00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana: Polisi yagabiye imiryango ine inatangira mituweli abaturage 1000

Yanditswe na Hakizimana Jean Paul
Kuya 10 Mutarama 2023 saa 10:56
Yasuwe :

Polisi y’u Rwanda ibinyujije mu Kigo cy’amahugurwa cya Polisi cya Gishari, yagabiye imiryango ine itishoboye yo mu Karere ka Rwamagana, inatangira mituweli abaturage 1000 batishoboye.

Kuri uyu wa Kabiri tariki ya 10 Mutarama 2023, ni bwo Polisi yakoze ibi bikorwa mu Mudugudu w’Umunini mu Kagari ka Ruhimbi, Umurenge wa Gishari mu Karere ka Rwamagana.

Umuvugizi wa Polisi y’u Rwanda mu Ntara y’Iburasirazuba, SP, Twizeyimana Hamdun, yavuze ko ibi bikorwa ari ngarukamwaka aho bimaze imyaka 22 bikorwa mu rwego rwo gushimangira ubufatanye Polisi y’u Rwanda ifitanye n’abaturage.

Ati “ Ni ibikorwa byo gushimangira bwa bufatanye tubungabunga tunarinda umutekano wacu, kera abantu bari bazi ko umutekano ari ukurinda ubusugire bw’igihugu gusa cyangwa se kurinda umwanzi watera aturutse hanze, uyu munsi rero umutekano unareberwa mu bintu byinshi birimo imibereho myiza y’abaturage n’iterambere.”

SP Twizeyimana yakomeje avuga ko nka Polisi y’u Rwanda ari yo mpamvu bahisemo koroza abaturage mu rwego rwo kubafasha kuzamura imibereho yabo ndetse banabashe kugera ku iterambere kugira ngo umutekano urusheho kugerwaho neza.

Bazatsinda Jean Bosco utuye mu Kagari ka Gati mu Murenge wa Gishari, yashimiye Polisi y’u Rwanda yamuhaye inka yiyemeza kuyifata neza no gukoresha amata n’ifumbire biyiturukaho mu kumuteza imbere.

Ati “ Iyi nka banyoroje igiye kumfasha guhindura ubuzima, izamfasha kubona ifumbire mbashe guhinga no kweza neza, nanabashe gusagurira amasoko, ikindi bizamfasha kwigisha abana banjye banywe amata ubuzima buhinduke.”

Nyirandegeya Christine utuye mu Mudugudu wa Kibonde mu Kagari ka Kavumu, we yashimiye Polisi y’Igihugu yamuhaye inka, avuga ko mbere yari atunze inka ikaza gupfa iterambere yari afite rigasubira inyuma cyane.

Ati “ Numvaga ntazongera korora bindangiranye, najyaga neza ibigori kubera ifumbire nakuraga kuri ya nka ipfuye ndiheba none ubu Polisi y’Igihugu yantekerejeho impa inka nziza, ubu ndumva byandenze rwose ndashima Imana ko muri uyu mwaka wa 2023 nongeye kubona inka nzayifata neza ibyo nezaga bigiye kuzamuka cyane.”

Nyirandegeya yashimiye Polisi itarobanura abantu igafasha buri umwe ntakindi kintu igendeyeho, yabijeje ko inka bamuhaye izamuhindurira ubuzima mu buryo bugaragara aniyemeza ko azoroza abandi baturage benshi.

Umuyobozi w’Akarere ka Rwamagana, Mbonyumuvunyi Radjab, yashimiye Polisi y’u Rwanda ku bikorwa byiza yabakoreye avuga ko bifasha abaturage babo kwikura mu bukene.

Meya Mbonyuuvunyi yakomeje asaba abahawe inka kuzifata neza bakazirinda kwicwa n’inzara, zikabaha ifumbire n’amata ku buryo batera imbere bakava mu bukene bakiteza imbere mu buryo bugaragara.

Kuva gahunda ya girinka yatangizwa na Perezida Kagame, Akarere ka Rwmagana kamaze gutanga inka 14 340.

Buri mwaka Polisi y’u Rwanda ibinyujije mu Ishuri rya Polisi rya Gishari ifasha abaturage bo mu Karere ka Rwamagana aho hari abo yubakira inzu zo kubamo, abo iha amatungo ndetse abandi ikabatangira mituweli.

Inka zatanzwe zirimo n’iyabyaye
Nyirandegeya yari afite akanyamuneza ko guhabwa inka
Umuyobozi w’Akarere ka Rwamagana, Mbonyumuvunyi Radjab, yashimiye Polisi y’Igihugu asaba abahawe inka kuzifata neza
CP Niyonshuti Robert ukuriye ishuri rya Polisi yasabye abaturage kugira uruhare mu kwirindira umutekano
Bazatsinda yashimiye Polisi y’Igihugu yamuhaye inka
Abayobozi batandukanye bitabiriwe uyu muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .