Rwamagana: Umushinga wo kuhira wa miliyari 16Frw witezweho impinduka mu buhinzi bw’umuceri

Yanditswe na Hakizimana Jean Paul
Kuya 7 Gashyantare 2019 saa 07:02
Yasuwe :
0 0

Ikigo cy’u Buyapani gishinzwe Ubutwererane mpuzamahanga, JICA, cyatangije ibikorwa byo kubaka umushinga wo kuhira ufite agaciro ka miliyari 16 Frw, witezweho kuzamura ubuhinzi bw’umuceri mu karere ka Rwamagana.

Uyu mushinga biteganywa ko uzuzura mu 2020 watangijwe ku mugaragaro kuri uyu wa Kane mu gishanga cya Cyaruhogo gihingwamo umuceri na koperative eshatu zirimo abanyamuryango 600. Gifite ubuso bungana na hegitari 170.

Amasezerano y’uyu mushinga yasinywe ku wa 31 Werurwe 2017. Biteganyijwe ko hazavugururwa ibyuzi (dam) bibiri bisanzwe hanubakwe igishya, ndetse hubakwe n’umuyoboro ujyana amazi mu mirima y’abaturage ureshya na kilometero 23,5.

Uyu mushinga uzafasha abahinzi kongera umusaruro dore ko bezaga toni 3,5 kuri hegitari imwe, bagere kuri toni 5 kuri hegitari.

Umunyamabanga Uhoraho muri Minisiteri y’ubuhinzi n’ubworozi, Musabyimana Jean Claude, yasabye abaturage gufata neza ibikorwa byo kuhira bagiye kubona kandi bakabibyaza umusaruro.

Ati ”Uyu mushinga wo kuhira witezweho guha akazi abantu benshi hano, hari abaturage bazahabona akazi ko kubaka, guhinga umuceri n’ibindi. Ayo mahirwe mubonye rero ntazabapfire ubusa ahubwo azasige mwiteje imbere, ikindi turabasaba gufata neza damu zigiye kubakwa kugira ngo zizakomeze kuduha umusaruro.”

Yavuze ko muri gahunda ya guverinoma y’imyaka irindwi leta yiyemeje kongera umusaruro w’ubuhinzi biciye mu kongera ubuso bwuhirwa aho ari igikorwa leta ifatanya n’abafatanyabikorwa batandukanye barimo n’u Buyapani biciye mu kigo cyabo gishinzwe ubutwererane mpuzamahanga.

Ambasaderi w’u Buyapani mu Rwanda Takayuki Miyashita, yavuze ko igihugu ahagarariye cyishimiye gufatanya n’u Rwanda mu bikorwa by’iterambere, avuga ko uretse uyu mushinga hari n’indi myinshi igihugu cye cyifuza gufatanya n’u Rwanda mu kurushaho guteza imbere abaturage no kwagura imirimo y’ubuhinzi.

Muri gahunda ya Guverinoma y’imyaka irindwi (2017-2024), yiyemeje ko hazongerwa ubuso bw’ubutaka buhujwe n’ubwuhirwa.

Ubutaka bwuhirwa buzava ku buso bungana na hegitari 48.508 zo mu mwaka wa 2016/2017 bugere kuri hegitari 102.284 muri 2024. Umwihariko uzahabwa ubuhinzi bukorerwa mu bishanga n’ubukorerwa ku buso buto hakoreshejwe ikoranabuhanga ridahenze cyane.

Uyu mushinga watashywe kuri uyu wa Kane i Rwamagana
Iki gishanga gikorerwamo n'amakoperative atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza