RwandAir yahagaritse gahunda yo kugura indege enye za Airbus A330neo na Boeing 737 MAX

Yanditswe na Iradukunda Serge
Kuya 10 Nzeri 2020 saa 09:01
Yasuwe :
0 0

Umuyobozi wa Sosiyete nyarwanda itwara abantu n’ibintu mu ndege, RwandAir yatangaje ko yahagaritse gahunda yari imaranye iminsi yo kugura indege ebyiri zo mu bwoko bwa Airbus A330neo n’izindi ebyiri za Boeing 737 MAX.

Mu 2018 nibwo byamenyekanye ko RwandAir ifite gahunda yo kugura indege enye zisanga izindi 12 isanganywe, kugira ngo ziyifashe mu byerekezo isanzwe ijyamo n’ibindi bishya iteganya, birimo icya New York muri Leta Zunze ubumwe za Amerika.

Kugura izi ndege ni gahunda u Rwanda rwari rwarashyizemo imbaraga, ku buryo mu 2018 rwandikiye Umuyobozi w’Ikigega mpuzamahanga cy’Imari (IMF) Christine Lagarde, rusaba kongererwa inguzanyo zo kwifashisha mu kugura indege.

Icyo gihe Minisitiri w’Imari n’igenamigambi, Dr Uzziel Ndagijimana, yemeje ko icyo cyemezo cyaje nyuma yo kubona amahirwe mashya mu bijyanye no gutwara abantu n’ibintu mu ndege.

Mu kiganiro Umuyobozi wa RwandAir, Yvonne Makolo, yagiranye na Flightglobal ku wa 8 Nzeri yavuze ko, “ubu nta gahunda igihari yo kugura neos”, anemeza ko umwanzuro wo kureka kugura iza 737 Max wafashwe “mbere y’iki cyorezo”.

Bishoboka ko hari gahunda yo kuba RwandAir yazahuza ingendo na Qatar Airways, ari nacyo cyatumye ihagarika kugura izi ndege, ariko Makolo asubiza bikiganirwaho.

Ati "Inzira zo guhuriza hamwe indege zacu no kuvanga ingendo iracyaganirwaho."

Asobanura ibijyanye no kwagura ibyerekezo RwandAir ijyamo, Makolo yavuze ko muri iki gihe cy’icyorezo cya Covid-19 bahisemo kugumana ibisanzwe.

Yagize ati "Muri iki gihe hari imbogamizi zatewe na coronavirus, tuzagumana umubare w’indege uko uri ubu […] twagenze gake mu kwagura ibyerekezo muri ibi bihe umuntu atamenya aho ibintu byerekera."

Kugeza ubu RwandAir ifite indege zirimo Airbus A330 – 300 imwe, Airbus A330 – 200 imwe, Boeing 737-800NG enye, Bombardier Q-400 Next Gen ebyiri, Bombardier CRJ-900 NextGen ebyiri na Boeing 737-700NG ebyiri.

Iyi ni imwe mu ndege za Airbus A330neo byavugwaga ko yaguzwe na RwandAir

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .