Abacaniwe ni imiryango 40 yahawe imirasire y’izuba, ibiro by’Akagari ka Gatare n’Ivuriro ry’Ibanze ‘Poste de Sante ya Gatare’ itari ifite umuriro wo gukoresha mu kazi ka buri munsi.

Abaturage bagaragaje ko kuba guhabwa umuriro bigiye kubafasha cyane ko mbere babagaho mu mwijima.

Mutabaruka Jerôme yagize ati “Mbere nari ndi mu kizima ariko ubu ngiye kuzajya mbonesha. Byangoraga cyane kuko nacanaga agatoroshi kandi byari bigoye no guhora nkagura bitoroshye. Ubu ndabona, mu nzu harabona rero byanshimishije cyane.”

Mukamana Beatrice nawe yemeje ko bigiye kumufasha by’umwihariko bikazafasha abana be biga kujya basubiramo amasomo ku mugoroba.

Umunyamabanga Nshingwabikorwa w’AKagari ka Gatare, Uwayisenga Vestine, yagaragaje uburyo imikorere yari igoye nta muriro bafite.

Yavuze uburyo byasabaga gukora urugendo rwo kwerekeza ku biro by’Umurenge wa Nyakariro kugira ngo batange serivisi zasabaga ikoranabuhanga zirimo n’ibyangombwa bikunze gusabwa n’abaturage.

Umuriro wahawe ibiro by’Akagari utandukanye n’iyahawe abaturage kubera ko hari uburyo bwo kuzajya bashyira umuriro muri mudasobwa na internet ikabasha gukora neza, bityo kuri za serivisi byasabaga ko bakora ingendo ndende bikaba bitazongera kubaho.

Kuri ‘Poste de Sante’ yahawe umuriro, Umuyobozi wayo, Niringiyimana Jean Danny, yagaragaje ko ubundi serivisi zatangwaga ku manywa ariko kuri ubu zigiye no kujya zitangwa nijoro.

Umuyobozi w’Umuryango Umbrella for Vulnerable, Sheikh Saleh Habimana, yabwiye IGIHE ko bahisemo gukora igikorwa cyo gucanira iyo miryango mu rwego rwo kuyikura mu mwijima no gushyikira gahunda ya Leta yo kugeza umuriro w’amashanyarazi ku baturage bose nibura bitarenze 2024.

Yagize ati “Twiyemeje kunganira Leta muri gahunda yo kugeza ku Banyarwanda bose umuriro n’amazi. Twahisemo urumuri kubera ko na Perezida wa Repubulika arwanya umwijima, duhitamo n’amazi kubera ko aho yageze n’isuku iba yahageze kandi amazi ni isoko y’ubuzima. Abaturage tubasaba kubungabunga ibikorwaremezo tuba twabahaye kuko aba ari ibyabo ariko natwe dukomeza kubikurikirana.”

Sheikh Habimana yavuze hatanzwe imirasire na radiyo zizafasha aba baturage kumenya aho igihugu kigeze.

Uwayisenga uyobora Akagari ka Gatare yagaragaje ko hari serivisi batatangaga mbere yo guhabwa amashanyarazi akomoka ku mirasire y'izuba

Umuyobozi w’Umuryango Umbrella for Vulnerable, Sheikh Saleh Habimana na Mbonyumuvunyi Radjabu batashye umuriro ukomoka ku mirasire y'izuba wahawe abaturage

Umuyobozi w’Umuryango Umbrella for Vulnerable, Sheikh Saleh Habimana yagaragaje ko bari gushyigikira Leta yiyemeje kuzageza umuriro ku baturage bose

Mutabaruka Jerome yashimye umuriro w'amashanyarazi bahawe

Byari ibyishimo ku baturage bahawe umuriro w'amashanyarazi

Poste de sante ya Gatare yahawe umuriro ukomoka ku mirasire y'izuba

Mukagasasira yashimiye radio yahawe izamufasha kumenya amakuru

Umwogoshi Deo Marigaba yishimiye umuriro wagejejwe mu gace atuyemo

Meya Mbonyumuvunyi Radjabu yashimiye abafatanyabikorwa bagira uruhare mu iterambere ry'igihugu

Ibiro by'Akagari ka Gatare byahawe umuriro w'amashanyarazi ukomoka ku mirasire y'izuba

Abaturage bacaniwe bari bafite akanyamuneza

Amafoto: Ntabareshya Jean de Dieu