00:00:00 IGIHE NETWORK KN KINYARWANDA EN ENGLISH FR FRANCAIS

Rwanda Foam na AMEGERWA byiyemeje umusanzu ngo Jenoside itazongera ukundi

Yanditswe na Muyisenge Jean Felix
Kuya 3 July 2022 saa 11:20
Yasuwe :

Umuyobozi wa Rwanda Foam Ltd na AMEGERWA, Makuza Robert, yasabye ko kwibuka abazize Jenoside yakorewe Abatutsi biba umuco n’inshingano za buri muntu wese mu gukomeza guha agaciro abayizize n’abacitse ku icumu.

Ibi yabitangaje ku wa Gatandatu, tariki ya 2 Nyakanga 2022, ubwo abakozi ba Rwanda Foam, AMEGERWA na Makuza Peace Plazza bahuriraga mu gikorwa cyo kwibuka abakozi 28 bakoraga muri Rwanda Foam na AMEGERWA bazize Jenoside yakorewe Abatutsi.

Iki gikorwa cyaranzwe no gusura no kunamira abasaga ibihumbi 250 bashinguye mu Rwibutso rwa Jenoside rwa Kigali ku Gisozi.

Umuyobozi Mukuru w’ibi bigo, Makuza Robert, yavuze ko ari igikorwa bakora buri mwaka ndetse kigomba kuba umuco n’ahandi hose kugira ngo bakomeze guha agaciro abari abakozi babo n’Abanyarwanda bazize Jenoside yakorewe Abatutsi.

Yagize ati “Twaje kwibuka abari abakozi bacu bazize Jenoside yakorewe Abatutsi, dufata mu mugongo abayirokotse kugira ngo dukomeze no gushimangira ko itazaba ukundi.”

Yakomeje agaragaza ko muri iyi myaka 28 ishize Jenoside yakorewe Abatutsi ibaye Rwanda Foam na AMEGERWA bagerageje gukora ibikorwa bitandukanye byo gufatanya na Leta mu nzira y’iterambere.

Ati “Umusanzu wa mbere ni kwigisha urubyiruko rufite ubwiganze mu bakozi bacu amateka yaranze Jenoside, ikindi cy’ingenzi ni uko amasosiyete yacu ashyigikira ibikorwa byiza by’iterambere ubuyobozi bwacu bukorera igihugu. Ni inshingano zacu rero kujya mu murongo w’ubuyobozi wo guteza imbere igihugu duharanira ko kitazasubira aho cyavuye.”

Umuyobozi ushinzwe Ubutabera mu Muryango Ibuka Rwanda, Kalinda Jean Damascène, yatangaje ko yashimiye abacitse ku icumu babasha kwirekura bakagaragaza amarangamutima yabo, bagasangiza abandi ubuzima butoroshye banyuzemo.

Ati “Hari abasigiwe ibikomere n’aya mateka, tugomba gukomeza gushaka uburyo bwo kubafasha no kubasindagiza kugira ngo badaheranwa n’ubwigunge.”

Umwe mu bakozi ba Rwanda Foam wacitse ku icumu rya Jenoside yakorewe Abatutsi, Mariraho Ernest, yashimiye RPF Inkotanyi yabashije guhagarika Jenoside, anemeza ko abakiri bato bagomba gukomeza kwigishwa amateka mabi yaranze u Rwanda.

Ati “Kuzana n’urubyiruko rwabayeho nyuma ya Jenoside bidufasha kurusobanurira ibyatubayeho twe nk’abayirokotse kugira ngo rusobanukirwe n’amateka bityo ruzaharanire ko bitazongera kuba ukundi.”

Ushinzwe Abakozi muri Rwanda Foam, Martha Kagaju, yatangaje ko gusura inzibutso ari ngombwa cyane ku rubyiruko rwavutse nyuma ya Jenoside.

Ati “Hari abana bavutse nyuma ya Jenoside tuba twazanye aha kugira ngo bamenye inkomoko y’ayo, uko yateguwe n’amasomo twkuyemo kugira ngo dufate ingamba zo kubungabuga ejo hazaza.”

Hamaze kumenyekana abantu basaga 28 bahoze bakorera Rwanda Foam na AMEGERWA bahitanywe na Jenoside yakorewe Abatutsi mu 1994.

Ibi bigo mu gukomeza gufasha igihugu kwiyubaka, bishyira imbaraga mu gufasha abacitse ku icumu rya Jenoside binyuze mu kubaba hafi no kubafasha mu bikorwa by’iterambere bituma batigunga.

Abakozi ba Rwanda Foam, AMEGERWA na Makuza Peace Plaza bahuriye mu gikorwa cyo kwibuka ku nshuro ya 28 Jenoside yakorewe Abatutsi mu 1994
Abakozi ba Rwanda Foam na AMEGERWA biyemeje gutanga umusanzu wabo ngo Jenoside yakorewe Abatutsi itazongera kubaho ukundi
Beretswe filime igaragaza uko umugambi wa Jenoside wacuzwe, ukanashyirwa mu bikorwa n'urugendo rw'ubumwe n'ubwiyunge
Aba bakozi basobanuriwe amateka yaranze Jenoside yakorewe Abatutsi mu 1994
Abakozi ba AMEGERWA na Rwanda Foam bibutse bagenzi babo 28 bishwe muri Jenoside yakorewe Abatutsi
Abakozi ba Rwanda Foam na AMEGERWA basuye Urwibutso rwa Kigali ku Gisozi
Bunamiye inzirakarengane za Jenoside ziruhukiye mu Rwibutso rwa Kigali ku Gisozi
Mariraho Ernest ukora muri Rwanda Foam yashimye RPF Inkotanyi yahagaritse Jenoside yakorewe Abatutsi mu 1994
Umuyobozi wa Rwanda Foam Ltd na AMEGERWA, Makuza Robert, yasabye ko kwibuka abazize Jenoside yakorewe Abatutsi biba umuco n’inshingano za buri wese
Nyuma hanabaye ibiganiro byatanzwe n'abayobozi batandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .