00:00:00 IGIHE NETWORK KN KINYARWANDA EN ENGLISH FR FRANCAIS

Safari Stanley wigeze kuba Umusenateri, yapfiriye mu buhungiro

Yanditswe na IGIHE
Kuya 25 May 2022 saa 10:18
Yasuwe :

Safari Stanley wahoze ari umusenateri mu Nteko Ishinga Amategeko y’u Rwanda yapfiriye muri Afurika y’Epfo aho yari amaze imyaka yarahungiye.

Amakuru yizewe agera kuri IGIHE, yemeza ko Safari yazize uburwayi dore ko amaze igihe arwaye.

Uyu mugabo w’imyaka 80 yahunze u Rwanda mu 2009 nyuma y’uko Inkiko Gacaca zitangiye kumukurikirana ku ruhare rwe muri Jenoside yakorewe Abatutsi.

Urukiko Gacaca rw’Umurenge wa Cyarwa mu Karere ka Huye, mu Ntara y’Amajyepfo, rwamuhamije ubwicanyi bwibasiye abatutsi yakoze ubwe no gukangurira abahutu guhiga abatutsi.

Safari yashinjwe kwica abatutsi umunani bari baramuhungiyeho n’uruhare mu rupfu rw’abandi 600 baguye muri Kaminuza Nkuru y’u Rwanda.

Ubwo yamenyaga ko ari gukurikiranwa n’inkiko, Safari yahise ahunga igihugu anyura i Nairobi muri Kenya mbere yo kugera muri Afurika y’Epfo ari naho yabarizwaga.

Umwe mu bazi neza Safari, yavuze ko akigera muri Afurika y’Epfo yaje gutangira gukorana na RNC ya Kayumba Nyamwasa, aba n’umwe mu bayobozi bayo muri icyo gihugu. Yakundaga gutanga ibiganiro binenga ubuyobozi bw’u Rwanda yifashishije radio ya RNC ikorera kuri internet.

Safari Stanley yatangiye kumenyekana muri Politiki y’u Rwanda kuva mu ntangiro za 1990 ubwo hemerwaga Politiki ishingiye ku mashyaka menshi. Icyo gihe yari mu ishyaka rya MDR .

Hagati ya 1991 na 1994, Safari yabaye Umudepite mu Nteko Inshinga Amategeko, aba Perezida wa Komisiyo y’Ubukungu n’Imari.

Nyuma ya Jenoside yakorewe Abatutsi, yagumye muri MDR akomeza kuba umwe mu badepite b’Inteko Ishinga Amategeko y’inzibacyuho.

Mu 2002 ishyaka MDR ryarasheshwe rishinjwa amacakubiri, Safari ahita ashinga irye yise PSP dore ko na mbere y’isenyuka rya MDR, yari mu gice cyaryiyomoyeho.

Amatora ya Perezida ya 2003 arangiye, Safari ari mu basenateri bashyizweho na Perezida wa Repubulika muri manda y’imyaka umunani yagombaga kurangirana na 2011. Icyo gihe yari muri Komisiyo y’Ububanyi n’Amahanga, Ubutwererane n’Umutekano.

Umwe mu bakoranye na Safari mu Nteko Ishinga Amategeko, yabwiye IGIHE ko yari umuntu ukunda gutanga ibitekerezo ku ngingo nyinshi.

Ati “Mu nteko yarangwaga cyane no kugira ijwi, yaravugaga cyane ariko bagenzi be bakamurega ko agira indimi ebyiri, ko ari indyarya.”

Safari yahunze manda ye itararangira. BBC icyo gihe yatangaje ko abaye umunyapolitiki ukomeye wari uhunze u Rwanda nyuma yo guhamywa ibyaha bya Jenoside yakorewe Abatutsi.

Safari Stanley yapfiriye muri Afurika y'Epfo aho yari amaze igihe ahungiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .