Sanday Kabarebe yagizwe Umuyobozi Mukuru w’Ihuriro ry’abikorera mu by’ingufu

Yanditswe na IGIHE
Kuya 21 Ukwakira 2018 saa 05:51
Yasuwe :
0 0

Sanday Kabarebe yagizwe Umuyobozi Mukuru w’Ihuriro ry’Abikorera mu bijyanye n’ingufu z’amashanyarazi mu Rwanda, (Energy Private Developers, EPD).

Ni we Muyobozi Mukuru wa mbere iri huriro rigize kuva ryajyaho mu mwaka wa 2014.

EPD ni ihuriro rya sosiyete n’ibigo by’abikorera bifite aho bihuriye n’urwego rw’ingufu n’amashanyarazi. Ni rimwe mu mitwe itanu igize igice gishinzwe inganda mu Rugaga rw’abikorera mu Rwanda (PSF).

EPD yibanda ku gukora ubuvugizi ku banyamuryango no guteza imbere ubufatanye bugamije iterambere ry’urwego rw’ingufu mu Rwanda. Yashyizweho n’Itegeko No 41 yo kuwa 13/10/2014.

Sanday wagizwe umuyobozi Mukuru, afite inshingano zo kuyobora gahunda z’ihuriro no gushyira mu bikorwa gahunda nshya yaryo y’ibikorwa, ari nako akorana bya hafi n’inama y’ubutegetsi.

Sanday azanye muri EPD ubumenyi, ubuhanga n’ubunararibonye afite mu bijyanye n’ingufu n’ubucuruzi mu Rwanda.

Yatangiye gukora muri EPD guhera mu mwaka wa 2016 ubwo yari ashinzwe imicungire y’ibikorwa by’umushinga Shell Foundation ukoranan’iryo huriro, aho yagize uruhare mu gushyiraho gahunda y’amashanyarazi adakomoka ku ngomero, kubaka ubumwe n’abafatanyabikorwa mu rwego rw’ingufu ndetse n’ubuvugizi bw’uru rwego.

Guhera mu 2011-2014 yakoze mu Kigo cy’Igihugu gishinzwe Iterambere (RDB) ashinzwe imitungo n’imicungire y’ubucuruzi.

Sanday afite ubunararibonye kandi yabonye ubwo yari ashinzwe ibyo kwegurira abikorera ibigo bya Leta n’imicungire y’imitungo ya Leta.

Afite impamyabumenyi y’icyiciro cya gatatu cya Kaminuza mu miyoborere rusange (Public Administration) yakuye muri Keller Graduate School of Management iherereye muri California, muri Leta Zunze Ubumwe za Amerika.

Afite kandi impamyabumenyi y’icyiciro cya kabiri mu miyoborere y’ubucuruzi (Business Administration) yakuye muri California State University ndetse n’impamyabumenyi y’icyiciro cya kabiri cya Kaminuza mu by’ubutabera yakuye muri Hannibal La Grange College.

Sanday yitezweho guteza imbere intego za EPD zo kugeza amashanyarazi ku baturarwanda bose.

Iri huriro rirajwe ishinga na gahunda ya Guverinoma yo kugeza amashanyarazi ku banyarwanda bose bitarenze umwaka wa 2024 binyuze mu bufatanye n’ubuvugizi.

EPD ikorana n’abafatanyabikorwa batandukanye barimo Urwego rw’abikorera (PSF), Guverinoma y’u Rwanda, Minisiteri y’ibikorwa Remezo, Ikigo cy’Igihugu cy’Iterambere (RDB) ndetse n’ Ikigo cy’igihugu gishinzwe ingufu (REG) hamwe n’ibigo bigishamikiyeho.

Ikorana kandi n’ibigo mpuzamahanga nka Power Africa, DFID, EnDEV, GIZ n’ibindi. Ifite abafatanyabikorwa nka Shell Foundation na BFZ ziyifasha mu gutera inkunga gahunda n’ubuvugizi ku bibazo by’urwego rw’ingufu.

EPD igizwe n’abanyamuryango basaga ijana barimo abakora mu bijyanye n’ingufu zituruka ku mirasire y’izuba, iziva ku mazi, gaz na Peteroli, biomass, Biogaz, Gaz Methane n’ibindi.

Komite Nshingwabikorwa n’abakozi bose ba EPD bifurije umuyobozi Mukuru mushya amahirwe masa mu nshingano nshya yahawe.

Sanday Kabarebe yagizwe Umuyobozi Mukuru w’Ihuriro ry’Abikorera mu bijyanye n’ingufu z’amashanyarazi mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza