00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana: Ntavuga rumwe n’Akarere ku ngurane yahawe

Yanditswe na Hakizimana Jean Paul
Kuya 5 Mutarama 2023 saa 07:27
Yasuwe :

Kibukayire Victoire utuye mu Karere ka Rwamagana mu Murenge wa Kigabiro, ntiyemeranya n’Akarere ka Rwamagana ku ngurane kamugeneye ubwo hubakwaga umuhanda kuko avuga ko bakoresheje ubutaka bwe akabarirwa ibiti gusa.

Uyu muturage utuye mu Mudugudu wa Bigabiro mu Kagari ka Cyanya avuga ko mu myaka ine ishize ubwo hubakwaga umuhanda wanyuze ku irembo rye, watumye hari ubutaka bwe bakoresha ndetse ngo n’imashini zakoraga umuhanda zijegeza inzu ye ku buryo yajemo imitutu abyereka ubuyobozi burabyirengagiza.

Kibukayire yabwiye IGIHE ko ubusanzwe bajya kubaka uyu muhanda ngo babariye abaturage bari ibumoso baranabishyura ariko ngo batangiye kubaka umuhanda bawagurira ku ruhande rw’iburyo ari naho atuye, yavuze ko nta muntu wigeze umubarira bituma bakoresha ubutaka bwe, imashini zikora umuhanda zinajegeza inzu ye ku buryo kuri ubu ngo irimo imitutu myinshi ishobora gutuma isenyuka isaha iyo ariyo yose.

Ati “Byampungabanyirije ubuzima njye n’umuryango wanjye, kuko ubuyobozi negereye nta n’umwe wampaye igisubizo cyiza kinyubaka, ahubwo bampaga ibimpungabanya dore ko bananyise umusazi, aho nageraga hose bavugaga ko ndi umusazi.”

Kibukayire avuga ko Akarere kagiye kohereza abakozi bako bakaza bakareba ikibazo uko kimeze ariko ngo ntibigire icyo bitanga.

Yavuze ko yandikiye akarere inshuro ebyiri, ikibazo cye akijyana ku Ntara, Umuvunyi Mukuru ndetse no muri Minisiteri y’Ubutegetsi bw’Igihugu bose ngo bakaba barasabye Akarere gukurikirana ikibazo cye ariko ngo n’ubu ntakirakorwa.

Ati “Njye ndasaba kurenganurwa nkishyurwa ibintu byanjye byose byangijwe dore ko nta bwumvikane dufitanye, nta n’amasezerano nagiranye n’Akarere nk’abandi baturage ngo bambarire, imitungo nsaba ko banyishyura harimo inzu yanjye bangije bakora uyu muhanda imashini zarayijegeje mu buryo bugaragara, ikindi hari ubutaka bwanjye bubatseho umuhanda kandi barishyuye abo hakurya, hari ibiti byanjye batemye byose ntibanyishyuye.”

Umuyobozi w’Akarere ka Rwamagana, Mbonyumuvunyi Radjab avuga ko ibyo uyu muturage avuga abeshya ko ibyo yabariwe ari ibiti byari biri ku irembo kandi ngo yanze kwakira amafaranga.

Ati “ Mbere yavugaga ko hari ibiti byari biri ku muhanda ko babitemye batamubariye, twagiyeyo duhamagara abaturage n’abayobozi kuva ku Mudugudu n’Isibo batubwira umubare w’ibiti nawe tubyemeranywaho, hanyuma we ukabona ko akeneye ko tumwimura tukamwishyura n’inzu abamo.”

Mbonyumuvunyi yakomeje avuga ko inzu abamo avuga ko yangijwe n’iyubakwa ry’umuhanda ataribyo ko ahubwo ishaje ku buryo ngo imitutu iriho ituruka ku gusaza.

Yavuze ko boherejeyo abashinzwe ubwubatsi ku Karere ariko bose bajyayo bagasanga nta kintu na kimwe kigaragaza ko yasenyewe n’umuhanda gihari.

Yakomeje avuga ko hari n’izindi nzego zoherejeyo abakozi harimo Intara, Umuvunyi Mukuru kugira ngo barebe niba koko arengana ariko ngo ntacyo byatanze.

Ati “ We arashaka ko tumugurira tukamwimura ariko icyo kibanza ntacyo twagikoresha, twanamusabye ko yakoresha ushinzwe ubwubatsi yifuza akamurebera ariko ntiyabyemeye.”

Mbonyumuvunyi yavuze ko uyu muturage yanze kwakira amafaranga bamubariye y’ibiti yemeza ko asabye icyangombwa cyo kuvugurura bakimuha nk’undi Munyarwanda wese ariko ko ibyo kumwishyurira ibindi ntabirimo.

Kibukayire avuga ko ubwo hubakwaga uyu muhanda wa kaburimbo hakoreshejwe igice cy'ubutaka bwe nyamara ntiyakibarirwa
Kibukayire yavuze ko kuri ubu inzu ye ijegera kubera iyubakwa ry’umuhanda wanyuze mu butaka bwe
Umuyobozi w’Akarere ka Rwamagana, Mbonyumuvunyi Radjab yavuze ko ibyo uyu muturage avuga byose ari ukubeshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .