00:00:00 IGIHE NETWORK KN KINYARWANDA EN ENGLISH FR FRANCAIS

Rwamagana: Impungenge ku mugore uvuga ko yajujubijwe n’umugabo w’Umuyobozi

Yanditswe na Ntabareshya Jean de Dieu
Kuya 26 June 2022 saa 10:58
Yasuwe :

Mu Karere ka Rwamagana mu Murenge wa Gishari, umugore witwa Mukagatare Ernestine avuga ko amaze igihe ahohoterwa n’umugabo we yitwaje ko ari umuyobozi w’umudugudu.

Uyu muryango wari umaranye imyaka 28 aho babyaranye abana barindwi, umugabo afite imyaka 55 mu gihe umugore afite imyaka 49.

Birumvikana ko ari umuryango w’abantu bakuze ariko gukimbirana ntibigendana n’ikigero cy’imyaka nubwo hari ibiba bikwiye kwirindwa bitewe n’ikigero cy’imyaka runaka.

Mukagatare Ernestine agaragaza ko yagiye mu buyobozi bw’inzego zibanze igihe kitari gito kugira ngo akemurirwe ikibazo ngo kuko amakimbirane yabo amaze igihe kirekire ariko bikaba iby’ubusa.

Yagize ati “Twashyikaga mu buyobozi agaca bugufi agasaba imbabazi nkagira ngo koko arahindutse ariko twagera mu rugo akongera kunkubita, ampohotera ku buryo nashoboraga kurara mu baturanyi. Igihe cyarageze n’abaturanyi abatera ubwoba ko uwo azongera kubabonana azamugirira nabi.”

Muri ayo makimbirane amaze imyaka, kuko yatangiye 1997 ngo umugore yakunze kwahukana cyane kubera umugabo nyuma y’igihe runaka akajya kumugarura amwizeza ko azamufata neza.

Guhozwa ku nkeke byaje kumuviramo guhunga urugo nyuma y’uko umugabo amubaniye nabi kugeza ubwo nibyo ngo yageragezaga gukora birebana n’iterambere nyamugabo yabihombyaga.

Hitimana Alphonse, uyoboye umudugudu wa Mugusha akaba n’ushinzwe umutekano muri uwo mudugudu, yavuze ko ibyo umugore we avuga atari ukuri.

Yavuze ko gutandukana byatewe ahanini n’uko umugore we yakunze kwitwara nabi ndetse aza kumufatira mu busambanyi no gukoresha umutungo w’urugo mu buryo butaboneye.

Aba bombi batandukanye mu Ugushyingo 2021 nyuma y’uko umugore we agiye kumurega ariko ngo bigatanga ubusa. Umugore avuga ko yatsinzwe n’uko umugabo we aziranye n’abayobozi bamukingiye ikibaba.

Uyu mugore ngo yageze no ku rwego rushinzwe kugira inama abaturage mu bijyanye n’amategeko (MAJ) Karere ariko asabwa ko ikibazo cyabo cyazakemurirwa mu murenge.

Yakomeje agira ati “Narihanganye bihagije, umugabo yarankubitaga bihagije ku buryo nari ngiye no kwiyahura ngeze i Kiramuruzi ku ruzi ndatinya nsubirayo. Kuva 1997 yatangira kwinjira mu bagore twatangiye gushyamirana.”

Umuyobozi w’Umurenge wa Gishari, Muhinda Augustin, yabwiye IGIHE ko iki kibazo atari akizi nubwo uwo mugore yemeje ko ubuyobozi busanzwe bukizi kuko kimaze imyaka.

Uyu muyobozi yavuze ko agiye gutangira gukurikirana icyo kibazo kugira ngo gishakirwe igisubizo mu gihe cya vuba, nubwo hari aho yaje kugera yemeza ko uwo mugore ari we wagaragaweho imyitwarire mibi.

Bamwe mu baturage bo mu mudugudu wa Mugusha babwiye IGIHE ko uyu muyobozi akunze kubabangamira.

Bagaragaje ko yigeze kuyobora uyu mudugudu ariko akaza gutakarizwa icyizere byatumye ava ku buyobozi ariko ngo yongeye kuwuyobora nyuma y’uko uwari umuyobozi wawo yegujwe. Ibyo abifatanya no kuba ushinzwe umutekano.

Impungenge ni zose kuri uwo mugore!

Mu gihe gito bamaze batandukanye, ngo umugabo yahise atangira kugurisha imwe mu mitungo bari bafitanye ari na cyo giteye inkeke uyu mugore.

Mukagatare Ernestine yavuze ko ababajwe n’uko ari gushuka abana akagurisha isambu nyamara amafaranga akayakoresha mu buryo butanoze.

Yasabye ko ubuyobozi bushobora kugira icyo bukora bukamugarurira ubutaka bwamaze kugurwa ku nyungu z’abana ndetse ngo hari n’amatungo (inka ebyiri) yamaze kugurishwa.

Uyu mugabo yemereye IGIHE ko amaze kugurisha imirima itatu kuva batandukana n’umugore ariko ngo yabikoze mu nyungu zo gukomeza kwita ku bana barindwi yasigiwe n’umugore.

Ati “Imirima nibyo hari iyo nagurishije, umwe nawugurishije ngiye kwishyura ideni twari dufite muri banki kandi uwo mugore yari arizi kuko ni nawe warifashe agenda ataryishyuye. Undi nawugurishije bampa miliyoni 1.2 Frw nguramo moto kugira ngo ifashe abana, undi nawugurishije umwana agiye kujya ku ishuri.”

Umuyobozi w’Umurenge wa Gishari yemeza ko igurishwa ry’umurima biramutse koko byarakozwe umugore atarasinyeho yazagana inkiko zikamurenganura.

Yavuze ko mu gihe uyu mugore yakongera kwegera ubuyobozi azafashwa ikibazo kigashakirwa umuti kandi ngo abaguze iyo mitungo bashobora no kwisanga mu bihombo.

Ibiro by'Umurenge wa Gishari mu Karere ka Rwamagana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .