kabera yagaragaje ko iyi laboratwari ikomeje gutanga umusanzu ukomeye mu butabera bw'u Rwanda
Umuyobozi w'agateganyo wa RFL, Dr Justin Kabera aha impano Minisitiri w’Ubutabera, Uburenganzira bwa Muntu akaba n’Intumwa Nkuru ya Leta mu Birwa bya São Tomé-et-Príncipe, Minisitiri Dr. Cilcio Bandeira dos Santos
Umuyobozi w'agateganyo wa RFL, Dr Justin Kabera (ibumuso) yasobanuriye intumwa zo muri São Tomé-et-Príncipe imikorere y'iyi laboratwari ayobora
Samvura Jean Pierre, umuyobozi muri Rwanda Forensic Laboratory, ushinzwe agashami gashinzwe gupima ibintu bihumanya ndetse n’ingano ya alcohol iri mu maraso
Minisitiri w’Ubutabera, Uburenganzira bwa Muntu akaba n’Intumwa Nkuru ya Leta wa São Tomé-et-Príncipe, Minisitiri Dr. Cilcio Bandeira dos Santos yasobanuriwe imikorere ya laboratwari y'ibimenyetso bya gihanga
Minisitiri w’Ubutabera, Uburenganzira bwa Muntu akaba n’Intumwa Nkuru ya Leta mu Birwa bya São Tomé-et-Príncipe, Minisitiri Dr. Cilcio Bandeira dos Santos yashimye ikoranabuhanga u Rwanda rwifashisha mu butabera
Minisitiri w’Ubutabera, Uburenganzira bwa Muntu akaba n’Intumwa Nkuru ya Leta mu Birwa bya São Tomé-et-Príncipe, Minisitiri Dr. Cilcio Bandeira dos Santos
Minisitiri Dr. Cilcio Bandeira dos Santos na Eloisa Cabinda bishimiye kuza kwigira ku Rwanda
Minisitiri Dr. Cilcio Bandeira dos Santos (iburyo) n'Umuyobozi wa Rwanda Forensic Laboratory ubwo bari bakurikiye umukozi wabasobanuriraga imikorere y'ibizamini by'isanomuzi, ADN
Iyi laboratwari ifite ikoranabuhanga rishobora kugenzura ibyaha byakozwe hakoreshejwe ikoranabuhanga nko kwandikira umuntu ubutumwa bumutera ubwoba kabone n'ubwo waba warabusibye
Eloisa Cabinda yabwiye IGIHE ko iyi ari intambwe ya mbere y’imikoranire myiza hagati y’u Rwanda na São Tomé-et-Príncipe
Abayobora amashami atandukanye basobanuye imikorere yayo
Bafashe ifoto y'urwibutso

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .